ၵူၼ်းၼုမ်ႇ လႃႈသဵဝ်ႈ ၵေႃႉၼိုင်ႈ ထုၵ်ႇၸူၼ်ရူတ်ႉၶိူင်ႈသေ ၺႃးၽၼ်းသႂ်ႇ မၢတ်ႇၸဵပ်း ႁၢဝ်ႈႁႅင်း ဝႃႈၼႆ။

မိူဝ်ႈၼႆႉ ဝၼ်းတီႈ 16/6/2021 ယၢမ်းၵၢင်ၼႂ်ၸဝ်ႉမွၵ်ႈ 4 မူင်းပၢႆ  ၵူၼ်းၼုမ်ႇ ၵေႃႉၼိုင်ႈ ၸိုဝ်ႈႁွင်ႉ ၼေႃႇတူၺ်းလၢႆႇ ထုၵ်ႇ ၵူၼ်းႁၢႆႉသွင်ၵေႃႉ ၸူၼ်ဢဝ်ရူတ်ႉၶိူင်ႈသေ ၺႃးၽၼ်း သႂ်ႇထႅင်ႈလႆႈၸဵပ်းႁၢဝ်ႈႁႅင်း တီႈၼႃႈႁၢၼ်ႉၶၢႆ Hot Pop ပွၵ်ႉ 8 ၸႄႈ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ဢူၺ်းၵေႃႉ ၸမ်ၸႂ် ၼေႃႇတူၺ်းလၢႆႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆးၼႆႉ ပဵၼ်ၵူၼ်းမႄးရူတ်ႉ မၼ်းတေ ၵႂႃႇႁပ်ႉၸဝ်ႈၵႃး တီႈၼႃးမၢၵ်ႇၶေႃ မိူဝ်ႈမၼ်းၵႂႃႇၸွမ်းတၢင်းၼၼ်ႉ ၼမ်ႉမၼ်းရူတ်ႉၶိူင်ႈမၼ်းမူတ်းသေ သမ်ႉၸူးလႆႈထူဝ်း။ မိူဝ်ႈၽွင်းၼၼ်ႉ မီးၵူၼ်းၶီႇရူတ်ႉၶိူင်ႈ သွၼ်ႉၵၼ်မႃး သွင်ၵေႃႉ မႃးပေႃႉထုပ်ႉတၢင်းလင်မၼ်းၸၢႆး ၵမ်းၼႆႉ မၼ်းၶိုၼ်းပိတ်ႉ သႂ်ႇ ၵူၼ်းႁၢႆႉသွင်ၵေႃႉၼၼ်ႉ ယူႇတီႈ ၵူၼ်းႁၢႆႉၼၼ်ႉ လၢၵ်ႈလႅဝ်းၽၼ်းသႂ်ႇ တီႈၶႃ ဢွၼ်တၢင်း ယဝ်ႉၵေႃႈ ၸွမ်းတူဝ်လႄႈ ၵွၵ်းႁူဝ်ၸိူဝ်းၼႆႉ လႆႈမၢတ်ႇၸဵပ်းႁၢဝ်ႈႁႅင်း”-  ဝႃႈၼႆ။

ၵူၼ်းၼုမ်ႇ ၼေႃႇတူၺ်းလၢႆႇၼႆႉ ပဵၼ်ၵူၼ်းၸႃတိ ၼႂ်းၼွင်ႁၢႆးယႃႈ ၸိုင်ႈတႆးပွတ်းၸၢၼ်းသေ မႃးႁဵတ်းၵၢၼ် တီႈတႃႈရူတ်ႉ သူၺ်ႇမၢၼ်းတူႇ ဝဵင်းလႃႈသဵဝ်ႈ။ ယၢမ်းလဵဝ် လႆႈသူင်ႇယူတ်းယႃတူဝ် ဝႆႉတီႈႁူင်းယႃသိုၵ်းလႃႈသဵဝ်ႈ ၼႆယဝ်ႉ။

ထႅင်ႈၾၢႆႇၼိုင်ႈၵေႃႈ ၽွင်းၶၢဝ်းၼႆႉ ၸွမ်းၼင်ႇငဝ်းလၢႆး ဝၢၼ်ႈမိူင်းသေ ၽူႈလၵ်ႉၸၵ်ႉၶုတ်ႈ ၵူၼ်းၸူၼ်ၸိူဝ်းၼႆႉ လိူင်ႇၼမ် မႃးလိူဝ်ၵဝ် ၵူႈဝၢၼ်ႈ ၵူႈဝဵင်း ၵူၼ်းၵႃႉၼႂ်းၸိုင်ႈတႆးပွတ်းႁွင်ႇၵေႃႉၼိုင်ႈလၢတ်ႈ။

“မိူဝ်ႈလဵဝ်ၼႆႉ တၢင်းပဵၼ်ၶူဝ်ႊဝိတ်ႉ 19 ၵေႃႈပိူင်ၼိုင်ႈ ၵၢၼ်မိူင်းၵေႃႈ ပိူင်ၼိုင်ႈသေ ၵၢၼ်ႁႃၵိၼ်လဵင်ႉတွင်ႉၵေႃႈ ယၢပ်ႇ ၽိုတ်ႇလိူဝ်ႁႅင်းသေ ၵူၼ်းလၵ်ႉၵူၼ်းၸူၼ် ၵူၼ်းႁၢႆႉ  ၸိူဝ်းၼႆႉ ၸင်ႇလိူင်ႇၶိုၼ်ႈမႃးၼမ်။ ယွၼ်ႉၼၼ်လႄႈ လူဝ်ႇလႆႈၾၢင်ႉ သတိတူဝ်ၽႂ်းမၼ်းသေ ယူႇႁိူၼ်းယေးၵၼ် ယႃႇပေပေႃးဢွၵ်ႇတၢင်းၼွၵ်ႈၵၼ်”- ၵူၼ်းၼုမ်ႇ လႃႈသဵဝ်ႈ သိုပ်ႇလၢတ်ႈၼႄ ၼင်ႇၼႆ။

ဝၢႆးသေ ၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ဝၢၼ်ႈမိူင်းဢမ်ႇမီး လွင်ႈၼိမ်သဝ်း ၽူႈလၵ်ႉၵူၼ်းၸူၼ်ၵေႃႈ လိူင်ႇၼမ်မႃး ပၢင်တေႃႇလွင်းၵေႃႈၼမ် လွင်ႈၾႆးမႆႈ မၢၵ်ႇတႅၵ်ႇ ၸိူဝ်းၼႆႉၵေႃႈ မီးယူႇၶိူဝ်းယႂ်း ၵူၼ်းမိူင်းတႆး မႆႈၸႂ် ယွၼ်ႉ ဢမ်ႇမီးလွင်ႈလွတ်ႈၽေးလႄႈ လွင်ႈႁူမ်ႇလူမ်ႈတူဝ်ၵဝ်ႇ ၼႆယဝ်ႉ။