ၵူၼ်းၼုမ်ႇတႆးလႃႈသဵဝ်ႈ  ဢၼ်ၺႃးသိုၵ်းမၢၼ်ႈတီႉၺွပ်းၽွင်းပၢင်ၼႄၵၢင်ၸႂ် ၼၼ်ႉ လုမ်းတြႃးထတ်းထွင်ယဝ်ႉသေ ပၼ်တူတ်ႈတၢမ်ႇ ယဵတ်ႈၶွၵ်ႈ 2 ပီ၊ ပဵၼ်ၵူၼ်းၼုမ်ႇတႆး ဢၼ်ၺႃးသိုၵ်းမၢၼ်ႈသူင်ႇၶင်ၶွၵ်ႈၵေႃႉႁႅၵ်ႈ။

မိူဝ်ႈဝႃး ဝၼ်းတီႈ 16/6/2021 ၶွင်ႇသီႇသိုၵ်းမၢၼ်ႈ ဢဝ် ၸၢႆးသၢႆဝၼ်းဢူး (ႁွင်ႉ) ၵျေႃႇတႅတ့်ဢူး ၵူၼ်းၼုမ်ႇတႆး ဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ    ၶိုၼ်ႈလုမ်းတြႃး ထဵတ်ႈထၢမ်ဢမုၶတီး ယဝ်ႉသေ ၺႃးလုမ်းတြႃး ပူင်ၵႂၢမ်းပၼ်တူတ်ႈတၢမ်ႇၶွၵ်ႈ တႃႇၶၢဝ်းတၢင်း 2 ပီ ၼႆယဝ်ႉ။

 ၸၢႆးသၢႆဝၼ်းဢူးၼႆႉ ၺႃးသိုၵ်းမၢၼ်ႈတီႉမတ်ႉၺွပ်းၵႂႃႇၽွင်းၵူၼ်းမိူင်းလႃႈသဵဝ်ႈ လုၵ်ႉႁိုၼ်ႇၼႄၵၢင်ၸႂ်သၢၼ်ၶတ်းသိုၵ်းမၢၼ်ႈ မိူဝ်ႈဝၼ်းတီႈ 8/3/2021 ယၢမ်းၵၢင်ၼႂ် မွၵ်ႈ 6 မူင်း ။ သိုၵ်းမၢၼ်ႈၶင်တူဝ်မၼ်းၸၢႆးဝႆႉသေ ဢဝ်လိူင်ႈၸွႆးတြႃးဝႆႉလူၺ်ႈမတ်ႉတႃ   505 (က)  ။

ဢူၺ်းၵေႃႉမၼ်းၸၢႆးတႄႉလၢတ်ႈဝႃႈ ၸၢႆးသၢႆဝၼ်းဢူးၼႆႉ ၵႂႃႇၼင်ႈၵိၼ်ၼမ်ႉၼဵင်ႈၸဵမ်းၸွမ်းဢူၺ်းၵေႃႉမၼ်း တီႈႁိမ်းႁူင်းငဝ်းတူင်ႉ (သိန်းထိုက်ရုပ်ရှင်) ၼႂ်းဝဵင်းလႃႈသဵဝ်ႈ ။ၽွင်းၼၼ်ႉသိုၵ်းမၢၼ်ႈမႃးတီႉၺွပ်းဢဝ် မၼ်းၸၢႆး  ၵႂႃႇ သေ မၢပ်ႇမႂ်ၸီႉၼႄးလူၺ်ႈတၢင်းၽိတ်းလၢႆလၢႆဢၼ် ဝႃႈၼႆ။

ဢူၺ်းၵေႃႉ ၸမ်ၸႂ် ၸၢႆးသႅင်ဝၼ်းဢူး လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆးထုၵ်ႇ တီႉၺွပ်းၵႂႃႇ မိူဝ်ႈၽွင်းၼႄၵၢင်ၸႂ် ၼၼ်ႉ ဢမ်ႇၸႂ်ႈ။ ပလိၵ်ႈဝႃႈ ယွၼ်ႉမၼ်း ယိပ်းတုင်းၸိူဝ်ႉၸၢတ်ႈတႆးဝႆႉလႄႈ  တီႉၼႆဝႃႇ။ ၵူၺ်းၵႃႈ မိူဝ်ႈၽွင်းပလိၵ်ႈတီႉမၼ်းၼၼ်ႉ တုင်း  ဢမ်ႇမီး ၼႂ်းမိုဝ်းမၼ်း ။ တုင်းၼၼ်ႉ မီးဝႆႉၼႂ်းႁွင်ႈၼမ်ႉ ႁိမ်းၶၢင်ႈမၼ်း ၼၼ်ႉၵူၺ်း”- ဝႃႈၼႆ။

ၸၢႆးသၢႆဝၼ်းဢူးၼႆႉ ၽွင်းၺႃးသိုၵ်းမၢၼ်ႈတီႉၺွပ်း ယဵတ်ႈၶွၵ်ႈဝႆႉၼၼ်ႉ သိုၵ်းမၢၼ်ႈ မိူၵ်ႈမႂ်ႈမႃးထဵတ်ႈထၢမ် ပေႃႉထုပ်ႉ  မၼ်းၸၢႆးႁၢဝ်ႈႁႅင်း။  တဵၵ်းတဵင်မိပ်ႇငႅၼ်းၵူႈလၢႆးလၢႆး  ၸႂ်ႉလူင်းလၢႆး မိုဝ်း ၼႂ်းမၢင်ၸေႈ ဢၼ်တႅမ်ႈဝႆႉဢမ်ႇပဵၼ်လွင်ႈတႄႉမၼ်းပဵၼ်လၢႆလၢႆမၢင်သေ လိုၼ်းသုတ်း လုမ်းတြႃးတႅပ်းတတ်းပၼ်တူတ်ႈတၢမ်ႇၶွၵ်ႈ 2 ပီ  ၽူႈတၢင်လၢတ်ႈ (ရှေ့နေ)  မၼ်းၸၢႆးလၢတ်ႈၼင်ႇၼႆ။

ဝၢႆးသေ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ၸႂ်ႉလၢႆးႁုၵ်ႉႁၢႆႉ ၶႃႈႁႅမ်တၢႆ ၵူၼ်းမိူင်း/ ၵူၼ်းၼုမ်ႇ မႃး ၶိူဝ်းယႂ်းတေႃႇထိုင်ယၢမ်းလဵဝ် ၵေႃႈယင်း လမ်းတီႉၺွပ်းယဵတ်ႈၶွၵ်ႈယူႇ။ ၼႂ်းၸၢဝ်းၶိူဝ်း တႆး ဢၼ်ထုၵ်ႇဢဝ်လိူင်ႈ လူၺ်ႈ 505 (က) သေ  ပၼ်တူတ်ႈတၢမ်ႇ ၶွၵ်ႈ 2 ပီၼႆႉ တေလႆႈဝႃႈ ၸၢႆးသၢႆဝၼ်းဢူး ပဵၼ်ၵေႃႉ ႁႅၵ်ႈယဝ်ႉ ဝႃႈၼႆ။