မၢၵ်ႇတႅၵ်ႇ ၼႂ်းႁိမ်းၵၢတ်ႇၵေးသီး လုၵ်ႈၼိုင်ႈ တိူဝ်ႉၺႃး ၼၢင်းယိင်း ဢႃယု 40 ပၢႆ လႆႈမၢတ်ႇၸဵပ်းၸွမ်း တီႈၶႃ ဝႃႈၼႆ။
မိူဝ်ႈဝႃး ဝၼ်းတီႈ 30/5/2021 ယၢမ်းၵၢင်ၼႂ် မွၵ်ႈ 6:35 မူင်း တီႈၾၢႆႇတူၵ်းၵၢတ်ႇလူင် ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း မၢၵ်ႇတႅၵ်ႇလုၵ်ႈၼိုင်ႈ ပဵၼ်ပွၵ်ႈၵမ်းႁႅၵ်ႈ ပဵၼ်ၼမ်ႉမိုဝ်းၽႂ် ႁဵတ်းဢၼ်ဝႃႈၼၼ်ႉ ပႆႇႁူႉ ၼႆယဝ်ႉ။
ၵူၼ်း ၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မၢၵ်ႇတႅၵ်ႇ လုၵ်ႈၼိုင်ႈ ႁႅင်းဝႆႉၶႃႈဢေႃႈ မၢၵ်ႇ ၼၼ်ႉ။ တိူဝ်ႉၺႃးၼၢင်းယိင်း ဢႃယု 40 ပၢႆ ၵေႃႉၼိုင်ႈ လႆႈမၢတ်ႇၸဵပ်း တီႈၶႃမၼ်းၼၢင်း ယၢမ်းလဵဝ် လႆႈသူင်ႇယူတ်းယႃ တူဝ် တီႈႁူင်းယႃၵေးသီးဝႆႉ”- ဝႃႈၼႆ။
ဢိင်ၼိူဝ် လွင်ႈၼႆႉ ပဵၼ်မၢၵ်ႇၽႂ် ၼမ်ႉမိုဝ်းၽႂ်ႁဵတ်း ဢၼ်ဝႃႈၼၼ်ႉ ပႆႇလႆႈႁူႉ ဝႃႈၼႆ။
“ယူႇတီႈႁဝ်းၶႃႈ လၢမ်းၶၢတ်ႇတူၺ်းတႄႉ မၼ်းၸႂ်ႈဢမ်ႇၽႂ် လိူဝ်သေ ပလိၵ်ႈသိုၵ်းမၢၼ်ႈ ၶဝ်ၼၼ်ႉၵူၺ်း။ ယၢမ်းၵၢင်ၼႂ်မွၵ်ႈ 4 မူင်းၶိုင်ႈ မိူဝ်ႈဝႃးၼႆႉ ၶဝ်ၶီႇၵႃး ပၼ်ႇၸွမ်းဝဵင်း ၶဝ်ႈဝဵင်းဢွၵ်ႇဝဵင်းၵႃး 3 လမ်း။ ၵွၼ်ႇမၢၵ်ႇတေတႅၵ်ႇၼၼ်ႉၵေႃႈ ၶဝ်ယင်း ပၼ်ႇၵႂႃႇ တၢင်းၵၢတ်ႇၼၼ်ႉယူႇ။ တွၼ်ႈတႃႇ ၵူၼ်းမိူင်း ၵူၼ်းၼုမ်ႇၶဝ် တေႁဵတ်းတႄႉ ဢမ်ႇပဵၼ်လႆႈ လိူဝ်သေ ၶဝ်ၶႂ်ႈၵဝ်း ႁဵတ်းႁႂ်ႈဝၢၼ်ႈမိူင်းသုၵ်းယုင်ႈဢူၼ်ၵဝ်းၵူၺ်း”- ၵူၼ်းပိုၼ်ႉတီႈ ၵေးသီး သိုပ်ႇလၢတ်ႈၼႄၼင်ႇၼႆ။
ၵူၺ်းၵႃႈ ယူႇတီႈၵူၼ်းမိူင်းၵေးသီး ၵမ်ႈၼမ်တႄႉ ဢွၼ်ၵၼ်တူၵ်းၸႂ်သေ မႆႈၸႂ်လွင်ႈႁူမ်ႇလူမ်ႈၵၼ် ၵူဝ်ပလိၵ်ႈသိုၵ်းမၢၼ်ႈ ထၢင်ႇထိူမ် ႁိူၼ်းၼႆႉ ႁိူၼ်းၼၼ်ႉၼႆသေ သွၵ်ႈတဝ် ၼႂ်းႁိူၼ်းၵူၼ်းဝၢၼ်ႈ ၸိူဝ်းၼႆႉ။
“ပေႃးမႃးတူၺ်း ယၢမ်းလဵဝ် ၼႂ်းမိူင်းႁဝ်းၶႃႈၼႆႉ ဢမ်ႇမီးလွင်ႈႁူမ်ႇလူမ်ႈသင်ယဝ်ႉ ပေႃးမီးမၢၵ်ႇတႅၵ်ႇၶိုၼ်ႈမႃးၸိူင်ႉၼႆၵေႃႈ ပလိၵ်ႈတင်း သိုၵ်းမၢၼ်ႈ ဢဝ်တိုဝ်ႉတၢင်းၼႆႉသမ်ႉ ထႅမ်ႁႅင်းၵူၼ်းၶဝ် ဢဝ်ႁူမ်ႇလူမ်ႈၼမ်မႃးထႅင်ႈ ယဝ်ႉၵေႃႈ တေဢွၼ် ၵၼ် သွၵ်ႈတဝ် ၼႂ်းႁိူၼ်းယေးၵူၼ်းဝၢၼ်ႈ တေပဵၼ်ၸိူင်ႉၼႆမႃးၶႃႈယဝ်ႉ”- ၽူႈတူင်ႉၼိုင်ၼႂ်းတူင်ႇဝူင်း ၵေႃႉၼိုင်ႈ လၢတ်ႈ ၼႄၽူႈတွႆႇႁွၵ်ႈ ၼင်ႇၼႆ။
မိူဝ်ႈဝၼ်းတီႈ 28/5/2021 ယၢမ်းဝၢႆးဝၼ်း မွၵ်ႈ 3 မူင်းၶိုင်ႈ မၢၵ်ႇတႅၵ်ႇၼႂ်းဝၢင်းႁူင်းႁဵၼ်း ၸၼ်ႉၵၢင် မၢႆ 2 ဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆး ပွတ်းၸၢၼ်း 2 လုၵ်ႈ လွင်ႈတုမ်ႉတိူဝ်ႉၵူၼ်းမၢတ်ႇၸဵပ်းလူႉတၢႆ ဢမ်ႇမီး။
မိူဝ်ႈဝၼ်းတီႈ 27/5/2021 ယၢမ်းၵၢင်ၶမ်ႈမွၵ်ႈ 8 မူင်းပၢႆ ၼၼ်ႉၵေႃႈ မၢၵ်ႇတႅၵ်ႇတီႈၼႃႈလုမ်းပၢႆးပၺ်ႇၺႃႇ ၸႄႈဝဵင်း မိူင်းၵိုင် လုၵ်ႈၼိုင်ႈ ၼႆယဝ်ႉ။
တႄႇဢဝ်မိူဝ်ႈႁၢင်လိူၼ်ဢေႊၿရိူဝ်ႊမႃး တေႃႇထိုင် ၼႂ်းလိူၼ်မေႊၼႆႉ ၼႂ်းမိူင်းတႆး လၢႆၸႄႈဝဵင်းမိူင်းလွင်ႈမၢၵ်ႇတႅၵ်ႇ မႃး ၶိူဝ်းယႂ်း မိူၼ်ၼင်ႇ ၸွမ်းၵၢတ်ႇ၊ ၸွမ်းယေးငိုၼ်း၊ ၸွမ်းႁူင်းႁဵၼ်း၊ ၸွမ်းလုမ်းပၢႆးပၺ်ႇၺႃႇလႄႈ ၵၢင်ဝဵင်း ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ