ႁႅင်းၵၢၼ်တႆး  ႁဵတ်းၵၢၼ်တီႈႁူင်းဢိတ်ႇလိၵ်ႈ ၼႂ်းဝဵင်းၵဵင်းမႆႇ ၸိုင်ႈထႆး ၺႃးၶိူင်ႈၸၢၵ်ႈဢိတ်ႇၸေႈ ၸၼ်ဢိတ်ႇ ပႃးမိုဝ်း  လႆႈတႅပ်းပႅတ်ႈ ၶႅၼ်ၾၢႆႇၶႂႃ။

မိူဝ်ႈဝၼ်းတီႈ 26/02/2018 ၸၢႆးသၢႆလိူၼ် ဢႃယု 32 ပီ  ႁဵတ်းၵၢၼ်တီႈႁူင်းဢိတ်ႇလိၵ်ႈ တီႈဢိူင်ႇၼွင်ပႃႇၶင်ႉဝဵင်းၵဵင်းမႆႇ ၺႃးၶိူင်ႈၸၢၵ်ႈလုတ်ႇဢဝ်မိုဝ်း ၾၢႆႇၶႂႃၶဝ်ႈၵႂႃႇပႃးၼႂ်းၶိူင်ႈၸၢၵ်ႈ ။

သိုဝ်ႇၶၢဝ်ႇ thairath ပိုၼ်ၽၢဝ်ႇဝႃႈ –   ၸဝ်ႈၼႃႈတီႈၾၢႆႇၸွႆႈၵူၼ်းထူပ်းၽေး ႁိပ်ႈၼႅတ်ႈ ၵႂႃႇၸွႆႈထႅမ် ။  ၵူၺ်းၵႃႈၶတ်းၸႂ်တႅပ်းၶိူင်ႈၸၢၵ်ႈဢမ်ႇလႆႈလႄႈ ၾၢႆႇၸဝ်ႈၼႃႈတီႈၸင်ႇ တႅပ်းတတ်း  တႅပ်းပႅတ်ႈၶႅၼ် မၼ်းၸၢႆး ၾၢႆႇၶႂႃ ၊ တင်ႈဢဝ်ငွၵ်းသွၵ်ႇလူင်း ။ ယွၼ်ႉဝႃႈ ပေႃးဢမ်ႇတႅပ်းပႅတ်ႈၼႆ  လိူတ်ႈၸၢင်ႈဢွၵ်ႇၼမ်ပူၼ်ႉသေ ၸၢင်ႈလူႉတၢႆလႆႈ – ဝႃႈၼႆ။

ၸၢႆးၶမ်း  ၵူၼ်းယၢမ်ႈႁဵတ်းၵၢၼ်တီႈႁူင်းဢိတ်ႇလိၵ်ႈ လၢတ်ႈဝႃႈ – “ ႁဵတ်းၵၢၼ်ႁူင်းၽိမ်း ႁူင်းဢိတ်ႇလိၵ်ႈၼႆႉ ၽေးၼမ်ယူႇႁင်းမၼ်း။ ငဝ်ၼွၼ်းၵေႃႈဢမ်ႇလႆႈ၊ သႂ်ႇသိူဝ်ႈယူင်ႉၵေႃႈဢမ်ႇလႆႈ ၊ မိူၼ်ႇၵေႃႈဢမ်ႇလႆႈ၊လူဝ်ႇတႃလႅတ်းမိုဝ်းလႅတ်း တူင်ႉတိုၼ်ႇယူႇတႃႇသေႇ၊ ပေႃးႁဝ်းမိူၼ်ႇ ဢမ်ႇၼၼ်လိုမ်းတူဝ် ဢိတ်းၼိုင်ႈၵူၺ်းၵေႃႈ ၶိူင်ႈမၼ်း ၸၢင်ႈၸၼ်ပႃးမိုဝ်းႁဝ်းၵႂႃႇယဝ်ႉ။ ၵွပ်ႈၼၼ် ၸိူဝ်းႁဵတ်းၵၢၼ်ႁူင်းၽိမ်း၊ ႁူင်းဢိတ်ႇလိၵ်ႈၼႆႉ ႁႂ်ႈဢွၼ်ၵၼ်ၾၢင်ႉ သတိၼမ်ၼမ်သေၵမ်း ။ မၼ်းၸၢင်ႈပဵၼ်ၽေး ၵိုင်ႉၵၢင်ႉငၢႆႈၼႃႇ” ဝႃႈၼႆ ။

ဝၢႆးသေ ၸဝ်ႈၼႃႈတီႈလႆႈၸွႆႈထႅမ်မၼ်းၸၢႆးဢွၵ်ႇတီႈ ၶိူင်ႈၸၢၵ်ႈယဝ်ႉၼၼ်ႉ  လႆႈႁိပ်ႈၼႅတ်ႈသူင်ႇၵႂႃႇ  ႁူင်းယႃပႃႇငႄႉ (ၼၶွၼ်းၽိင်း) ပိူဝ်ႈသိုပ်ႇယူတ်းယႃၵႂႃႇ ဝႃႈၼႆ။ မၼ်းၸၢႆးပဵၼ်ၵူၼ်းဝဵင်းလႂ် ၼႂ်းမိူင်းတႆး ပဵၼ်လုၵ်ႈလၢၼ်ၽႂ်ၼႆၼၼ်ႉတႄႉ ပႆႇၸၢင်ႈတိတ်းတေႃႇတွင်ႈထၢမ်တူၺ်းလႄႈ ပႆႇလႆႈႁူႉ။