သိုၵ်းမၢၼ်ႈ ၶလယ 41 ဢၼ်ပၵ်းတပ်ႉလႃႈသဵဝ်ႈ ယိုတ်းႁိူၼ်းၵူၼ်းဝၢၼ်ႈ ဢၼ်မီးတီႈ တၢင်းၽႄ လႃႈသဵဝ်ႈ-တၢင်ႉယၢၼ်း ၼၼ်ႉ 10 လင် ၊ ဢဝ်ရူတ်ႉထုၺ်လိၼ်မႃးထုၺ်ထႆယႃႉႁိူၼ်း လူၺ်ႈဢမ်ႇပၼ်ၾၢင်ႉလၢတ်ႈဝႆႉလူင်ႈၼႃႈသင်။

ဢၼ်သိုၵ်းမၢၼ်ႈ ၶလ 41 လႃႈသဵဝ်ႈဢဝ်ရူတ်ႉၵႃးထုၺ်လိၼ်မႃး ထႆထုၺ်ယႃႉပႅတ်ႈႁိူၼ်း 10 လင် မိူဝ်ႈၼႆႉ ဝၼ်းတီႈ 10/8/2021 ယၢမ်းၵၢင်ဝၼ်းတဵင်ႈၼႆႉ ပဵၼ်ဝၢၼ်ႈလွႆလၢၼ်း ဢၼ်မီးၼႂ်ႈၸႄႈဝဵင်းလႃႈသဵဝ်ႈ။

“ၵွၼ်ႇၼႃႈတေဢဝ်ၵႃးမႃးထုၺ် မွၵ်ႈ 1 ၸူဝ်ႈမူင်းၼႆႉ ၶဝ်မႃးလၢတ်ႈဝႃႈ ၼႂ်းၶၢဝ်းတၢင်း 1 ၸူဝ်ႈမူင်း ႁႂ်ႈႁိူၼ်း 10 လင်ၼႆႉ ၶၢႆႉဢွၵ်ႇပၼ်ၼႂ်ႉပိုၼ်ႉတီႈ ႁႂ်ႈယဝ်ႉတူဝ်ႈ။ ၶဝ်ဝႃႈၶဝ်တေႁဵတ်း ၶွၵ်ႈဝူဝ်း ၼႆဝႃႇ။ ၶဝ်ဢမ်ႇလၢတ်ႈဝႆႉလူင်ႈၼႃႈလူင်။ ၵိုင်ႈၵၢင်ႉမႃးလၢတ်ႈ ၼႂ်း 1 ၸူဝ်ႈမူင်းၼႆ ဢမ်ႇၸၢင်ႈႁဵတ်းႁိုဝ်ၶၢႆႉႁႂ်ႈယဝ်ႉၶႃႈလူး” – ၵူၼ်းဝၢၼ်ႈဢၼ်ၺႃးယႃႉႁိူၼ်းၵေႃႉၼိုင်ႈ လၢတ်ႈၽူႈတွႆႇႁွၵ်ႈၼင်ႇၼႆ။

 ၶၢဝ်းၶူဝ်ႊဝိတ်ႉ လႄႈ ၶၢဝ်းမိူင်းသုၵ်ႉၸိူင်ႉၼႆ သိုၵ်းယိုတ်းမိူင်းၵိုင်ႉၵၢင်ႉမႃးၸႂ်ႉၵူၼ်းမိူင်းၶၢႆႉဢွၵ်ႇၵမ်းလဵဝ် သေမႃးယႃႉပႅတ်ႈႁိူၼ်းၵူၼ်းဝၢၼ်ႈ ၊ တႃႇယူႇတႃႇၵိၼ် ပဵၼ်ဢၼ်ယၢပ်ႇၽိုတ်ႇလိူဝ်ႁႅင်း ၵူၼ်းၺႃးယႃႉႁိူၼ်း ဢမ်ႇၶႂ်ႈဢွၵ်ႇၸိုဝ်ႈ ၼၼ်ႉလၢတ်ႈထႅင်ႈၼင်ႇၼႆ။

“ႁဝ်းၶႃႈမႃးယူႇတီၼႆႈ ၸဵမ်မိူဝ်ႈပီ 1990 ပုၼ်ႉဢေႃႈ။ ၽွင်းၵူၼ်းမိူင်းယၢပ်ႇၽိုတ်ႇ ၶဝ်သမ်ႉမႃးတဵၵ်းငႅၼ်ႉႁႂ်ႈပၢႆႈၸိူင်ႉၼႆဢမ်ႇထုၵ်ႇလီပဵၼ်သေဢိတ်းၶႃႈ။ ႁဝ်းၶႃႈဢမ်ႇမီးတီႈယူႇ ၽွင်းၶူဝ်ႊဝိတ်ႉၸိူင်ႉၼႆတေၵႂႃႇယူႇလႂ်။ လွင်ႈၼႆႉၶႂ်ႈႁႂ်ႈၵူၼ်းလူင် ၸၼ်ႉပႃႈၼိူဝ်ၶဝ်ႁူႉၸွမ်း ၶႃႈဢေႃႈ။ ႁဝ်းၶႃႈဢမ်ႇတၼ်းလႆႈႁၢင်ႈႁႅၼ်းသင်၊ ယၢပ်ႇၽိုတ်ႇတႄႉၶႃႈဢေႃႈ ”- ဝႃႈၼႆ။

တီႈလိၼ်တူင်ႇတၢင်ႇပိုၼ်ႉတီႈ တီႈဝၢၼ်ႈလွႆလၢၼ်းၼႆႉ မိူဝ်ႈၽွင်း 1996 ၼၼ်ႉၵေႃႈသိုၵ်းမၢၼ်ႈၶလယ 41 ၼႆႉၵူၺ်းၼင်ႇၵဝ်ႇ ဝႃႈတႃႇႁဵတ်းသူၼ် ယၢင်တင် ရႃႊပႃႊ ၼႆသေမႃးယိုတ်း ပွၵ်ႈၼိုင်ႈယဝ်ႉ။ ၵူၺ်းၵႃႈမိူဝ်ႈၼၼ်ႉတႄႉ ဢမ်ႇၸႂ်ႉၶၢႆႉ ၊ ၶိုၼ်းႁဵတ်းႁွင်ႈထႅဝ်ဝႆႉပၼ်ၵူၼ်းဝၢၼ်ႈသေ ယိုတ်းဢဝ်တီႈလိၼ်ဝၢၼ်ႈၼၼ်ႉ ႁဵတ်းသူၼ်ယၢင်တင်ပႅတ်ႈ။