ဝၢႆးသေ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းဢႃႇၼႃႇ ၸိုင်ႈမိူင်းမႃး ၽူႈလၵ်ႉၵူၼ်းၸူၼ် လိူင်ႇၼမ် ၼႂ်းၸႄႈဝဵင်းတႃႈၶီႈလဵၵ်း ၽူႈမီးပုၼ်ႈၽွၼ်း ပလိၵ်ႈယေး ဢမ်ႇတွၼ်ႉတီႉၺွပ်းလႆႈ တူဝ်ၵူၼ်းႁၢႆႉသေပွၵ်ႈ ၵူၼ်းမိူင်း မႆႈၸႂ် ယွၼ်ႉဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။
ၵူၼ်းၼုမ်ႇ တႃႈၶီႈလဵၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈသိုၵ်းမၢၼ်ႈ ပႆႇယိုတ်းဢႃႇၼႃႇၼၼ်ႉ ၵူၼ်း လၵ်ႉ/ၸူၼ်ၼႆႉ ပႆႇၼမ်ၸိူင်ႉၼႆ။ ဝၢႆးၶဝ် ယိုတ်းဢႃႇၼႃႇမႃးၼႆႉ ၵူၼ်းလၵ်ႉ/ ၸူၼ်ၼႆႉ ၼမ်ၶိုၼ်ႈမႃး ပဵၼ်လၢႆပုၼ်ႈၶႃႈ ဢေႃႈ။ ယၢမ်းလဵဝ်ၼႆႉ ရူတ်ႉၶိူင်ႈၼႆႉ ၵႆႉႁၢႆၼႃႇ ၶႂ်ႈဝႃႈၵူႈဝၼ်းယဝ်ႉၶႃႈ ။ တေႃႇၼင်ႈ ၸဝ်ႈၶွင်ရူတ်ႉၶိူင်ႈ တိုၵ်ႉၶီႇရူတ်ႉ ၸဝ်ႈၵဝ်ႇဝႆႉယူႇထၢၵ်ႇထၢၵ်ႇ ၵူၼ်းႁၢႆႉယင်း ပၢႆၸၼ်လၢၵ်ႈႁေႃႈ လႅၼ်ႈပၢႆႈထႅင်ႈလူးၵွၼ်ႇ ၶဝ်ဢမ်ႇၵူဝ်သင်သေ ဢိတ်း ၵူၼ်းႁၢႆႉၵူၼ်းလၵ်ႉၸိူဝ်းၼၼ်ႉ”- ဝႃႈၼႆ။
ၽူႈလၵ်ႉ/ၸူၼ် ၼမ်လိူင်ႇၸိူင်ႉၼႆ ယူႇတီႈၽူႈမီးပုၼ်ႈၽွၼ်း ပလိၵ်ႈယေး တိုၼ်းဢမ်ႇဢဝ်သႂ်ႇၸႂ် သင် တင်ႈၸႂ်ပွႆႇ ႁႂ်ႈမၼ်းသုၵ်ႉယုင်းဢုၼ်ၵဝ်းၵူၺ်း ပဵၼ်ၽႅၼ်ၶဝ်ၵူၺ်းၼႆ ၵူၼ်းၼုမ်ႇ တႃႈၶီႈလဵၵ်း သိုပ်ႇလၢတ်ႈၼႄၼင်ႇ ၼႆ။
“တူဝ်ၵူၼ်းႁၢႆႉ ၵူၼ်းလၵ်ႉၼႆႉ ပလိၵ်ႈယေးၸိူဝ်းၼႆႉ ဢမ်ႇႁၼ်ၶဝ်တီႉလႆႈသေပွၵ်ႈ။ ယူဝ်ၶႄး ပဵၼ်တူဝ်ၶဝ်ၶိုၼ်းၵေႃႉႁဵတ်း ႁိုဝ် ဢမ်ႇႁူႉ။ ဢၼ်ၶဝ်လူဝ်ႇတီႉလူဝ်ႇၺွပ်းသမ်ႉ ဢမ်ႇတီႉဢမ်ႇၺွပ်း။ လႄႇႁႃပႂ်ႉတီႉၺွပ်းၵူၼ်းၼုမ်ႇၼႄၵၢင်ၸႂ်၊ မၢပ်ႇမႂ် ငိုၼ်း ၵူၼ်းၼႄၵၢင်ၸႂ် ၵူၺ်း။ ၵၢၼ်တႃႇၵႅတ်ႇၶႄႁႄႉၽေးတေႃႇၵူၼ်းမိူင်းၼႆႉၶဝ်ဢမ်ႇႁဵတ်း ပလိၵ်ႈယေးၸိူဝ်းၼႆႉ”- ဝႃႈၼႆ။
ရူတ်ႉၶိူင်ႈၵူၼ်းမိူင်းၼႂ်းပိုၼ်ႉတီႈ ဢၼ်ၵႆႉႁၢႆၼႆႉ ပဵၼ်ရူတ်ႉၵူၼ်းၸိူဝ်းယူႇႁွင်ႈထႅဝ်/ ႁွင်ႈၶၢတ်ႇ။ ၽူႈလၵ်ႉၸိူဝ်းၼႆႉ မႃးလၵ်ႉရူတ်ႉၶိူင်ႈၼိုင်ႈၵၼ်းၶၢဝ်းယၢမ်းႁိုင်မွၵ်ႈ 5-10 မိၼိတ်ႉၵူၺ်း။ မၢင်ပွၵ်ႈယင်း ပၢႆလၵ်ႉၶိုၼ်ႈၽႅဝ် ၼိူဝ်ႁိူၼ်း ၸိူဝ်းၼႆႉထႅင်ႈလူးၵွၼ်ႇ ၵူၼ်းတႃႈၶီႈလဵၵ်း လၢတ်ႈၼႄၽူႈတွႆႇႁွၵ်ႈၼင်ႇၼႆ။
ၼႂ်းၶၢဝ်းတၢင်း 3-4 လိူၼ်မႃးၼႆႉ ပၢင်တေႃႇလွင်း ၼႂ်းၸႄႈဝဵင်းတႃႈၶီႈလဵၵ်းလိူင်ႇၼမ်မႃးလိူဝ်ၵဝ်ႇ၊ သိုၵ်းမၢၼ်ႈ ပွႆႇပၼ်ႁဵတ်းပေႃးမီးလူင်ၵႂႃႇ ၵူႈၸွၵ်ႉ ၵူႈၸဵင်ႇ ႁဵတ်းႁႂ်ႈၵူၼ်းမိူင်း ၵူၼ်းၼုမ်ႇ ဢၵျၢင်ႉတၢင်းယၢမ်ႈလူႉ ၵူၼ်းလၵ်ႉ/ ၸူၼ် လိူင်ႇၼမ် ႁဵတ်းႁႂ်ႈယႃႈမဝ်းၵမ် လိူင်ႇၽႄႈ ၵူၼ်းတႃႈၶီႈလဵၵ်းဢွၼ်ၵၼ်ပွင်ႉၶၢင်းၼင်ႇၼႆ။
