ထၢတ်ႈပုတ်ႉထၵႃႇယႃႇ/ သၼ်လွႆထၢတ်ႈၵုင်းပိၼ်း ၸႄႈဝဵင်းမိူင်းပၼ်ႇ ၸတ်းႁဵတ်း ပွႆးၶၢမ်ႇသၢင်ႇ ပဵၼ်ပွၵ်ႈၵမ်းႁႅၵ်ႈ မီး ဢွၼ်ႇၸၢႆး ၼုင်ႈလိူင် 50 တူၼ်ပၢႆ ဝႃႈၼႆ။

တႄႇဢဝ်မိူဝ်ႈဝၼ်းတီႈ 3-6/6/2021 ၶၢဝ်းတၢင်း 4 ဝၼ်း  ပေႃႈမႄႈၵူၼ်းမိူင်းပၼ်ႇ ၸတ်းပၢင်ၶၢမ်ႇသၢင်ႇတီႈ ထၢတ်ႈပုတ်ႉထၵႃႇယႃႇ မိူင်းပၼ်ႇ   ဢၼ်မီးတၢင်းၾၢႆႇဢွၵ်ႇဝဵင်း ယၢၼ်ဝဵင်းမွၵ်ႈ 1 လၵ်း ၼႂ်းၸႄႈဝဵင်းမိူင်းပၼ်ႇ ၸႄႈတွၼ်ႈလၢင်း ၶိူဝ်း ၸိုင်ႈတႆးပွတ်းၸၢၼ်း မီးဢွၼ်ႇၸၢႆး ၶဝ်ႈႁၢပ်ႇထမ်းၵၢၼ်သႃႇသၼႃႇ/ ၼုင်ႈလိူင် 53 တူၼ် ၼႆယဝ်ႉ။

ၸဝ်ႈၶူး ၵႃႇလိင်ႇတ ဢၼ်ယဝ်ႉၸၼ်ႉၸွမ်သီႇရိလင်ႇၵႃႇ ၸၼ်ႉ M.A ၽူႈဢွၼ်ၸတ်းပၢင်ပွႆးၶၢမ်ႇသၢင်ႇ လၢတ်ႈတီႈၽူႈ တွႆႇႁွၵ်ႈဝႃႈ – “မိူဝ်ႈတႄႇမၼ်းတႄႉ ႁဝ်းၶႃႈ တေၸတ်းႁဵတ်းၶၢမ်ႇသၢင်ႇၵူၺ်း ဢမ်ႇထၢင်ႇ ၵူၼ်းတေၼမ်ၸိူင်ႉၼႆ ၽိူဝ်ႇ ထိုင်ဝၼ်းမႃးၼႆ ဢဝ်ပဵၼ်ပွႆးၶၢမ်ႇသၢင်ႇၵႂႃႇ ၵူၼ်းပေႃးၵိုၼ်းလူင်ဝႆႉၶႃႈ ပီၼႆႉ တေလႆႈဝႃႈ ပဵၼ်ပီပွၵ်ႈႁႅၵ်ႈၶႃႈယဝ်ႉ ပၢင် ၶၢမ်ႇသၢင်ႇ ႁဝ်းၶႃႈ တီႈထၢတ်ႈပုတ်ႉထၵႃႇယႃႇ မိူင်းပၼ်ႇၼႆႉ”- ဝႃႈၼႆ။

ဢွၼ်ႇၸၢႆးဢၼ်မႃးၼိုင်ႈလူင် တီႈထၢတ်ႈပုတ်ႉထၵႃႇယႃႇ မိူင်းပၼ်ႇ ပွၵ်ႈၼႆႉ ၵမ်ႈၼမ် ပဵၼ်ၵူၼ်းပိုၼ်ႉတီႈ ၼႂ်းၸႄႈဝဵင်း မိူင်းပၼ်ႇ ၼႆယဝ်ႉ။

လိူဝ်ၼၼ်ႉ ယူႇတီႈ ၸဝ်ႈၶူး ၵႃႇလိင်ႇတ မႃးဢွၼ်ႁူဝ်ၼမ်းၼႃႈ ၼႂ်းၶၢဝ်းတၢင်း ပီပၢႆ 6 လိူၼ်ၼႆႉသေ လႆႈၵေႃႇသၢင်ႈဝႆႉ ထၢတ်ႈ 3 သူႇ မိူၼ်ၼင်ႇ ထၢတ်ႈမႁႃႇၽေႃးထိ ပုတ်ႉထ ၵႃႇယႃႇ သူႇၼိုင်ႈ၊ ထၢတ်ႈသီႇရိလင်ႇၵႃ သူႇၼိုင်ႈလႄႈ ထၢတ်ႈ မူၺ်ႇတေႃႇႁူဝ်လိုင်းသူႇၼိုင်ႈ။ ယၢမ်းလဵဝ် တိုၵ်ႉၵေႃႇသၢင်ႈၽြႃးၵေႃႇမိူင်း/ ၽြႃးၼင်ႈဝႆႉထႅင်ႈသူႇၼိုင်ႈ ၼႆယဝ်ႉ။