ၵူၼ်းမိူင်းၵိုင်  ဢမ်ႇယွမ်းဢဝ် လုၵ်ႈလၢင်းၸဝ်ႈၵဝ်ႇ ၵႂႃႇၾၢၵ်ႇႁူင်းႁဵၼ်း  ယွၼ်ႉပိူဝ်ႈဢမ်ႇဝၢင်းၸႂ်ၼိူဝ် ၶွင်ႇသီႇသိုၵ်း မၢၼ်ႈ မိူၵ်ႈမႂ်ႈ ယိုတ်းမိူင်း ၊ ဢမ်ႇဝၢင်းၸႂ်လွင်ႈႁူမ်ႇလူမ်ႈလုၵ်ႈလၢင်းၸဝ်ႈၵဝ်ႇ ဝႃႈၼႆ။

  ဝၼ်းတီႈ 24-28/5/2021 ၼႆႉ ၶွင်ႇသီႇသိုၵ်းမၢၼ်ႈ  ၸႂ်ႉၵူၼ်းမိူင်း ဢဝ်လုၵ်ႈလၢၼ် ၽႂ်မၼ်းၵႂႃႇၾၢၵ်ႇႁူင်း ႁဵၼ်း ၊  ၵူၺ်းၵႃႈ တီႈႁူင်းႁဵၼ်းၸၼ်ႉသုင် မိူင်းၵိုင်လႄႈ ႁူင်းႁဵၼ်းၸၼ်ႉသုင် ၵိင်ႇၽႄ ဝၢၼ်ႈမၢၵ်ႇႁၢတ်ႇ ပွၵ်ႉ 2 ၸႄႈ ဝဵင်းမိူင်းၵိုင်  တႄႉ တိုၵ်ႉမီး လုၵ်ႈႁဵၼ်းဢၼ်မႃးၾၢၵ်ႇ 100 ၵေႃႉပၢႆၵူၺ်း။

ၵူၼ်း မိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈမိူင်းၵိုင် ႁဝ်းၶႃႈၼႆႉ ဢမ်ႇမီးၽႂ် ဢဝ်လုၵ်ႈဢွၼ်ႇ ၵႂႃႇဢၢပ်ႇၵျွင်း ၶႃႈ။  ယွၼ်ႉပိူဝ်ႈ သြႃႇမ တီႈမိူင်းၵိုင်ႁဝ်းၶႃႈၵေႃႈ ဢွၼ်ၵၼ်ႁဵတ်း CDM ဝႆႉ။  ႁဝ်းၶႃႈ ဢမ်ႇလႆႈၸႂ်သိုၵ်းမၢၼ်ႈယိပ်းမိူင်း။ ႁဝ်းၶႃႈယင်းလူဝ်ႇပၼ်ႁႅင်း ၽူႈႁၢပ်ႇၵၢၼ်လူင်ပွင်ၸိုင်ႈ ဢၼ်ႁဵတ်း CDM ၵွၼ်ႇဢိူဝ်ႈ။ လုၵ်ႈ ဢွၼ်ႇႁဝ်းတူၵ်းလိုၼ်း ႁူင်းႁဵၼ်းပီၼိုင်ႈၵေႃႈ ဢမ်ႇပဵၼ်သင်။  ပေႃးဝၢၼ်ႈမိူင်းသုၵ်ႉမႃး လုၵ်ႈလၢင်းႁဝ်းၶႃႈသမ်ႉ မီးဝႆႉတီႈႁူင်းႁဵၼ်းၼႆ မၼ်းဢမ်ႇၸၢင်ႈႁဵတ်းႁိုဝ်  ၵႂႃႇႁပ်ႉလႆႈၵမ်းလဵဝ်လူး။ ပေႃးမီးတီႈႁိူၼ်းတႄႉ မၼ်းမီးလွင်ႈႁူမ်ႇလူမ်ႈလီၶႃႈဢေႃႈ”- ဝႃႈၼႆ။

မိူဝ်ႈၼႆႉ ဝၼ်းတီႈ 28/5/2021 ႁူင်းႁဵၼ်းၸၼ်ႉသုင် မိူင်းၵိုင် မီးလုၵ်ႈဢွၼ်ႇၵႂႃႇၾၢၵ်ႇ ႁူင်းႁဵၼ်း 3 ၵေႃႉၵူၺ်း။    ၾၢႆႇ ၼိုင်ႈၵေႃႈ ယၢမ်းလဵဝ်ၼႂ်းမိူင်းတႆးသမ်ႉ ဝဵင်းၼိုင်ႈယဝ်ႉ ဝဵင်းၼိုင်ႈ မၢၵ်ႇတႅၵ်ႇၵူႈဝၼ်း ။ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ၊ ၵၢတ်ႇၵူၺ်းဢမ်ႇၶႂ်ႈႁတ်းၵႂႃႇ၊ ထိုင်တီႈ ၵူၼ်းမိူင်းၵိုင် ဢမ်ႇႁတ်းဢဝ်လုၵ်ႈလၢင်းၵႂႃႇၾၢၵ်ႇႁူင်းႁဵၼ်း  ။

တႄႇဢဝ် ဝၼ်းတီႈ 24-28/5/2021 ၼႂ်းၶၢဝ်းတၢင်း 5 ဝၼ်းၼႆႉ လုၵ်ႈဢွၼ်ႇ ဢၼ်ၵႂႃႇဢၢပ်ႇႁူင်းႁဵၼ်းတီႈၸၼ်ႉသုင် မိူင်း ၵိုင် မီးမွၵ်ႈ 60 ၵေႃႉ၊ ႁူင်းႁဵၼ်းၸၼ်ႉသုင်ၵိင်ႇၽႄ ဝၢၼ်ႈမၢၵ်ႇႁၢတ်ႇ ပွၵ်ႉ 2 မီးမွၵ်ႈ 80 ၵေႃႉ လုၵ်ႈဢွၼ်ႇႁဵၼ်းဢၼ်ၵႂႃႇ ဢၢပ်ႇဝႆႉ ၸိူဝ်းၼႆႉ ၵမ်ႈၼမ် ပဵၼ်လုၵ်ႈလၢၼ် ၽူႈႁၢပ်ႇၵၢၼ်လူင်ပွင်ၸိုင်ႈလႄႈ တပ်ႉသိုၵ်းမၢၼ်ႈ ၼႂ်းၸႄႈဝဵင်းမိူင်းၵိုင် ၵူၺ်း။

မႄႈမေႃသွၼ်တီႈႁူင်းႁဵၼ်းၸၼ်ႉသုင် ၸႄႈတွၼ်ႈလၢင်းၶိူဝ်းၵေႃႉၼိုင်ႈလၢတ်ႈဝႃႈ “ယၢမ်းလဵဝ်ၼႆႉ ဝၢၼ်ႈမိူင်းၵေႃႈသုၵ်ႉ မၢၵ်ႇၵေႃႈတႅၵ်ႇတီႈၼိုင်ႈယဝ်ႉ တီႈၼိုင်ႈ  ။ သိုၵ်းမၢၼ်ႈၼႆႉၶဝ်ၶႂ်ႈၼႄဝႃႈ ၶဝ်ယိပ်းဝၢၼ်ႈမိူင်းလႆႈလီယဝ်ႉၼႆ သေၶိၼ်ၶႂ်ႈ ပိုတ်ႇႁူင်းႁဵၼ်းၼေ၊ ၶႂ်ႈၽၢမ်းတႃလုမ်ႈၾႃႉ ။တီႈတႄႉမၼ်း ၽႂ်ၵေႃႈဢမ်ႇၵႂႃႇၾၢၵ်ႇႁူင်းႁဵၼ်း။ ယႃႇဝႃႈၵူၼ်းမိူင်းလႃႈ တေႃႈၼင်ႇလုၵ်ႈလၢင်းသိုၵ်းၶဝ် ၶဝ်ယင်းဢမ်ႇႁတ်းဢဝ်မႃးၾၢၵ်ႇႁူင်းႁဵၼ်း။  မေးသိုၵ်းၼႆႉ ယင်းဢမ်ႇႁတ်းဢွၵ်ႇ တပ်ႉဢိူဝ်ႈ။ ၵူႈပွၵ်ႈဝၼ်းၵၢတ်ႇၼႆၶဝ်မႃးၸၢႆႇၵၢတ်ႇ ၵႃးသိုၵ်းပဵၼ် 2-3 လမ်းၼႃ ။ ဝၢႆးလင်ၶဝ်သိမ်းဝၢၼ်ႈမိူင်းႁေ ပိူၼ်ႈသုၵ်ႉသၵ်ႉၼႆႉ ၶဝ်ဢမ်ႇႁတ်းမႃးၸၢႆႇၵၢတ်ႇ။ ငိၼ်းဝႃႈ ၵူၼ်းလူင်ၶဝ်ဢမ်ႇပၼ်ဢွၵ်ႇတပ်ႉၼႆၼေႈ ။ ၵွပ်ႈၼႆ ပႆႇမီးၽႂ်ႁတ်းၵႂႃႇၾၢၵ်ႇႁူင်းႁဵၼ်းလူင်” ဝႃႈၼႆ။

 ဝဵင်းလၢင်းၶိူဝ်း ဝဵင်းၸႄႈတွၼ်ႈၼႆႉတင်ႈဢဝ်လိူၼ်ၾႅပ်ႉပိဝ်ႊရီႊမႃး ဝၢႆးလင်သိုၵ်းမၢၼ်ႈလိုပ်ႈလမ်းတီႉၺွပ်းၵူၼ်းၼုမ်ႇၸိူဝ်းဢွၵ်ႇၼႄၵၢင်ၸႂ်ယဝ်ႉ  ဢမ်ႇမီးလွင်ႈၼႄၵၢင်ၸႂ် ထႅင်ႈၸိူင်ႉႁိုဝ်။  မေႃသွၼ်ၵေႃႈဢမ်ႇႁဵတ်း CDM ။ ဢၼ်မႃးၾၢၵ်ႇႁူင်းႁဵၼ်းၵေႃႈမီးယူႇလုၵ်ႈလၢင်းမေႃသွၼ်ၵမ်ႈၽွင်ႈလႄႈ လုၵ်ႈလၢင်းၸိၵ်းၸွမ်ၼႂ်းတပ်ႉသိုၵ်း 4-5 ၵေႃႉ ၊ဢၼ်မီးသိုၵ်းယိပ်းၵွင်ႈၸေးမိုဝ်း ဢဝ်ႁူမ်ႇလူမ်ႈတဵမ်လမ်းရူတ်ႉၵႃးမႃးၾၢၵ်ႇႁူင်းႁဵၼ်း ၵူၼ်းယူႇႁိမ်းၵၢတ်ႇလၢင်းၶိူဝ်းလၢတ်ႈ။ ၵူၼ်းမိူင်းပိုၼ်ႉတီႈတႄႉယွၼ်ႉပိူဝ်ႈမႆႈၸႂ်လွင်ႈႁူမ်ႇလူမ်ႈလုၵ်ႈလၢင်းၼႆသေ ႁူင်းႁဵၼ်းၼွၵ်ႈဝဵင်းၼႂ်းဝဵင်းၵူႈတီႈ ဢမ်ႇမီးပေႃႈမႄႈလုၵ်ႈဢွၼ်ႇမႃးၾၢၵ်ႇႁူင်းႁဵၼ်း။  

ယၢမ်းလဵဝ် ၼႂ်းၸႄႈမိူင်းတႆးလၢႆလၢႆၸႄႈဝဵင်းမၢၵ်ႇတႅၵ်ႇ ႁိမ်းလုမ်းပၢႆးပၺ်ႇၺႃႇ လႄႈႁူင်းႁဵၼ်း  ၶိူဝ်းယႂ်း။ၵွပ်ႈၼႆ ၵူၼ်းဝၢၼ်ႈၵူၼ်ႈမိူင်းဢမ်ႇႁတ်းဢဝ်လုၵ်ႈလၢင်းၸဝ်ႈၵဝ်ႇၵႂႃႇၾၢၵ်ႇႁူင်းႁဵၼ်း  ။

တႄႇဝၼ်းတီႈ 1/2/2021 ဝၢႆးၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼၼ်ႉသေ ယူႇတီႈၽူႈႁၢပ်ႇၵၢၼ် လူင်ပွင် ၸိုင်ႈ ဢွၼ်ၵၼ်တူင်ႉၼိုင်ႁဵတ်း CDM ၵၼ်မႃးတင်းၼမ် တေႃႇထိုင်ဝၼ်းမိူဝ်ႈၼႆႉ။