ၼႂ်းလိူၼ်ၵျုႊလၢႆႊၼႆႉၵူၺ်း တီႈဝဵင်းပၢင်လူင် ၸိုင်ႈတႆးပွတ်းၸၢၼ်း ၵူတ်ႇထတ်း ႁၼ်ၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 မီးၵႂႃႇ 15 ၵေႃႉ၊ ၼႂ်းၼၼ်ႉ ပႃး သင်ၶၸဝ်ႈတူၼ်ၼိုင်ႈ။
ဝၼ်းတီႈ 12/7/2021 မိူဝ်ႈဝႃးၼႆႉ ထဝ်ႈၸၢႆး ဢႃယု 62 ပီ ယူႇပွၵ်ႈ 4 တုမ်ႇမူဝ် ၵေႃႉၼိုင်ႈ၊ ၸဝ်ႈၸၢင်း ဢႃယု 22 ပီ ဝတ်ႉလွႆတပ်ႉ ၼႂ်းဢိူင်ႇပၢင်မူင်ႈ တူၼ်ၼိုင်ႈ ၸပ်းတၢင်းပဵၼ် ၶူဝ်ႊဝိတ်ႉ 19 လႄႈ ယၢမ်းလဵဝ် ၼႂ်းဝဵင်းပၢင်လူင် ၵူၼ်းၸပ်း ၶူဝ်ႊဝိတ်ႉ 19 မီး ၵႂႃႇ 15 ၵေႃႉ။
ၽူႈၶဝ်ႈၸုမ်းၶွမ်ႊမတီႊၾၢႆႇၵႅတ်ႇၶႄႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 တီႈပၢင်လူင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈဝႃးၼႆႉ ထူပ်းႁၼ်ထႅင်ႈ 2 ၵေႃႉ ၽူႈၸၢႆးၵေႃႉဢႃယု 62 ၼၼ်ႉ လုၵ်ႉၼမ်ႉၸၢင်မႃး။ ၸဝ်ႈၸၢင်း ဢႃယု 22 ၼၼ်ႉသမ်ႉ လုၵ်ႉဝဵင်းလိူဝ်ႇမႃး ၶႃႈ။ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉ တီႈ ႁူင်းယႃယဝ်ႉၶႃႈ”- ဝႃႈၼႆ။
ယၢမ်းလဵဝ် ၼႂ်းဝဵင်းပၢင်လူင် ၸပ်းၶူဝ်းဝိတ်ႉ 19 ဝႆႉ 10 ၵေႃႉ၊ ဢၼ်လုၵ်တၢင်ႇဝဵင်းသေ ပွၵ်ႈမႃး ပၢင်လူင်သမ်ႉ 5 ၵေႃႉ။ ၼႂ်း 15 ၵေႃႉၼၼ်ႉ ယူႇတီႈ ႁူင်းယႃ ပၢင်လူင်ၽွင်ႈသေ ၵမ်ႈၽွင်ႈသမ်ႉ သူင်ႇႁူင်းယႃ လွႆလႅမ် သေ ယူတ်းယႃဝႆႉ ဝႃႈၼႆ။
တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်း လႄႈ ပွၵ်ႉယွမ်ႇ/ဝၢၼ်ႈ/ဢိူင်ႇ ၼႂ်းဝဵင်းပၢင်လူင် ၵမ်ႈၽွင်ႈ Lockdown ႁၢမ်ႈၵူၼ်းၶဝ်ႈဢွၵ်ႇၵႂႃႇမႃး၊ ဢၼ်ပၼ်ပိုတ်ႇၶၢႆ ႁၢၼ်ႉယႃႈယႃ လႄႈ ႁၢၼ်ႉတၢင်းၶၢႆ ၶွင်ၵိၼ် ၶွင်ယမ်ႉၵူၺ်း၊ ၵၢတ်ႇလူင် ပၢင်လူင် ၵေႃႈ ပိၵ်ႉႁပ်းမႃး တင်ႈတႄႇႁူဝ်လိူၼ် ၵျူႊလၢႆၼႆႉ။
