တႄႇဢဝ်လိူၼ်ဢေႊၿရိူဝ်ႊမႃး တေႃႇထိုင်လိူၼ်မေႊၼႆႉ ၼႂ်းၸႄႈဝဵင်းမူႇၸေႊ မၢၵ်ႇတႅၵ်ႇ ၶိူဝ်းယႂ်း၊ မိူဝ်ႈဝႃးၼႆႉၵူၺ်း မၢၵ်ႇတႅၵ်ႇထပ်းၵၼ် သၢမ်တီႈ လႄႈ ႁဵတ်းႁႂ်ႈၵူၼ်းမိူင်း မႆႈၸႂ် လွင်ႈႁူမ်ႇလူမ်ႈ။
ဝၼ်းတီႈ 26/5/2021 ယၢမ်းဝၢႆးဝၼ်း 3 မူင်း ထိုင် 4 မူင်း မၢၵ်ႇတႅၵ်ႇတီႈၼႃႈႁူင်းယႃလႄႈ ႁိမ်းႁူင်းႁဵၼ်းၸၼ်ႉသုင် မၢႆ 3 သွင်လုၵ်ႈ၊ တီႈလုမ်း ၸယၽ ၾၢႆႇႁူမ်ႇလူမ်ႈသိုၵ်း လုၵ်ႈၼိုင်ႈ။
ၵူၼ်းပိုၼ်ႉတီႈ မူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တႅၵ်ႇ 3 လုၵ်ႈ ၶႃႈဢေႃႈ မိူဝ်ႈဝႃးၼႆႉ တႃႇသွင်လုၵ်ႈၼၼ်ႉ တႄႉ တႅၵ်ႇတီႈႁိမ်းႁူင်းႁဵၼ်းၸၼ်ႉသုင် မၢႆ 3 လုၵ်ႈၼိုင်ႈလႄႈ တီႈႁိမ်းႁူင်းပလိၵ်ႈၸယၽ လုၵ်ႈၼိုင်ႈ”- ဝႃႈၼႆ။
ဢၼ်မၢၵ်ႇတႅၵ်ႇၼႆႉ ဢမ်ႇတိူဝ်ႉမၢတ်ႇၵူၼ်းသေတႃႉ တိူဝ်ႉပၢႆးၸႂ် ႁဵတ်းႁႂ်ႈၵူၼ်းမိူင်း တူၵ်းၸႂ်ၵူဝ်ႁႄ။ ပဵၼ်ၼမ်ႉမိုဝ်းၽႂ် ၸုမ်းလႂ် ႁၢင်ႈၵၢင် ပွႆႇတႅၵ်ႇ ဢမ်ႇႁူႉသေတႃႉ ၵမ်ႈၼမ်ႉတႄႉထတ်းသၢင်ဝႃႈ လႅပ်ႈပဵၼ်ၾၢႆႇသိုၵ်းၶဝ် ဝၢင်းၽႅၼ်ၵူၺ်းဝႃႈၼႆ။
“မိူၼ်ၼင်ႇတီႈမိူင်းယႆၵေႃႈတႅၵ်ႇ တၢင်ႇဝဵင်းၵေႃႈတႅၵ်ႇ မိူၼ်တီႈမူႇၸေႊႁဝ်းၼႆႉၵူၺ်း။ လႅပ်ႈပဵၼ် ၽႅၼ်ၵၢၼ်ၶဝ် ၶိုင်ႁႂ်ႈသုၵ်ႉ ပေႃးသုၵ်ႉၵေႃႈ တေၶဵင်ႈၶႅင် ၵူတ်ႇထတ်း ၵူၼ်းၵႂႃႇမႃး သေ ၵိၼ်ၼမ်ႉတူၵ်းၼမ်ႉယွႆႉမၼ်းၼၼ်ႉၶႃႈၼႃႇ” – ၼႆ ၵူၼ်းယူႇမူႇၸေႊၵေႃႉၼိုင်ႈလၢတ်ႈထႅင်ႈၼင်ႇၼႆ။
တီႈဝဵင်းမူႇၸေႊၼႆႉ မိူဝ်ႈဝၼ်းတီႈ 16/5/2021 ၼၼ်ႉ မၢၵ်ႇတႅၵ်ႇတီႈ ႁိမ်းယေးငိုၼ်းဢိၼ်းဝ ဢၼ်မီးတီႈပွၵ်ႉၵၢတ်ႇ။ မိူဝ်ႈဝၼ်းတီႈ 5/5/2021 ၼၼ်ႉသမ်ႉ တႅၵ်ႇတီႈႁေႃယၢမ်းမူင်း(ၵၢင်ဝဵင်း) လုၵ်ႈၼိုင်ႈ၊ တီႈပွၵ်ႉၼိူဝ် သွင်လုၵ်ႈ၊ မိူဝ်ႈဝၼ်းတီႈ 22/4/2021 ၼၼ်ႉသမ်ႉ တႅၵ်ႇတီႈႁေႃယၢမ်းမူင်း(ၼႃႇယီႇၸိၼ်ႇ) ၵၢင်ဝဵင်း မူႇၸေႊ 3 လုၵ်ႈထပ်းၵၼ်။
ဝၢႆးၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်း မိူဝ်ႈဝၼ်းတီႈ 1/2/2021 ၼၼ်ႉမႃး ဝၢၼ်ႈမိူင်း ဢမ်ႇၼိမ် သဝ်း မၢၵ်ႇၵႆႉတႅၵ်ႇ၊ ၾႆးၵႆႉမႆႈ၊ ၵူၼ်းမိူင်းထုၵ်ႇယိုဝ်းတၢႆ ထုၵ်ႇတီႉၺွပ်း ၸိူဝ်းၼႆႉ မီးမႃးတင်းၼမ် ။