ယၢမ်းလဵဝ် ၼႂ်းမိူင်းတႆး မီးၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 ဢမ်ႇယွမ်း ၼိုင်ႈႁဵင်ယဝ်ႉ လူႉတၢႆ မွၵ်ႈ 20 ၵေႃႉ။
တႄႇဢဝ်ၼႂ်းလိူၼ်ၵျုၼ်ႊ 2021 ၼႆႉမႃး တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်း ၼႂ်းမိူင်းတႆး သၢမ်ပွတ်းတွၼ်ႈမႃးႁၢဝ်ႈႁႅင်း ယၢမ်းလဵဝ် မီးၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 ဢမ်ႇယွမ်း ႁဵင် လူႉတၢႆ မွၵ်ႈ 20 ၵေႃႉ ၼႆယဝ်ႉ။
ၼႂ်းၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 တင်းမူတ်းမီး 6 ၵေႃႉ။ ၼႂ်း 6 ၵေႃႉၼၼ်ႉ မိူဝ်ႈၼႆႉ ဝၼ်းတီႈ 2/7/2021 ယၢမ်းၵၢင်ၼႂ် ၼၢင်းယိင်း ဢႃယု မွၵ်ႈ 35 ပီ ၵေႃႉၼိုင်ႈ လူႉတၢႆ ။
မိူဝ်ႈဝႃး ဝၼ်းတီႈ 1 ၼႂ်းၸႄႈဝဵင်းလႃႈသဵဝ်ႈ ၵူၼ်းပဵၼ်ၶူဝ်ႊဝိတ်ႉ 19 လူႉတၢႆ 7 ၵေႃႉ ။ ၵူတ်ႇထတ်းႁၼ်ထႅင်ႈ ၵူၼ်း တိတ်းၸပ်းၸိူဝ်ႉမႅင်း 73 ၵေႃႉ။ ယၢမ်းလဵဝ် ၼႂ်းၸႄႈဝဵင်းလႃႈသဵဝ်ႈၼႆႉ ၵူၼ်းပဵၼ်ၶူဝ်ႊဝိတ်ႉ 19 လူႉတၢႆယဝ်ႉ 12 ၵေႃႉ။ ၵူၼ်းတိတ်းၸပ်းၸိူဝ်ႉမႅင်း သမ်ႉ မီးၵႂႃႇ 482 ၵေႃႉယဝ်ႉ။
ၼွၵ်ႈလိူဝ်ၼၼ်ႉ ၼႂ်းၸႄႈဝဵင်းတႃႈၶီႈလဵၵ်းၵေႃႈ မိူဝ်ႈၼႆႉ ဝၼ်းတီႈ 2 ယၢမ်းၵၢင်ဝၼ်း 12 မူင်း ၵူတ်ႇထတ်း ထူပ်းႁၼ် ၵူၼ်းတိတ်း ၸပ်းၸိူဝ်ႉမႅင်း ၶူဝ်ႊဝိတ်ႉ 19 တင်းမူတ်း 14 ၵေႃႉ ႁူမ်ႈၵၼ်တင်းမူတ်းမီးၵႂႃႇ 30 ၵေႃႉယဝ်ႉ။
ၼႂ်းဝဵင်းၵျွၵ်ႉမႄးသမ်ႉ တေႃႇထိုင်ဝၼ်းတီႈ 1 ၼႆႉ ၵူၼ်းတိတ်းၸပ်း ၸိူဝ်ႉမႅင်းမီးၵႂႃႇ 63 ၵေႃႉ ။ ၸႄႈဝဵင်း သီႇပေႃႉသမ်ႉ ၼႂ်းဝၼ်းတီႈ 2 ၼႆႉၵူၺ်း ထူပ်းႁၼ်ထႅင်ႈ 12 ၵေႃႉ ။
ၼႂ်းၸႄႈဝဵင်းၼမ်ႉၶမ်းၵေႃႈ တေႃႇထိုင်မိူဝ်ႈဝႃး ဝၼ်းတီႈ 1 မီးၵူၼ်းတိတ်းၸပ်း ၶူဝ်ႊဝိတ်ႉ 19 တင်းမူတ်း 50 ပၢႆယဝ်ႉ လူႉ တၢႆ 1 ၵေႃႉ။ ၼွၵ်ႈလိူဝ်ၼၼ်ႉ ၸႄႈဝဵင်းၼွင်ၶဵဝ်၊ တၢင်ႉယၢၼ်း၊ ၵဵင်းတုင် ထူပ်းႁၼ် 5 ၵေႃႉ လႄႈ မိူင်းၽျၢၵ်ႈ 1 ၵေႃႉ ၸဵမ် ၸိူဝ်းၼႆႉ။
ဢိင်ၼိူဝ် လွင်ႈတၢင်းပဵၼ်ၶူဝ်ႊဝိတ်ႉ 19 ၼႆႉသေ ယူႇတီႈႁွင်ႈၵၢၼ်ပၢႆးယူႇလီ ၾၢႆႇတႂ်ႈၵုမ်းၵမ် ၶွင်ႇသီႇသိုၵ်းမၢၼ်ႈ ပိုၼ်ၽၢဝ်ႇဢွၵ်ႇမႃး မိူဝ်ႈဝၼ်းတီႈ 27/6/2021 ၼၼ်ႉဝႃႈ ၼႂ်းၸႄႈဝဵင်းလႃႈသဵဝ်ႈ တင်း ၸႄႈဝဵင်းလၢဝ်ႇၵၢႆး ႁႂ်ႈ ၵူၼ်းမိူင်း ယူႇၼႂ်းႁိူၼ်း Stay at Home ၽႂ်မၼ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ