ၵူၼ်းၼုမ်ႇၼမ်ႉၶမ်း ႁူမ်ႈၵၼ်ၽုၵ်ႇတူၼ်ႈမႆႉ တီႈဝၢၼ်ႈမႂ်ႇႁူဝ်ပၢင်ႇ

ၵူၼ်းၼုမ်ႇၼမ်ႉၶမ်း – မိူင်းဝီး – ၸေႊလၢၼ်ႉ ႁူမ်ႈၵၼ်သေ ၵႂႃႇၽုၵ်ႇတူၼ်ႈမႆႉ တီႈဝၢၼ်ႈႁူဝ်ပၢင်ႇ ဢၼ်ယၢၼ်ၵႆဝဵင်း ၼမ်ႉၶမ်း မွၵ်ႈ 30 လၵ်း တူၼ်ႈမႆႉမွၵ်ႈ 1,500 တူၼ်ႈ ပဵၼ်ဝၢၼ်ႈမႂ်ႇ/ ၸၢဝ်းတႆး ဢၼ်ၶိုၼ်းမိူဝ်းတႄႇမႂ်ႇသေယူႇသဝ်းၶိုၼ်း ပႆႇႁိုင်။

မိူဝ်ႈဝႃး ဝၼ်းတီႈ 6/6/2021 ယူႇတီႈ ၵူၼ်းၼုမ်ႇၼမ်ႉၶမ်းလၢႆလၢႆၸုမ်းလႄႈ ၵူၼ်းၼုမ်ႇမိူင်းဝီးတင်း ၵူၼ်းၼုမ်ႇၸေႊ လၢၼ်ႉ ၵမ်ႈၽွင်ႈ ႁူမ်ႈၵၼ် ၵႂႃႇၽုၵ်ႇတူၼ်ႈမႆႉ၊ တူၼ်ႈမၢၵ်ႇ တီႈဝၢၼ်ႈႁူဝ်ပၢင်ႇ(ဝၢၼ်ႈပၢင်ႇလူင် ဝဵင်းၶမ်း) ဢိူင်ႇမိူင်းဝီး ၸႄႈဝဵင်းၼမ်ႉၶမ်း ယၢၼ်ဝဵင်း မွၵ်ႈ 30 လၵ်း ဢၼ်မီးၾၢႆႇၸဵင်ႇၸၢၼ်းဝၼ်းတူၵ်း ၼမ်ႉၶမ်းၼၼ်ႉ။  

ၸၢႆးလၢဝ်ၶိူဝ်း ႁူဝ်ပဝ်ႈ ၵေႃလိၵ်ႈလၢႆး ၸႄႈဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ႁဝ်းၶႃႈ ၵႂႃႇၽုၵ်ႇတူၼ်ႈမႆႈတီႈ ၼၼ်ႉတႄႉ ၵွပ်ႈပိူဝ်ႈပီႈၼွင်ႉႁဝ်းၶႃႈ တီႈၼၼ်ႈၵေႃႈသမ်ႉတႄႇဝၢၼ်ႈမႂ်ႇ တိုၵ်ႉမီး 2-3 လိူၼ်ၵူၺ်းလႄႈ တိုၵ်ႉပဵၼ်ဝၢၼ်ႈမႂ်ႇ ပႆႇ မီးသင် ၶႂ်ႈၵႂႃႇပၼ်ႁႅင်းၸႂ်ၵေႃႈပိူင်ၼိုင်ႈ။ ၵႂႃႇသူႇၸႂ်းၵၼ်ၵေႃႈ ပိူင်ၼိုင်ႈ။ ထႅင်ႈလွင်ႈၼိုင်ႈသမ်ႉ တီႈၶဝ်ယူႇၼၼ်ႉ တိုၵ်ႉ ပဵၼ်ပၢင်ႇ ပႆႇမီးတူၼ်ႈမႆႉ တူၼ်ႈတွၵ်ႇသင် တွၼ်ႈတႃႇယိုၼ်ႈယၢဝ်းၵႂႃႇထႅင်ႈတင်းၼႃႈ တႃႇပီႈၼွင်ႉႁဝ်းသေ ယဝ်ႉၵေႃႈ ၵႂႃႇလဵပ်းႁဵၼ်းတူၺ်း လွင်ႈယူႇသဝ်းၵိၼ်သၢင်ႈ ၵူၼ်းဝၢၼ်ႈႁဝ်း လူဝ်ႇသင်လၢႆလၢႆ မီးလွင်ႈယၢပ်ႇသင် ၸိူဝ်းၼႆႉပႃး”- ဝႃႈၼႆ။

ၵူၼ်းပၢႆႈၽေးသိုၵ်း တီႈမိူင်းဝီးၼႆႉ ယွၼ်ႉဝႃႈ မိူဝ်ႈႁၢင်ပီ 2015 ၼၼ်ႉ ယွၼ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်းပဵၼ်ပၢင်တိုၵ်းၵၼ်။ သိုၵ်းတဢၢင်း တင်း RCSS ပဵၼ်ပၢင်တိုၵ်းၵၼ် တၢင်းပွတ်းတွၼ်ႈၼၼ်ႉႁၢဝ်ႈ ႁႅင်းသေ ၵူၼ်းဝၢၼ်ႈႁူဝ်ပၢင်ႇ လႆႈဢွၼ်ၵၼ်ပၢႆႈၽေးၵႂႃႇသွၼ်ႈဝႆႉ တီႈၵေႃလိၵ်ႈလၢႆး ဝၢၼ်ႈမိူင်းဝီး။ မိူဝ်ႈၽွင်းၼၼ်ႉ ႁူဝ်ၵူၼ်း မီး 261 ၵေႃႉ၊ လင်ႁိူၼ်း (ၶွပ်ႈၶူဝ်း) မီး 62 လင်။

ထိုင်ၽွင်းပီ 2019 ၼႆႉမႃး ငဝ်းလၢႆးပၢင်တိုၵ်းယဵၼ်ၵႂႃႇၶိုၼ်းလီငၢမ်းယဝ်ႉလႄႈ ၵူၼ်းပၢႆႈၽေးသိုၵ်းၸင်ႇလႆႈဢွၼ်ၵၼ်မိူဝ်းတႄႇဝၢၼ်ႈမႂ်ႇၶိုၼ်း   ၼႂ်းၵႄႈဝၢၼ်ႈႁူဝ်ပၢင်ႇ(ၵဝ်ႇ)လႄႈ ဝၢၼ်ႈမိူင်းဝီး ဢၼ်ယၢၼ်ၵႆဝၢၼ်ႈႁူဝ်ပၢင်ႇၵဝ်ႇမွၵ်ႈ 1 လၵ်းပၢႆ၊  ယၢၼ်ၵႆဝၢၼ်ႈမိူင်းဝီးမွၵ်ႈ 1 လၵ်းပၢႆ ယၢမ်းလဵဝ် မီးလင်ႁိူၼ်းတၢင်းမူတ်းမီး 86 လင်ႁိူၼ်းယဝ်ႉ ၼႆၶႃႈ။