တႆးလႃႈသဵဝ်ႈ 2 ၵေႃႉၽူဝ်မေးၵႂႃႇႁဵတ်းၵၢၼ်မိူင်းထႆး ၺႃးၵႃးၽႃႇလူႉတၢႆ ၽွင်းတေၵႂႃႇဢႅဝ်ႇႁႃလၢၼ် တီႈဝဵင်းလမ်းပုၼ်း မိူင်းထႆး တွၼ်ႈၼိူဝ်။

ၸၢႆးယွၼ်း ဢႃယု 24 ပီ တင်းၼၢင်းၸၢမ်ႇ ဢႃယု 22 ပီ 2 ၵေႃႉၽူဝ်မေး ၵူၼ်းလႃႈသဵဝ်ႈ ႁဵတ်းၵၢၼ် ႁူင်းၵၢၼ်ထူဝ်ႇၽူး (ႁူင်းငၢၼ်းတဝ်ႉႁူႉ) တီႈဝဵင်းမႄႈဝၢင်း ၸႄႈတွၼ်ႈၵဵင်းမႆႇ တေဢွၼ်ၵၼ်ၵႂႃႇဢႅဝ်ႇႁႃလၢၼ် တီႈဝဵင်းလမ်းပုၼ်းၼၼ်ႉ ၺႃးၵႃးၽႃႇၼိူဝ်သဵၼ်ႈတၢင်း ၼႃႈႁူင်းႁဵၼ်းၿႆးၿုၼ်ႊ ဝဵင်းလမ်းပုၼ်း မိူင်းထႆး တွၼ်ႈၼိူဝ် မိူဝ်ႈဝၼ်းတီႈ 23/02/2018 ။

ၽေးၵိုင်ႉၵၢင်ႉပွၵ်ႈၼႆႉ ၵေႃႉပဵၼ်ၽူဝ်လူႉတၢႆထင်တီႈ ၵေႃႉပဵၼ်မေးတႄႉ လူႉတၢႆၼိူဝ်ၵႃးၽွင်းသူင်ႇတူဝ်ၵႂႃႇႁူင်းယႃ ပီႈၼွင်ႉဢူၺ်းၵေႃႉ ဢဝ်ၶၢပ်ႈတူဝ်လုၵ်ႉတီႈႁူင်းယႃ မႃးဝႆႉတီႈဝတ်ႉဝၢၼ်ႈၸႅမ်ႇ မိူဝ်ႈဝၼ်းတီႈ 26 သေ ပူၼ်ႉတူဝ် ၼႂ်းဝၼ်းတီႈ 01/03/2018 ။

ၸၢႆးၵျေႃႇ ၵေႃႉပဵၼ်ၼႃႉၼၢင်းၸၢမ်ႇ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၵူၼ်းႁေႃႈၵႃးၽႃႇၶႃ သွင်ၵေႃႉၼႆႉ ပဵၼ်ၸၢဝ်းထႆး ၶဝ်ၵေႃႈယွမ်းႁပ်ႉယူႇ ၶဝ်လၢတ်ႈႁဝ်းၶႃႈတႄႉဝႃႈ တေသၢႆႈပၼ် ၵႃႈႁူဝ် ၼိုင်ႈၵေႃႉလႂ် ဢမ်ႇယွမ်း 500,000 ( 5 သႅၼ်) ၿၢတ်ႇ ၵူၺ်းၵႃႈ မိူဝ်ႈလဵဝ်တႄႉတိုၵ်ႉပၼ် 20000 (သွင်မိုၼ်ႇ) ၿၢတ်ႇၵူၺ်း ဢၼ်ၵိုတ်းလိူဝ်ၼၼ်ႉ တေလႆႈထႅင်ႈႁိုဝ် ဢမ်ႇလႆႈၼၼ်ႉတႄႉ ပႆႇႁူႉ။ တေၵႂႃႇဢုပ်ႇဢူဝ်း ၵၼ်တီႈႁူင်းပလိၵ်ႈထႅင်ႈ ” ဝႃႈၼႆ။

သိုပ်ႇလၢတ်ႈထႅင်ႈဝႃႈ – “ ပီႈၼွင်ႉတႆး ၸိူဝ်းမႃးႁဵတ်းၵၢၼ်မိူင်းပိူၼ်ႈၼႆႉ ႁေႃႈရူတ်ႉႁေႃႈၵႃးႁႂ်ႈဢွၼ်ၵၼ်ဝႆႉသတိၼမ်ၼမ် လိူဝ်ၼၼ်ႉႁႂ်ႈဢွၼ်ၵၼ်ႁဵၼ်းႁူႉ လွင်ႈပၵ်းပိူင်ဝၢၼ်ႈမိူင်းပိူၼ်ႈ ႁဝ်းတေလႆႈ ႁူႉၶိုတ်းတၼ်းပိူၼ်ႈ ယွၼ်ႉဝႃႈမၢင်ၵေႃႉ ၺႃးၵႃးၽႃႇသေ တၢႆပႅတ်ႈလၢႆလၢႆၵေႃႈယၢမ်ႈမီးမႃး ” ဝႃႈၼႆ။

ၸၢႆးယွၼ်းၼႆႉ ဢႃယု 24 ပီ ပဵၼ်လုၵ်ႈ လုင်းၸၢႆး + ပႃႈဢိင်ႇ ယူႇဝဵင်းလႃႈသဵဝ်ႈ ၊ ၼၢင်းၸၢမ်ႇသမ်ႉ ဢႃယုလႆႈ 22 ပီ ပဵၼ်လုၵ်ႈယိင်း လုင်းဢွင်ႇ + ပႃႈၼိင်ႈ ယူႇဝဵင်းလႃႈသဵဝ်ႈၼင်ႇၵဝ်ႇ တင်းသွင် ၵေႃႉတႄႇၼႃႈႁိူၼ်းႁူမ်ႈၵၼ်လႆႈ မွၵ်ႈ 2ပီ ပႆႇမီးလုၵ်ႈ ၶဝ်ႈၵႂႃႇႁဵတ်းၵၢၼ်တီႈမိူင်းထႆး လႆႈ 2 ပီပၢႆ ၼႆယဝ်ႉ။

ထၢႆႇၶႅပ်းႁၢင်ႈ Sai Jame Hsenwi