ၶွၵ်ႈလူင် ဢၼ်မီးၼႂ်းပွၵ်ႉ 12 တီႈဝဵင်းလႃႈသဵဝ်ႈၼၼ်ႉ ၵူတ်ႇထတ်းႁူပ်ႉႁၼ် ၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 သၢမ်ၵေႃႉ ဝႃႈၼႆ။
မိူဝ်ႈဝၼ်းတီႈ 23/6/2021 ယၢမ်းၵၢင်ၶမ်ႈ ယူႇတီႈၽူႈၵွၼ်းၶွၵ်ႈၶင် ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼႅတ်ႈၶၢႆႉဢွၵ်ႇၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 ၼႂ်းၶွၵ်ႈ 3 ၵေႃႉၼၼ်ႉ ၵႂႃႇယူႇဝႆႉႁင်းၵူၺ်းထႅင်ႈ တီႈၼိုင်ႈ။
ဢိင်ၼိူဝ် လွင်ႈၼႆႉသေ ယူႇတီႈၸိူဝ်ႉၶိူဝ်းပီႈၼွင်ႉ မုင်ႉႁေႃႁိူၼ်း ၵူၼ်းတူၵ်းၶွၵ်ႈ ၸိူဝ်းၼၼ်ႉ မႆႈၸႂ် ၵူဝ်တၢင်းပဵၼ်ၶူဝ်ႊ ဝိတ်ႉ 19 ၽႄႈလၢမ်းတိတ်းၸပ်းၵၼ် ၼႂ်းၶွၵ်ႇၶင်ထႅင်ႈ။
တႄႇဢဝ် ဝၼ်းတီႈ 1/6/2021 တေႃႇထိုင် ဝၼ်းတီႈ 23/6/2021 ၼႆႉ တီႈဝဵင်းလႃႈသဵဝ်ႈ မီးၵူၼ်းတိတ်းၸပ်းၸိူဝ်ႉမႅင်း ၶူဝ်ႊ ဝိတ်ႉ 19 မီးထိုင် 200 ပၢႆယဝ်ႉ။ ၼႂ်းၼၼ်ႉ လူႉတၢႆယွၼ်ႉတၢင်းပဵၼ်ၼႆႉ တေမီး 5 ၵေႃႉယဝ်ႉ ဝႃႈၼႆ။
တၢင်းပဵၼ်ၶူဝ်ႊဝိတ်ႉ 19 ၼႆႉ တင်ႈတႄႇလၢမ်းၽႄႈၶဝ်ႈမႃးၼႂ်းမိူင်းႁူမ်ႈတုမ် မိူဝ်ႈပီဢွၼ် 2020 တေႃႇထိုင် လိူၼ်မေႊ 2021 ၼႆႉ ဢမ်ႇၽႄႈလၢမ်းထိုင်ဝဵင်းလႃႈသဵဝ်ႈႁၢဝ်ႈႁႅင်းပဵင်းၵမ်းၼႆႉသေၵမ်း။ ဝၢႆးလင် ၾၢႆႇပၢႆးယူႇလီ ဢွၼ်ၵၼ်ႁဵတ်း CDM ဢမ်ႇမီးၵူၼ်းပႂ်ႉၵူတ်ႇထတ်းပၼ်လီလီ ၊ ဢမ်ႇမီးၽႅၼ်ၵၢၼ် ၵႅတ်ႇၶႄႁႄႉၵင်ႈလီလီလႄႈ တင်ႈဢဝ်ဝၼ်းတီႈ 1 လိူၼ်ၵျုၼ်ႊၼႆႉမႃး ၶၢဝ်းတၢင်း 20 ဝၼ်းပၢႆမီးၵူၼ်းတိတ်းၸပ်းၶူဝ်းဝိတ်ႉ 200 ပၢႆ။
