ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ တင်း ၸုမ်းသိုၵ်းဢူၺ်းလီ ပွတ်းႁွင်ႇ ပဵၼ်ပၢင်တိုၵ်းၵၼ် တီႈ ႁိမ်းလွႆသူႉၶိၼ်းတွင်ႇ ၼႂ်းၸႄႈဝဵင်း ၵူတ်ႉၶၢႆ ။
မိူဝ်ႈဝႃး ဝၼ်းတီႈ 21/6/2021 ယၢမ်းႁူဝ်ၶမ်ႈ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ တင်း ၸုမ်း ဢူၺ်းလီ ပွတ်းႁွင်ႇ ပဵၼ်ပၢင်တိုၵ်း ၵၼ် ၼႂ်းၵႄႈသူႉၶိၼ်းတႃႇလႄႈ မၢၼ်ႈလူင် ၸႄႈ ဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၼႆယဝ်ႉ။
ၵူၼ်းပိုၼ်ႉတီႈ ၵူတ်ႉၶၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶဝ် ပဵၼ်ပၢင်တိုၵ်းၵၼ် ၵူၺ်းၵႃႈ သိုၵ်းမၢၼ်ႈ တင်းၸုမ်းဢူၺ်းလီ။ ၼႂ်းၸုမ်းဢူၺ်းလီၼၼ်ႉ ပဵၼ်ၸုမ်းလႂ်တႄႉ ဢမ်ႇႁူႉလီ ဢၼ်လႆႈပဵၼ်ပၢင်တိုၵ်းတင်းသိုၵ်းမၢၼ်ႈ ၼၼ်ႉ”- ဝႃႈၼႆ။
တီႈပၢင်တိုၵ်းၼၼ်ႉ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုဝ်း ၵွင်ႈလူင် သႂ်ႇၸုမ်းဢူၺ်းလီ ပဵၼ်လၢႆၵမ်း ဝႃႈၼႆ။
“လႆႈငိၼ်းဝႃႈ သိုၵ်းမၢၼ်ႈတင်းသိုၵ်းၶၢင်ၼႆဝႃႇ လွင်ႈၼႆႉႁဝ်းၶႃႈ ပႆႇႁူႉတႅတ်ႈတေႃးလီ။ ယၢမ်းလဵဝ် ၸွမ်းသဵၼ်ႈတၢင်းလူင်၊ ၸွမ်းလွႆသၢမ်သိပ်း ၼမ်ႉၵူတ်ႉ ၸိူဝ်းၼႆႉ သိုၵ်းမၢၼ်ႈဢဵၼ်ႁႅင်း မွၵ်ႈ 70 ႁွၼ်ႈထဝ်ႇၵႂႃႇမႃးႁၢဝ်ႈႁႅင်း ၶဝ်ပႆႇႁတ်းၶဝ်ႈ တၢင်းၼႂ်းထိူၼ်ႇတႄႉတႄႉ ပေႃးၶဝ်ႈၵႂႃႇတႄႉ ပၢင်တိုၵ်းတိုၼ်းတေပဵၼ်ႁႅင်းၶႃႈယဝ်ႉ။ ယွၼ်ႉတၢင်းၼႂ်းထိူၼ်ႇၸိူဝ်းၼၼ်ႉ ပဵၼ်ၸုမ်းဢူၺ်းလီၶဝ်ယူႇဝႆႉလႄႈ”- ၵူၼ်းၼုမ်ႇ ၵူတ်ႉၶၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ယၢမ်းလဵဝ် ၸုမ်းယိပ်းၵွင်ႈၵၢင်ႇ ဢၼ်တူင်ႉၼိုင် ယူႇဝႆႉတၢင်းပွတ်းၵူတ်ႉၶၢႆၼၼ်ႉ သမ်ႉ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ၊ သိုၵ်း ၶၢင် KIA သိုၵ်းၵူဝ်းၵၢင်ႉMNDAA ၊ သိုၵ်းရ ၶႅင်ႇ AA လႄႈ သိုၵ်းတဢၢင်း TNLA ၸိူဝ်းၼႆႉ။
