ၼႂ်းၸႄႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်းၼၼ်ႉ ၾၢႆႇပၢႆးယူႇလီ ၵူတ်ႇထတ်း ႁူပ်ႉႁၼ် ၵူၼ်းတိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ 19 ႁႃႈၵေႃႉ။
မိူဝ်ႈဝၼ်းတီႈ 10/7/2021 ပူၼ်ႉမႃး ၼႆႉ ထူပ်းၵူၼ်းပဵၼ်ၶူဝ်ႊဝိတ်ႉ 19 သီႇၵေႃႉ၊ ဝၼ်းတီႈ 12/7/2021 သမ်ႉၵူတ်ႇထတ်းႁူပ်ႉႁၼ် ထႅင်ႈၵေႃႉၼိုင်ႈ၊ ယၢမ်းလဵဝ် ၵူၼ်းၼႂ်းၸႄႈဝဵင်းလၢႆးၶႃႈ မီးၵူၼ်းၸပ်းတၢင်းပဵၼ် ၶူဝ်ႊဝိတ်ႉ 19 တင်းမူတ်း 5 ၵေႃႉ ၵူၼ်းမိူင်းဢွၼ်ၵၼ်ၾၢင်ႉယူႇ ၾၢင်ႉၵိၼ်။
ၸၢႆးၵွင်ၶမ်း ၽူႈတႅၼ်းပႃႇတီႇႁူဝ်သိူဝ် ၸႄႈဝဵင်းလၢႆးၶႃႈ ဢၼ်ဢွင်ႇပေႉပၢင်လိူၵ်ႈတင်ႈ မိူဝ်ႈပီ 2020 ၼၼ်ႉ လၢတ်ႈတီႈၽူႈ တွႆႇႁွၵ်ႈဝႃႈ – “ မိူဝ်ႈၼႆႉ လႆႈလၢတ်ႈတေႃႇ ပီႈၼွင်ႉၵူၼ်း ပဵၼ် 4 ၵေႃႉ။ ၵူၼ်းထဝ်ႈ ၵေႃႉၼိုင်ႈ ဢႃယု 74 ပီၼၼ်ႉၵေႃႈ ဢမ်ႇလႆႈမႆႈၸႂ်။ ယူႇလီၵိၼ်ဝၢၼ်မႃးယဝ်ႉၶႃႈ။ ၵေႃႉထူပ်းႁၼ် မိူဝ်ႈဝႃးၼၼ်ႉၵေႃႈ ယူႇလီၵိၼ်ဝၢၼ်ယူႇၶႃႈ”– ဝႃႈၼႆ။
ၵူၼ်းတိတ်းၸပ်းထႅင်ႈ 4 ၵေႃႉၼၼ်ႉတႄႉပဵၼ်ၵူၼ်းဝၢၼ်ႈႁူဝ်ၼွင် ပွၵ်ႉ 2 ၼႂ်းၸႄႈဝဵင်းလၢႆးၶႃႈ ပဵၼ် ၽူႈၸၢႆး 1 ၵေႃႉလႄႈ ၽူႈယိင်း 3 ၵေႃႉ ။ ၵူတ်ႇထတ်းထူပ်းႁၼ်ၸိူဝ်ႉမႅင်းတၢင်းပဵၼ်တီႈၸိူဝ်းၶဝ် မိူဝ်ႈဝၼ်းတီႈ 10/7/2021 ။
ယၢမ်းလဵဝ် ႁိူၼ်းယေး ၵူၼ်းပဵၼ် ၸိူဝ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 ၼႂ်းဝဵင်းလၢႆးၶႃႈ ၸိူဝ်းၼၼ်ႉ ၾၢႆႇပၢႆးယူႇလီပိၵ်ႉဢိုတ်း Lockdown ဝႆႉ ၸူဝ်ႈၶၢဝ်း။
ဢိင်ၼိူဝ် တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းမႃးႁၢဝ်ႈႁႅင်း၊ ဢၼ်ၽႄႈၸပ်းၼမ်လိူဝ်ပိူၼ်ႈ ပဵၼ် မူႇၸေႊ၊ ၼမ်ႉၶမ်း၊ လႃႈသဵဝ်ႈ၊ လၢဝ်ႇၵၢႆး ၵျွၵ်ႉမႄး၊ ၼွင်ၶဵဝ် ၊ တၢင်းမိူင်းတႆး ပွတ်းၸၢၼ်းသမ်ႉ ဢုမ်ႇပဝ်း/ဢွင်ႇပၢၼ်း တၢင်ႇၸႄႈဝဵင်းၵေႃႈ ၼမ်လႄႈၵႄႇ ၸပ်းမိူၼ်ၵၼ်ၵူႈဝဵင်း။ ၼႂ်းမိူင်းတႆး ၵူၼ်းၸပ်းတင်းပဵၼ်ၶူဝ်ႊဝိတ်ႉ 19 တင်းမူတ်းမီး 3000 ပၢႆ။ လူႉတၢႆမီး 70 ပၢႆယဝ်ႉလႆႈႁူႉၼင်ႇၼႆ။
