ဝၼ်းတီႈ 9/8/2021 ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်းၾၢႆႇပၢႆးယူႇလီ ထတ်းႁၼ်ၵူၼ်းၸပ်းၶူဝ်း 19 မိူဝ်ႈၼႆႉ 3 ၵေႃႉ၊ ယၢမ်းလဵဝ် ၵူၼ်းၸပ်းမီး 60 ပၢႆ ။
ၼႂ်းၸႄႈဝဵင်းလၢႆးၶႃႈ တႄႇဢဝ် ဝၼ်းတီႈ 1/8/2021 တေႃႇထိုင် ဝၼ်းတီႈ 7/8/2021 တႃႇၶၢဝ်းတၢင်း ၼိုင်ႈဝူင်ႈၼႆႉ မီး ၵူၼ်းတိတ်းၸပ်း ၸိူဝ်ႉမႅင်းတင်းမူတ်း 58 ၵေႃႉ။ လူင်းႁူင်းယႃယဝ်ႉ 7 ၵေႃႉ။ ၼႂ်းဝၼ်းတီႈ 8/8/2021 ၼႆႉသမ်ႉ ထူပ်းႁၼ် ထႅင်ႈ 1 ၵေႃႉ၊ မိူဝ်ႈၼႆႉ ဝၼ်းတီႈ 9/9/2021 ထတ်းၵူၼ်း ၵေႃႉ ထူပ်းႁၼ်ထႅင်ႈ 3 ၵေႃႉ ။
ၸၢႆးဢူၵ်ႉၵႃႇ (ႁွင်ႉ) ၸၢႆးၵွင်ၶမ်း ၽူႈတႅၼ်းသၽႃး ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈလၢႆး ၶႃႈႁဝ်းၼႆႉ မီးၵူၼ်းၸပ်း 63 ၵေႃႉ ယဝ်ႉဢေႃႈ။ လူင်းႁူင်းယႃၵႂႃႇၽွင်ႈသေတႃႉ မွၵ်ႈ 60 ၵေႃႉ တိုၵ်ႉယူတ်း ယႃတူဝ်ၵၼ်ဝႆႉ ယူႇၶႃႈ။ ၽူႈလူႉတၢႆ ယွၼ်ႉၶူဝ်ႊဝိတ်ႉ မီး 1 ၵေႃႉ”- ဝႃႈၼႆ။
ၼႂ်းၸႄႈဝဵင်းလၢႆးၶႃႈ ဢၼ်ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ၼမ်တီႈသုတ်း ၼႂ်းဝၼ်းလဵဝ် တႄႉပဵၼ်ဝၼ်းတီႈ 2/8/2021 ၊ထူပ်းႁၼ် တင်းမူတ်း 21 ၵေႃႉ ။
“ဢၼ်လီတီႈသုတ်းတႄႉ ၵူၼ်းမိူင်းႁဝ်းၶႃႈ လီဢွၼ်ၵၼ်ယူႇၼႂ်းႁိူၼ်း ပေႃးဢမ်ႇမီးလွင်ႈယႂ်ႇတႄႉတႄႉ ယႃႇပေဢွၵ်ႇတၢင်းၼွၵ်ႈ။ ႁႂ်ႈဢွၼ်ၵၼ်ယူႇၸွမ်း ပၵ်းပိူင်ပၢႆး ယူႇလီၶဝ် ပူင်တမ်းဝႆႉၼၼ်ႉ တေလီဢေႃႈ။ ႁႂ်ႈၸွႆႈၵၼ်လူတ်းယွမ်း တၢင်းပဵၼ် ဢၼ်ၶူဝ်ႊဝိတ်ႉ ၽႄႈၸပ်းၵၼ် ၼၼ်ႉသေၵမ်း”- ၸၢႆးဢူၵ်ႉၵႃႇ သိုပ်ႇတိုၵ်းသူၼ်း လၢတ်ႈၼႄၼင်ႇၼႆ။
ၼႂ်းလုၵ်ႈလိူၼ်ၵျူႊလၢႆႊ ပူၼ်ႉမႃးၼၼ်ႉ ၼႂ်းၸႄႈဝဵင်းလၢႆးၶႃႈ မီးၵူၼ်းတိတ်းၸပ်း တၢင်းပဵၼ်ၶူဝ်ႊဝိတ်ႉ 19 တင်းမူတ်း 46 ၵေႃႉ။ လူင်းႁူင်းယႃ 28 ၵေႃႉ လူႉတၢႆ 1 ၵေႃႉ ။
လွင်ႈပၼ်တၢင်းႁူႉတၢင်းႁၼ် ႁႂ်ႈၵူၼ်းမိူင်းၵႆယၢၼ်တၢင်းပဵၼ် ၶူဝ်ႊဝိတ်ႉ 19 ၼၼ်ႉ ၸုမ်းတူင်ႇဝူင်းၵူၼ်း၊ ၾၢႆႇပၢႆးယူႇလီ၊ ၸုမ်းပရႁိတ ၾၢႆႇၸွႆႈထႅမ် ပၢင်လီ ပၢင်ၸႃႉ သၢၼ်မိုဝ်းၵၼ်လူင်းပိုၼ်ႉတီႈ၊ ဢမ်ႇယႅၵ်ႈၸၢဝ်းၶိူဝ်း သႃသၼႃ တီႈၵိူဝ်းလီ ၽႂ်တူၵ်းတၢင်းယၢပ်ႇၽိုတ်ႇၵေႃႈ ၸုမ်းၸိူဝ်းၼႆႉ သၢၼ်မိုဝ်းၵၼ် ၸွႆႈထႅမ် ၵူၼ်းလၢႆးၶႃႈလၢတ်ႈၼင်ႇၼႆ။
