မိူဝ်ႈၼႆႉ ဝၼ်းတီႈ 19/5/2021 ယၢမ်းၵၢင်ၼႂ် မွၵ်ႈ 6:15 မူင်း သဵင်ၵွင်ႈတႅၵ်ႇ တီႈႁိမ်းဝၢၼ်ႈၼမ်ႉဢုၼ်ႇ/ ၵဵတ်ႉၼမ်ႉဢုၼ်ႇ သဵၼ်ႈတၢင်း သႅၼ်ဝီ – လႃႈသဵဝ်ႈ ၼႂ်းၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ ၵူၼ်းဝၢၼ်ႈ ႁိမ်းႁွမ်းၸိူဝ်းၼၼ်ႉ လႆႈငိူင်ႉပၢႆႈ ၽေးသိုၵ်း တင်းၼမ်။
ၵူၼ်းပိုၼ်ႉတီႈ ပွတ်းၼမ်ႉဢုၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သဵင်ၵွင်ႈတႅၵ်ႇၸဵမ်ၸဝ်ႉၶႃႈ။ ပဵၼ် သိုၵ်းမၢၼ်ႈ တင်းၸုမ်းလႂ်တႄႉ ဢမ်ႇႁူႉ သိုၵ်းမၢၼ်ႈ ၸႂ်ႉၵွင်ႈလူင်ယိုဝ်းဢမ်ႇထၢတ်ႇၶႃႈ။ သဵင်ၵွင်ႈတႄႉ ဢမ်ႇမီး ၵႃႈႁိုဝ် ယိုဝ်းၵႂႃႇ တၢင်းဝၢၼ်ႈၼွင်သႅင်လႄႈ မိူင်းပႃး ၼၼ်ႉၶႃႈဢေႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ ၵူၼ်းမိူင်း ပိုၼ်ႉတီႈ ႁိမ်းႁွမ်း ၸိူဝ်းၼၼ်ႉ ၵမ်ႈၽွင်ႈလႆႈပၢႆႈၶဝ်ႈ ဝဵင်းသႅၼ်ဝီ ၵမ်ႈၽွင်ႈလႆႈ ပၢႆႈၵႂႃႇ တၢင်း လႃႈသဵဝ်ႈၵေႃႈမီး ဝႃႈၼႆ။
“ၵူၼ်းမိူင်း ၸိူဝ်းယူႇႁိမ်းၼွင်သႅင် တၢင်းၽႄမိူင်းပႃးၸိူဝ်းၼၼ်ႉ ၵမ်ႈၽွင်ႈပၢႆႈၵႂႃႇလႃႈသဵဝ်ႈ ၵမ်ႈၽွင်ႈပၢႆႈၵႂႃႇဝဵင်း သႅၼ် ဝီၶႃႈ။ ယွၼ်ႉဝႃႈ မၢၵ်ႇၼႆႉ တူၵ်းၸမ်ဝၢၼ်ႈၼႃႇလႄႈ ၸိူဝ်းမီးလုၵ်ႈဢွၼ်ႇလဵၵ်ႉၵေႃႈ ၵူဝ်သေ ပၢႆႈဝႆႉၽွင်ႈၶႃႈဢေႃႈ”- ၵူၼ်း ၼမ်ႉဢုၼ်ႇ သိုပ်ႇလၢတ်ႈၼႄၼင်ႇၼႆ။
ၵဵဝ်ႇၵပ်းလွင်ႈၼႆႉ မိူဝ်ႈၶမ်ႈဝႃး သိုၵ်းဢူၺ်းလီပွတ်းႁွင်ႇ ႁွတ်ႈၽႅဝ်ဝႆႉတီႈ ဝၢၼ်ႈၵွင်းႁုင်း တင်းၼမ် ၵူၼ်းပိုၼ်ႉတီႈၼမ်ႉ ဢုၼ်ႇလၢတ်ႈ။
“မိူဝ်ႈဝႃးၼႆႉ ငိၼ်းၶၢဝ်ႇတႄႉ သိုၵ်းလွႆ မႃးႁွတ်ႈၽႅဝ်ဝႆႉတီႈ ၵွင်းႁုင်းၼႆၶႃႈ။ ယွၼ်ႉၼၼ်လႄႈ မိူဝ်ႈၼႆႉ ၸဵမ်ၸဝ်ႉ သဵင်ၵွင်ႈတႅၵ်ႇႁိုဝ် ဢမ်ႇႁူႉ။ ၵူၺ်းၵႃႈ ပဵၼ်ၸုမ်းလႂ်တႄႉတႄႉ ဢၼ်ဝႃႈၼၼ်ႉ ဢမ်ႇလႆႈႁူႉတႅတ်ႈတေႃးလီၶႃႈ”- ဝႃႈၼႆ။
သဵင်ၵွင်ႈတႅၵ်ႇတီႈႁိမ်းၵဵတ်ႉၼမ်ႉဢုၼ်ႇ တႄႇဢဝ် မိူဝ်ႈၼႆႉ ယၢမ်းၵၢင်ၼႂ်ၸဝ်ႉ တႄႇပဵၼ်ပိုတ်းယိုဝ်းၵၼ်ႁၢဝ်ႈႁႅင်း ၵူၺ်းၵႃႈ ယိုဝ်းပဵၼ်ပွၵ်ႈ ပဵၼ်ၵမ်း ယၢၼ်ၵၼ် 30 မိၼိတ်ႉ 1 ၸူဝ်ႈမူင်း ၶိုၼ်းယိုဝ်းထႅင်ႈ တေႃႇထိုင်ယၢမ်းလဵဝ်ၼႆႉ သဵင်ၵွင်ႈတိုၵ်ႉ တႅၵ်ႇယူႇ ၵူၼ်းပိုၼ်ႉတီႈ သႅၼ်ဝီ ၵေႃႉၼိုင်ႈလၢတ်ႈၼႄၼင်ႇၼႆ။