ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ၶဝ်ႈတီႉၺွပ်း လုၵ်ႈၸုမ်းပရႁိတ တီႈၵျွၵ်ႉမႄး ၵေႃႉၼိုင်ႈ ထိုင်ယၢမ်းလဵဝ်ပႆႇပွႆႇတူဝ် ဝႃႈၼႆ။
မိူဝ်ႈဝၼ်းတီႈ 19/6/2021 ယၢမ်းၵၢင်ၶိုၼ်းလိုၵ်း မွၵ်ႈ 12 မူင်းၼၼ်ႉ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ တင်း ပလိၵ်ႈ/ ယေး ႁူမ်ႈၵၼ် ၶဝ်ႈတီႉၺွပ်း ၸၢႆးၵျေႃႇတဵင်း ဢႃယု မွၵ်ႈ 48 ပီ တီႈပွၵ်ႉ 8 ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ဢိင်ၼိူဝ်လွင်ႈ တၢင်းသင်သေ ၶဝ်ႈတီႉၺွပ်းၵႂႃႇဢၼ်ဝႃႈၼၼ်ႉ ဢမ်ႇလႆႈႁူႉ ၼႆယဝ်ႉ။
ၽူႈၸွႆႈထႅမ် တူင်ႇဝူင်းၵူၼ်း ပရႁိတ ၵျွၵ်ႉမႄး ၵေႃႉၼိုင်ႈ လၢတ်ႈတီႈၽူႈတွႆႇ ႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈသိုၼ်းၼႆႉ သိုၵ်းမၢၼ်ႈ မႃးတီႉၺွပ်းၽႅဝ်ႁိူၼ်းမၼ်း။ သိုၵ်းမၢၼ်ႈၶဝ်ဝႃႈ မီးလွင်ႈလူဝ်ႇတွင်ႇထၢမ်ၼႆသေ တီႉၵႂႃႇ တေႃႇ ထိုင်ယၢမ်းလဵဝ် ပႆႇပွႆႇတူဝ်မႃး။ ထၢင်ႇတႄႉ တေၵဵဝ်ႇၵပ်းလူၺ်ႈလွင်ႈၼႄၵၢင်ၸႂ်ႁိုဝ် ဢမ်ႇႁူႉ။ ၵူၺ်းၵႃႈ မၼ်းၸၢႆးၵေႃႈ ဢမ်ႇ ပေႃးၵႂႃႇတူင်ႉၼိုင်ၵႃႈႁိုဝ် တီႈၼႂ်းပၢင်ၼႄၵၢင်ၸႂ်ၼၼ်ႉ။ ၼိုင်ႈလိူၼ်ၼိုင်ႈပွၵ်ႈ ဢမ်ႇၼၼ် သွင်လိူၼ်ၼိုင်ႈပွၵ်ႈ ပေႃးၵႂႃႇ ၵေႃႈ တေၵႂႃႇၼႂ်းဝၼ်းဢၼ်ၵူၼ်းမိူင်းၶွၼ်ႈၵၼ်သေဢွၵ်ႇၼႄၵၢင်ၸႂ် ၵူၺ်း”- ဝႃႈၼႆ။
ၸၢႆးၵျေႃႇတဵင်း ဢႃယု မွၵ်ႈ 48 ပီ ပဵၼ်ၵူၼ်းပွၵ်ႉ 8 ဝဵင်းၵျွၵ်ႉမႄး။ မၼ်းၸၢႆး ပဵၼ်လုၵ်ႈၸုမ်းထမ်ႇမ ရၼိၵ ၸွႆႈထႅမ်တူင်ႇဝူင်းၵူၼ်းၵေႃႉၼိုင်ႈ လႆႈႁူႉၼင်ႇၼႆ။
ၼႂ်းၸႄႈဝဵင်းၵျွၵ်ႉမႄးၼႆႉ တင်ႈတႄႇ ၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး တေႃႇထိုင်ယၢမ်းလဵဝ် ၵူၼ်းမိူင်း/ ၵူၼ်းၼုမ်ႇ ထုၵ်ႇၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ တီႉၺွပ်းၵႂႃႇ တေမီးမွၵ်ႈ 16 ၵေႃႉယဝ်ႉ။ မိူဝ်ႈဝၼ်းတီႈ 31/5/2021 ပူၼ်ႉမႃး ၼၼ်ႉၵေႃႈ ၶွင်ႇသီႇသိုၵ်းမၢၼ်ႈ ယိုဝ်းၵွင်ႈသႂ်ႇ ၼႂ်းၾုင်ၵူၼ်းၼႄၵၢင်ၸႂ် တိူဝ်ႉၺႃး ၵူၼ်းၼုမ်ႇ ၸိုဝ်ႈႁွင်ႉ ၸၢႆးဢွင်ႇၶၢႆႇ ဢႃ ယုမွၵ်ႈ 21 ပီ လႆႈမၢတ်ႇၸဵပ်း။
ၼႂ်းၶၢဝ်းတၢင်း 140 ဝၼ်း တေႃႇထိုင်ဝၼ်းတီႈ 20/6/2021 ယၢမ်းၵၢင်ၶမ်ႈ 7 မူင်းၼႆႉ ယူႇတီႈ ၸုမ်းၸွႆႈထႅမ်ၵူၼ်းတူၵ်းၶွၵ်ႈ ၵၢၼ်မိူင်း မိူင်းမၢၼ်ႈ AAPP ပိုၼ်ၽၢဝ်ႇဢွၵ်ႇဝႆႉတႄႉ ၵူၼ်းမိူင်း/ ၵူၼ်းၼုမ်ႇ ထုၵ်ႇၶွင်ႇသီႇသိုၵ်းမၢၼ်ႈ ၶႃႈႁႅမ်တၢႆ မီး 871 ၵေႃႉ။ ထုၵ်ႇတီႉၺွပ်း 6219 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ