ၽွင်းၶၢဝ်းၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းၼႆႉ တၢင်းၾင်ႇမိူင်းၶႄႇ လွမ်ႉႁူဝ်ႉ ၶၢမ်းဢဝ်တီႈလိၼ် ၶွင်ၵူၼ်းမိူင်း မူႇၸေႊထႅင်ႈ ၼႆယဝ်ႉ။
ၼႂ်းႁၢင်လိူၼ်ၵျုႊလၢႆႊ 2021 ၶၢဝ်းတၢင်း 2-3 ဝၼ်းမႃးၼႆႉ တၢင်းၾင်ႇမိူင်းၶႄႇ ၶၢမ်းဢဝ်တီႈလိၼ်ၶွင်ၵူၼ်းမိူင်း ၵိင်ႇၽႄ ၸႄႈဝဵင်းမၢၼ်ႈႁဵဝ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ လွမ်ႉႁူဝ်ႉဢဝ်တီႈလိၼ်ၵူၼ်းမၢၼ်ႈႁဵဝ်း (ဢိူင်ႇ 19 မၢၼ်ႈ) ၽွင်းၵူၼ်းမိူင်း ၵၵ်းတူဝ် ယူႇႁိူၼ်း ႁင်းၽႂ်မၼ်းၼႆယဝ်ႉ။
ၵူၼ်းၼုမ်ႇ မူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢွင်ႈတီႈလိၼ် ဢၼ်ၾင်ႇမိူင်းၶႄႇ မႃးလွမ်ႉဢဝ်ၵႂႃႇၼၼ်ႉ မၼ်းပဵၼ်ၼွင်ပႃဝႆႉလႄႈ တူင်ႈၼႃးၶႅၼ်ႈၵၢင်ဝႆႉ မိူင်းၶႄႇလႄႈ မိူင်းတႆး။ တူင်ႈၼႃးလႄႈ ၼွင်ၼၼ်ႉ ပဵၼ်ၶွင်ၵူၼ်းမိူင်း ၾင်ႇ မိူင်းတႆးႁဝ်းၶႃႈၼႆႉ။ ဢၼ်ၶဝ် မႃးလွမ်ႉဢဝ်ၵႂႃႇၼၼ်ႉ ပဵၼ်ၼွင်ပႃလုၵ်ႈၼိုင်ႈ တေမီးလၢႆဢေႊၶိူဝ်ႊတႄႉ ဢမ်ႇႁူႉ တင်ႈၸႂ် ပၵ်းလၵ်းသဝ်ႁူဝ်ႉသေ လွမ်ႉဢဝ် ပဵၼ်ၶွင်ၶႄႇၵမ်းလဵဝ်ၶႃႈဢေႃႈ”- ဝႃႈၼႆ။
ၼွင်ပႃတီႈလႅၼ်လိၼ်ၼၼ်ႉ ပဵၼ်ၼွင်ပႃၶွင်ၵူၼ်းမၢၼ်ႈႁဵဝ်း၊ သမ်ႉၶၢတ်ႈပၼ်ၶႄႇႁဵတ်း။ ၵူၺ်းၵႃႈဢၼ် လွမ်ႉႁူဝ်ႉ ဢဝ် ၼၼ်ႉ ပဵၼ်ၸဝ်ႈၼႃႈတီႈၶႄႇႁိုဝ်ဢမ်ႇၼၼ်ပဵၼ်ၵူၼ်းမႃးၶၢတ်ႈႁဵတ်းၼွင်ပႃၼၼ်ႉလွမ်ႉႁိုဝ်ၼႆ တိုၵ်ႉၸွပ်ႇတူၺ်းယူႇ။ ၵူၺ်းၵႃႈ မိူဝ်ႈၵွၼ်ႇပူၼ်ႉမႃး ၸဝ်ႈၼႃႈတီႈၶႄႇလႅၼ်လိၼ်ၼႆႉ တိုၼ်းဢမ်ႇပၼ်ၵူၼ်းမိူင်းတႆး ၵၢႆၸမ် လႅၼ်လိၼ်လႃးလႃး ၵူၼ်းၼုမ်ႇမၢၼ်ႈႁဵဝ်းၵေႃႉၼိုင်ႈလၢတ်ႈၼင်ႇၼႆ။
“ယွၼ်ႉမၼ်းပဵၼ်လိၼ်ၶႅၼ်ႈ သွင်မိူင်းလႄႈ သင်ဝႃႈ မိူင်းၾၢႆႇလႂ် တေလွမ်ႉႁူဝ်ႉ ၶဝ်ႈ တေႁဵတ်းသင်ၼႆ တၵ်းလႆႈပွင်ႇလႅင်း ၸူးၵၼ် တင်းသွင်မိူင်းႁႂ်ႈႁူႉ ။ ပေႃးပဵၼ်ၵူၼ်းမႃးၶၢတ်ႇႁဵတ်းၼွင်ၼၼ်ႉၵေႃႈ တေလႆႈပွင်ႇလႅင်းထိုင်ၸဝ်ႈၼွင် ဢွၼ်တၢင်း ၸင်ႇတေၸၢင်ႈႁဵတ်း လႆႈၶႃႈလူး ” ၵူၼ်းပိုၼ်ႉတီႈမူႇၸေႊလၢတ်ႈ။
ၵူၼ်းဝၢၼ်ႈ မၢၼ်ႈႁဵဝ်းတႄႉလၢတ်ႈဝႃႈ လၵ်းသဝ် ဢၼ်မႃးလွမ်ႉဢဝ်တီႈၼွင်ၼၼ်ႉ တိုၵ်ႉမႃးပူၵ်းထူမ်ဝႆႉ လႅပ်ႈတိုၵ်ႉတေမီးမွၵ်ႈ 2-3 ဝၼ်းၼႆႉၵူၺ်း။ သမ်ႉဢဝ်တုင်းၸိူဝ်ႉၸၢတ်ႈၶႄႇ မႃးပၵ်းဝႆႉ ၸွမ်းသဝ်လၵ်းၼၼ်ႉ ထႅင်ႈ။ မိူဝ်ႈဝႃး ဝၼ်းတီႈ 26/7/2021 ယၢမ်းဝၢႆးဝၼ်း ၵူၼ်းမၢၼ်ႈႁဵဝ်း လႆႈပွင်ႇၶၢဝ်ႇၸူးတီႈၽူႈၵွၼ်းၸႄႈဝဵင်းမူႇၸေႊယဝ်ႉသေ ဢွၼ်ၵၼ် ၵႂႃႇထွၼ် ဢွၵ်ႇပႅတ်ႈတုင်းၸိူဝ်ႉၸၢတ်ႈၶႄႇ ၸိူဝ်းၼၼ်ႉယဝ်ႉ ဝႃႈၼႆ။
လွင်ႈၶႄႇလွမ်ႉႁူဝ်ႉၶၢမ်းလႅၼ်လိၼ်ၶဝ်ႈမႃးၼႂ်းမိူင်းတႆးၼႆႉ ၼိုင်ႈပီပဵၼ်ယူႇဢမ်ႇယွမ်း 3-4 ပွၵ်ႈ ။ လႆႈပဵၼ်ပၼ်ႁႃၵၼ်တင်းၵူၼ်းဝၢၼ်ႈမႃးတႃႇသေႇ ။ မိူဝ်ႈပူၼ်ႉမႃးလိူၼ်ၵျုၼ်ႊၵေႃႈ ၶႄႇလွမ်ႉႁူဝ်ႉၶၢမ်းဢဝ်လိၼ်ပီႈၼွင်ႉတႆးမၢၼ်ႈၸေႊ လႄႈ ၵူၼ်းဝၢၼ်ႈဢွၼ်ၵၼ်ၵႂႃႇပူတ်းထွၼ်ပႅတ်ႈႁူဝ်ႉၼၼ်ႉ။
