ၸဝ်ႈၵႃး ဢၼ်လဵၼ်ႈတၢင်း လႃႈသဵဝ်ႈ – ၵူတ်ႉၶၢႆ – မူႇၸေႊ ၵေႃႉၼိုင်ႈ ၺႃးၸူၼ် ၶႃႈႁႅမ်တၢႆသေ ဢဝ်ငိုၼ်းၵႂႃႇ 24 သႅၼ် ပျႃး ဝႃႈၼႆ။
ဝၼ်းတီႈ 6/6/2021 ယၢမ်းၵၢင်ၶမ်ႈ 8 မူင်း ၸၢႆးၸၢမ်ႇၺုၼ်ႉ (ႁွင်ႉ) ၸၢႆးဢၢႆႈၽိူၵ်ႇ ဢႃယု 40 ပၢႆ ၵူၼ်းႁေႃႈၵႃး လႃႈသဵဝ်ႈ-ၵူတ်ႉၶၢႆ ႁူပ်ႉၺႃးၸူၼ် ၼႂ်းၵႄႈမၢၼ်ႈပဵင်း – သႅၼ်ဝီ ၼိူဝ်သဵၼ်ႈတၢင်းလူင် ၵူတ်ႉၶၢႆ – သႅၼ်ဝီသေ ၺႃးၸူၼ်ပေႃႉထုပ်ႉဢဝ်တၢႆယဝ်ႉ ဢဝ်ငိုၼ်းၵႂႃႇပႃးထႅင်ႈ 24 သႅၼ် ပျႃး ဝႃႈၼႆ။
ပီႈၼွင်ႉၸမ်ၸႂ် ၸၢႆးၸၢမ်ႇၺုၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၸူၼ်ပေႃႉထုပ်ႉၸွမ်းတူဝ်လႄႈၸွမ်းႁူဝ်။ မၼ်းလုၵ်ႉလႃႈသဵဝ်ႈတၢင်ႇၵုၼ်ႇမႃးၵေႃႉလဵဝ်။ ၶိုၼ်ႈမႃးတၢင်းၵူတ်ႉၶၢႆ ယၢမ်း ၵၢင် ၶမ်ႈ မွၵ်ႈ 8 မူင်း ၺႃးၸူၼ်ၼႂ်းၵႄႈမၢၼ်ႈပဵင်း – သႅၼ်ဝီၶႃႈ၊ ထုၵ်ႇၸူၼ်ဢဝ်ငိုၼ်းၵႂႃႇ 24 သႅၼ် ပျႃး ၶႃႈႁႅမ်တၢႆ ၶႃႈဢေႃႈ”- ဝႃႈၼႆ။
ၸဝ်ႈၵႃးပွတ်းလႃႈသဵဝ်ႈလၢတ်ႈဝႃႈ ဢွင်ႈတီႈ တီႈၼၼ်ႈ ၵႆႉၵႆႉမီးၸူမ်ဢွၵ်ႇမႃးပႂ်ႉၸူၼ်ႈၸဝ်ႈရူတ်ႉၸဝ်ႈၵႃးယူႇသေႇသေႇ။ မီးၸုမ်း သိုၵ်းမၢၼ်ႈတင်း ၸုမ်းပျီႇတူႉၸိတ်ႉ တူင်ႉၼိုင်ယူႇဝႆႉ ဝႃႈၼႆ။
“ၵႃးတႄႉ ဢမ်ႇပဵၼ်သင် ၸူၼ်ၸိူဝ်းၼၼ်ႉဢဝ်ငိုၼ်းမၼ်းၵႂႃႇပႃး။ ၸဝ်ႈရူတ်ႉၸဝ်ႈၵႃး ဢၼ်လဵၼ်ႈသၢႆၼၼ်ႉၵေႃႈ လူဝ်ႇလႆႈ ၾၢင်ႉသတိၵၼ်ၵူႈၵေႃႉယဝ်ႉၶႃႈ။ မိူၼ်ၸၢႆးၸၢမ်ႇၺုၼ်ႉ ဢၼ်လႆႈပဵၼ်ၵႂႃႇၼႆႉ တိုၵ်ႉ ပဵၼ်ၵၢင်ၶမ်ႈ 8 မူင်းၵူၺ်း ပေႃးမီးၵူၼ်းၸူၼ် ၸိူင်ႉၼႆယဝ်ႉ ၵွပ်ႈၼႆလႄႈ ဢွၼ်ၵၼ်ၾၢင်ႉသတိၵႂႃႇမႃးၵၼ်ၽွင်ႈ”- ပီႈၼွင်ႉ ၸမ်ၸႂ် ၸၢႆးၸၢမ်ႇၺုၼ်ႇ သိုပ်ႇလၢတ်ႈၼႄၼင်ႇၼႆ။
ယူႇတီႈပေႃႈမႄႈၸိူဝ်ႉၶိူဝ်းပီႈၼွင်ႉ လုၵ်ႈလၢင်းၼၢင်းမေး ၸၢႆးၸၢမ်ႇၺုၼ်ႉသေ လႆႈပူၼ်ႉၶၢပ်ႈတူဝ် မၼ်းၸၢႆးၵႂႃႇ မိူဝ်ႈဝႃးဝၼ်းတီႈ 7 ၼႆယဝ်ႉ။
ၸၢႆးၸၢမ်ႇၺုၼ်ႇၼႆႉ တေမီးဢႃယု 40 ပၢႆ ယူႇပွၵ်ႉ 5 ၸႄႈဝဵင်းၵူတ်ႉၶၢႆ ယၢၼ်းလဵဝ်ၵိုတ်းဝႆႉလုၵ်ႈလၢင်းၼၢင်းမေး လႄႈ လုၵ်ႈယိင်း 3 ၵေႃႉ ။