ၶွမ်ႊပၼီႊႁူင်ပင်း တဵၵ်းဢဝ်လၢႆ တီႈလိၼ် ၵူၼ်းမိူင်းတႃႈၶီႈလဵၵ်းၵူၺ်းဢမ်ႇၵႃး ၼႄးဝႃႈၸဝ်ႈ သြႃႇ ဝတ်ႉႁွင်ႈလိုၵ်ႉ ဢွၼ်ႁူဝ်ၵူၼ်းဝၢၼ်ႈ ယႃႉႁူဝ်ႉတီႈလိၼ်ၶဝ်ၼႆသေ ဢဝ်လိူင်ႈၸွႆးတြႃးထႅင်ႈ။
မိူဝ်ႈဝၼ်းတီႈ 24/5/2021 ၼႆႉ ၾၢႆႇသင်ၶၼႃႇယၵ ဝတ်ႉသၢႆမိူင်း လႆႈသူင်ႇလိၵ်ႈၸူး ၸဝ်ႈသြႃႇပၢၼ်းသူၺ်ႇ ၽူႈၵွၼ်းဝတ်ႉ ႁွင်ႈလိုၵ်ႉဝၢၼ်ႈႁွင်ႇ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ။ တႅမ်ႈဝႆႉဝႃႈ ၵဵဝ်ႇလူၺ်ႈလွင်ႈ ၸဝ်ႈသြႃႇဢွၼ်ႁူဝ်ၵူၼ်းဝၢၼ်ႈ ၸဝ်ႈသူၼ်ႁႆႈၼႃးၵႂႃႇယႃႉႁူဝ်ႉ ဢၼ်ၶွမ်ႊပၼီႊႁူင်ပၢင်း လွမ်ႉဝႆႉၼၼ်ႉ ၽိတ်းဝိၼႆး သင်ၶၸဝ်ႈ၊ ၵွပ်ႈၼႆ ယူႇတီႈၶွမ်ႊပၼီႊႁူင်ပင်း ပိုတ်ႇလိူင်ႈၸွႆး တြႃး ၸဝ်ႈသြႃႇ ပၢၼ်းသူၺ်ႇဝႆႉ- ဝႃႈၼႆ။
ၸဝ်ႈသြႃႇ ပၢၼ်းသူၺ်ႇ ၽူႈၵွၼ်းဝတ်ႉႁွင်ႈလိုၵ်ႉ လၢတ်ႈတီႈၽူႈတွႆႇႁွၵ်ႈဝႃႈ -“ၶဝ်ပၼ်လိၵ်ႈမႃးတီႈၸဝ်ႈဝႃႈ ၸွႆးတြႃးႁဝ်း ၸဝ်ႈၼႆဝႃႇ။ ဝၼ်းတီႈ 28 ၼႆႉ ႁႂ်ႈၵႂႃႇတီႈဝတ်ႉသၢႆမိူင်းၼႆဝႃႇ။ ၶဝ်ၼႄးဝႃႈ ယွၼ်ႉႁဝ်းၸဝ်ႈဢွၼ်ႁူဝ်ၵူၼ်းဝၢၼ်ႈသေ ၵႂႃႇယႃႉ ႁူဝ်ႉၶဝ် ဢၼ်မႃးလွမ်ႉဝႆႉၼၼ်ႉလႄႈၸွႆးတြႃးၼႆဝႃႇ။ တီႈလိၼ်ၼၼ်ႉပဵၼ်ၶွင်ၵူၼ်းဝၢၼ်ႈ ႁဵတ်းၵိၼ်ၵၢၼ်မႃး ပီႈယၢဝ်း ၶၢဝ်းႁိုင် ၸဵမ်ပၢၼ်ႇပူႇပၢၼ်မွၼ်ႇၶဝ်ပုၼ်ႉ။ ၶဝ်သမ်ႉဝႃႈ ပဵၼ်တီႈလိၼ်ၶဝ်ၸိူင်ႉႁိုဝ် ။ ၸွင်ႇႁဝ်းၵႂႃႇႁိမ်ဢဝ်လိၼ်ၶဝ် ၽႅဝ် ၼေႇပျီႇတေႃႇ ယၼ်ႇၵုင်ႇပုၼ်ႉၵေႃႈဢမ်ႇၸႂ်ႈ။ မၼ်းပဵၼ်လိၼ်ၵူၼ်းဝၢၼ်ႈလူး”- ဝႃႈၼႆ။
ၶွမ်ႊပၼီႊႁူင်ပင်း တင်း ၽူႈၵွၼ်းၸႄႈတွၼ်ႈတႃႈၶီႈလဵၵ်း ႁူမ်ႈၵၼ်သေ ပိုတ်ႇလိူင်ႈၸွႆးတြႃး ၸဝ်ႈသြႃႇပၢၼ်းသူၺ်ႇ၊ ယဝ်ႉသူင်ႇလိၵ်ႈၸူးတီႈၾၢႆႇသႃသၼႃသေ ယူႇတီႈၾၢႆႇသႃသၼႃႇ သူင်ႇလိၵ်ႈၸုမ်း သင်ၶၼႃယၵ တီႈဝတ်ႉသၢႆမိူင်း ၼႆယဝ်ႉ။
ပေႃးထိုင်မႃး ဝၼ်းတီႈ 28/5/2021 ၼႆႉၸိုင် ယူႇတီႈၵူၼ်းဝၢၼ်ႈ တၵ်ႉၵႃႇသတ်ႉထႃး ၼႂ်းဝၢၼ်ႈႁွင်ႇ ၼႂ်းဢိူင်ႇႁွင်ႈလိုၵ်ႉ တေဢွၼ်ၵၼ် ၵႂႃႇတင်းမူႇဝၢၼ်ႈ တီႈဝတ်ႉသၢႆမိူင်း ၼႆယဝ်ႉ။
ၵူၼ်းၼႂ်းဢိူင်ႇႁွင်ႈလိုၵ်ႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးထိုင်ဝၼ်းတီႈ 28 ၼႆႉ ႁဝ်းၶႃႈ တေဢွၼ်ၵၼ်ၵႂႃႇ တီႈ ဝတ်ႉသၢႆမိူင်းတင်းဝၢၼ်ႈၶႃႈဢေႃႈ။ တၢင်းၾၢႆႇပုၼ်ႉၼၼ်ႉသမ်ႉဝႃႈ သင်ၵူၼ်းဝၢၼ်ႈမႃးတင်းမူတ်း တေဢမ်ႇပၼ်ၶဝ်ႈ ၼႂ်း ဝတ်ႉသၢႆမိူင်းၼႆဝႃႇ။ ပဵၼ်ႁိုဝ်ၵေႃႈ ႁဝ်းၶႃႈ တိုၼ်းတေၵႂႃႇၶႃႈဢေႃႈ လိၼ်သူၼ်ႁႆႈၼႃးႁဝ်းၶႃႈလူင် ဢၼ်ၶဝ် ဢထမ်ႇမ တဵၵ်းတဵင်ဢဝ်လၢႆၵႂႃႇ သမ်ႉၶိုၼ်းမႃးႁဵတ်းတေႃႇႁဝ်းၸိူင်ႉၼႆၼႆႉ”- ဝႃႈၼႆ။
မိူဝ်ႈဝၼ်းတီႈ 9/4/2021 ၼၼ်ႉ ယူႇတီႈပလိၵ်ႈမၢၼ်ႈ/ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ဢဝ်ႁူမ်ႇလူမ်ႈပၼ် ၶွမ်ႊပၼီႊႁူင်ပင်း လွမ်ႉႁူဝ်ႉ တီႈလိၼ်ၵူၼ်းမိူင်း ဢၼ်ဝႃႈ ပဵၼ်တီႈလိၼ် ၶွမ်ႊပၼီႊၶဝ်ၼၼ်ႉ လွမ်ႇဢဝ်ပႅတ်ႈ ဝႃႈၼႆ။
မိူဝ်ႈပီ 1998-1999 မိူဝ်ႈပၢၼ်သိုၵ်းၽွင်းငမ်းဝၢၼ်ႈမိူင်းၼၼ်ႉ ၶဝ်ဢထမ်ႇမတဵၵ်းဢဝ်လၢႆတီႈလိၼ်ၵူၼ်းဝၢၼ်ႈ ၼႂ်းဢိူင်ႇႁွင်ႈလိုၵ်ႉ ၸႄႈဝဵင်းတႃႈၶီႈလဵၵ်းၼႆႉ တႃႇ 100 ဢေႊၶိူဝ်ႊသေ ပၼ်ၶွမ်ႊပၼီႊႁူင်ပင်းၸႂ်ႉ ဢဝ်ႁဵတ်းႁူင်းၸၢၵ်ႈ ထူင်ယၢင် တႃႇ 20 ဢေႊၶိူဝ်ႊ။ ၵမ်းၼႆႉ ၵိုတ်းထႅင်ႈ 80 ဢေႊၶိူဝ်ႊၼၼ်ႉ ၸဝ်ႈၶွင်သူၼ်ႁႆးၼႃႈ ၶိုၼ်းၽုၵ်ႈသွမ်ႈၵိၼ်ၼႂ်းမၼ်းမႃးၶိုၼ်း။
မိူဝ်ႈပီ 2018 ၼၼ်ႉ ယူႇတီႈၻွၵ်ႊတိူဝ်ႊလိၼ်းထုတ်ႉ ၸွမ်ၽွင်းလူင် မိူင်းတႆးလၢတ်ႈဝႃႈ တီႈလိၼ်သူၼ်ႁႆးၼႃး ၵူၼ်းမိူင်း ဢၼ်ထုၵ်ႇႁုပ်ႇယိုတ်းဢဝ်ၵႂႃႇၼၼ်ႉ သင်ဝႃႈ ဢမ်ႇၽုၵ်ႇသွမ်ႈသင်ၼႆ ပၼ်ၶိုၼ်းၸဝ်ႈၶွင်တီႈလိၼ်ၶိုၼ်းၼႆသေ ၵူၼ်းဝၢၼ်ႈၶိုၼ်ႈလုမ်းတြႃး တေႃႇသူႈ ဢွင်ႇပေႉမႃးယဝ်ႉသေတႃႉ ၶွမ်ႊပၼီႊ ဢမ်ႇယွမ်းပၼ်ၶိုၼ်း။ ၵူၼ်းမိူင်းသမ်ႉတုၵ်းယွၼ်းမႃးၶိူဝ်းယႂ်းထိုင်တီႈၶွမ်ႊပၼီႊဢဝ်ႁႅင်းပလိၵ်ႈလႄႈသိုၵ်းမႃးလွမ်ႉႁူဝ်ႉဢဝ်မိူဝ်ႈႁူဝ်လိူၼ်ၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ