ၾူၼ်တူၵ်းႁၢဝ်ႈႁႅင်းထပ်းၵၼ်လၢႆဝၼ်း၊ ၼမ်ႉႁူၺ်ႈၼမ်ႉပႃႇ လႆႈတွင်ႈ တူၼ်ႈမႆႉလူမ်ႈ၊ ၼမ်ႉၶိုၼ် ဢၼ်လႆလတ်းၼႂ်းထုင်ႉၵဵင်းတုင် ၵေႃႈၼွင်းထူမ်ႈတူင်ႈႁႆႈ တူင်ႈၼႃး ႁိူၼ်းယေး ၵူၼ်းဝၢၼ်ႈ။

ဝၼ်းတီႈ 21/7/2021 ယၢမ်းၵၢင်ၼႂ် ၵႄးၼမ်ႉၶိုၼ် ၼွင်းလူၼ်ႉၾင်ႇ ထူမ်ႈႁိူၼ်းယေး သူၼ်ႁႆႈၼႃး ၵူၼ်းမိူင်း ၼႂ်းပွၵ်ႉ 4 ပွၵ်ႉ 5 ၊ ၼႂ်းဢိူင်ႇယၢင်းလေႃး၊ ဢိူင်ႇဝတ်ႉသၢဝ်း၊ ဢိူင်ႇၵၢတ်ႇတဝ်ႈလႄႈ ဢိူင်ႇယၢင်းၵဵင် ၸိူဝ်း ၼႆႉ  ၺႃးၽေးၼမ်ႉထူမ်ႈ။

ၵူၼ်းပိုၼ်ႉတီႈ ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ်ၸွမ်းၼႂ်းမူႇဝၢၼ်ႈတႄႉ ယွမ်းလူင်းယဝ်ႉ။ မၢင်ဝၢၼ်ႈၸွမ်းႁိူၼ်းယေး ၼမ်ႉထူမ်ႈ လိုၵ်ႉထိုင်ဢႅင်ႈ ထိုင်ဢႅဝ်ဢေႃႈ။ ယွၼ်ႉၾူၼ် တူၵ်းႁႅင်း တင်းဝၼ်းတင်းၶိုၼ်း ထပ်းၵၼ် မွၵ်ႈ 2 ဝၼ်းၼႆႉဢေႃႈ။ ၼမ်ႉႁူၺ်ႈၼမ်ႉပႃႇၵေႃႈၼွင်း၊ ၼမ်ႉၶိုၼ်ၵေႃႈၼွင်းဢေႃႈ”–  ဝႃႈၼႆ။

ၽူၼ်တူၵ်းၵမ်း တီႈၵဵင်းတုင် ႁႃႇၼႆႉ လႆႈဝႃႈ ၼမ်ႉၼွင်းႁႅင်း လိူဝ်ၵူႈပီ၊ ထူမ်ႈမူႇဝၢၼ်ႈ၊ တူင်ႈၼႃး၊ သူၼ်ၸိူဝ်းၼႆႉ။ ဢၼ်ၺႃးၽေးၼမ်ႉၼွင်းလိူဝ်ပိူၼ်ႈတေႉ ပဵၼ်ၵူၼ်းယူႇ ႁိမ်းၼမ်ႉၶိုၼ်၊ ဝၢၼ်ႈ ဢၼ် ၼမ်ႉၶိုၼ်လႆလတ်း။

“ႁိူၼ်းယေးၵူၼ်ဝၢၼ်ႈၼႆႉ မၢင်ဝၢၼ်ႈ ၶဝ်ႈပိူၵ်ႇ ဢမ်ႇတၼ်းလႆႈသင်၊ မၢင်ႁိူၼ်းသမ်ႉ ၽႃဢုတ်ႇႁူဝ်ႉ ၵူၼ်ႇပင်း၊ ၼွင်ပႃၵေႃႈတႅၵ်ႇ ၊ ၼႂ်းဝၢင်းႁိူၼ်းပဵၼ်ၵူမ်ႇ ပဵၼ်ဢုင်။ တေႃႈလဵဝ်တူင်ႈၼႃႈ၊ ႁိူၼ်းယေး၊ ၶူဝ်းၶွင် လူႉၵွႆၵႃႈႁိုဝ် ပႆႇၸၢင်ႈၵဵပ်းၶေႃႈမုလ်းမၼ်းၶႃႈ”-  ၵူၼ်းပိုၼ်ႉတီႈ ၵဵင်းတုင် ၵေႃႉၼိုင်ႈ သိုပ်ႇလၢတ်ႈ ၼႄၼင်ႇၼႆ။

မၢင်မူႇဝၢၼ်ႈ ႁိူၼ်းယေး ၸၼ်ႉလဵဝ် ထုၵ်ႇၼမ်ႉထူမ်ႈထိုင်ၼႂ်းႁိူၼ်းသေ ဢမ်ႇၸၢင်ႈၼွၼ်း၊ ၸိူဝ်းလႆႈၶၢႆႉၵႂႃႇၼွၼ်း ၸွမ်းဝတ်ႉၸွမ်းၵျွင်း ၵေႃႈမီး။

တင်းၸႄႈဝဵင်းမိူင်းပဵင်းၵေႃႈ ၾူၼ်တူၵ်းႁႅင်း ၼမ်ႉထိူၼ်ႇ ၼမ်ႉပႃႇ လႆတွင်ႈ တူၼ်ႈမႆႉလူမ်ႉ၊ ၶူဝ်ႁၵ်း လႄႈ သဵၼ်ႈတၢင်း ၵဵင်းတုင် – တူၼ်ႈတီး ၶၢတ်ႇပင်း လၢႆတီႈ။ တၢင်းမိူင်းယွင်း ၼႂ်းဢိူင်ႇႁူဝ်ယၢင်း ၼၼ်ႉၵေႃႈ ၼမ်ႉႁူၺ်ႈ၊ ၼမ်ႉဝၢင်း ၼွင်း ထူမ်ႈႁိူၼ်းယေး တူင်ႈၼႃး ၵူၼ်းဝၢၼ်ႈ လူႉၵွႆၸွမ်းတင်းၼမ်။