ၶွင်ႇသီႇသိုၵ်းမၢၼ်ႈ သိုပ်ႇတီႉၺွပ်းၵူၼ်းၼုမ်ႇ ၼႂ်းၸႄႊဝဵင်းၵဵင်းတုင်ဢမ်ႇထၢတ်ႇ ၶဝ်ႈတီႉၺွပ်းထိုင်ႁိူၼ်းၵူႈဝၼ်း ယဵပ်ႇၶွၵ်ႈဢဝ်လိူင်ႈဝႆႉတင်းမူတ်းမီး 20 ၵေႃႉယဝ်ႉ ဝႃႈၼႆ။
ဝၼ်းတီႈ 13-14/5/2021 သွင်ဝၼ်းထပ်းၵၼ် သိုၵ်းမၢၼ်ႈ ၸႂ်ႉလၢႆးႁုၵ်းႁၢႆႉ ၶဝ်ႈတီႉၺွပ်း ၵူၼ်းၼုမ်ႇၵဵင်းတုင် ၽႅဝ်ၼႂ်းႁိူၼ်းယေး တင်းမူတ်း တီႉၵႂႃႇ 5 ၵေႃႉ။ ပဵၼ် မွင်ႇသေႇယႃႇလိၼ်း၊ မွင်ႇၶျၢၼ်းမေႉ၊ မွင်ႇလိၼ်းထိၼ်ႇၵျေႃႇ၊ မွင်ႇဢႃႇၵႃႇႁဵင်း၊ မွင်ႇဝုၼ်ႇၼႃႉဢွင်ႇလႄႈ မွင်ႇၸေႃးၵျႅၵ်ႉ သၢၼ်းပႃႇဝႃႇ ၸိူဝ်းၼႆႉ။
ၵူၼ်းၼုမ်ႇ ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ ၵူၼ်းၼုမ်ႇတီႈၵဵင်းတုင်ႁဝ်းၶႃႈ မၢၼ်ႈမႃးတီႉၵႂႃႇထႅင်ႈ 5 ၵေႃႉယဝ်ႉ။ တင်ႈတႄႇသိုၵ်းမၢၼ်ႈ ယိုတ်းမိူင်းမႃး တေႃႇထိုင်ယၢမ်းလဵဝ်ၼႆႉ ၵူၼ်းၼုမ်ႇၺႃးတီႉၺွပ်းၵႂႃႇမီး 30 ပၢႆယဝ်ႉၶႃႈဢေႃႈ။ ၵူၺ်းၵႃႈ ထုၵ်ႇပွႆႇတူဝ်ဢွၵ်ႇမႃးၶိုၼ်းၽွင်ႈယူႇ။ ယၢမ်းလဵဝ် ၵိုတ်းဝႆႉ 19 ၵေႃႉ ပႆႇပွႆႇ”- ဝႃႈၼႆ။
ၵူၼ်းၼုမ်ႇ 5 ၵေႃႉ ဢၼ်ထုၵ်ႇတီႉၺွပ်းၵႂႃႇ မိူဝ်ႈဝၼ်းတီႈ 13-14/5/2021 ၼၼ်ႉ တႃႇ 3 ၵေႃႉ ထုၵ်ႇဢဝ်လိူင်ႈ လူၺ်ႈ မတ်ႉတႃ 505 (က) လႄႈ 19 (စ) ။ ထႅင်ႈသွင်ၵေႃႉၼၼ်ႉသမ်ႉ ထုၵ်ႇဢဝ်လိူင်ႈလူၺ်ႈ မတ်ႉတႃ 436 ၼႆယဝ်ႉ။
“တီႈၵဵင်းတုင်ၼႆႉ တင်ႈတႄႇသိုၵ်းမၢၼ်းယိုတ်းဢႃႇၼႃႇမႃး ၵူၼ်းမိူင်း ၺႃးလမ်းၸွပ်ႇႁႃတီႉၺွပ်းယူႇၶိူဝ်းၶိူဝ်းယႂ်းယႂ်း၊ ဢၼ်ပွႆႇဢွၵ်ႇမႃးၼႆႉ ၵမ်ႈၼမ်ႈပဵၼ်ၵူၼ်းၵႄႇ၊ ၵူၼ်းၶၢဝ်ႉၵူၺ်း ဢၼ်တီႉၺွပ်းၶင် ယူႇဝႆႉသမ်ႉပဵၼ်ၵူၼ်းၼုမ်ႇ ၊ ပွင်ႇဝႃႈသိုၵ်းမၢၼ်ႈၶဝ် ၵူဝ်ၵူၼ်းၼုမ်ႇလႄႈ ၵူဝ်ဢဵၼ်ႁဵင်းၵူၼ်းၼုမ်ႇဢွၵ်ႇမႃးတူင်ႉၼိုင်တေႃႇသူႈၶဝ်ထႅင်ႈလႄႈ ၸင်ႇသိုပ်ႇတီႉ ၺွပ်းၶင်ဝႆႉပဵၼ်တႃႇလွၵ်ႇငိုတ်ႈ”- ၵူၼ်းၼုမ်ႇ ၵဵင်းတုင် သိုပ်ႇလၢတ်ႈၼႄၼင်ႇၼႆ။
ၵူၼ်းၼုမ်ႇ ၵဵင်းတုင် 19 ၵေႃႉ ဢၼ် သိုၵ်းမၢၼ်ႈ ပႆႇပွႆႇတူဝ်ထိုင်ယၢမ်းလဵဝ်တႄႉပဵၼ် မေႃသွၼ် ၼၢင်းသႅင်လႃႈ (ႁွင်ႉ) မီဆော ၺႃးတီႉမိူဝ်ႈဝၼ်းတီႈ 9/2/2021 ၊ မၶျေႃး (ႁွင်ႉ) တေႃႇၶိၼ်ႇမမလၢႆႇ ၺႃးတီႉမိူဝ်ႈ 9/2/2021 ၊ ဢူး မိၼ်ႉသူဝ်း ၺႃးတီႉမိူဝ်ႈ 9/2/2021 ၊ ဢူးမူဝ်းဢွင်ႇ ၺႃးတီႉ မိူဝ်ႈ 9/2/2021 ၊ ၸၢႆးဝုၼ်းတိပ်ႉ ၺႃးတီႉမိူဝ်ႈ 11/2/2021 ၊ မဢႃးပူဝ်ႇ ၺႃးတီႉမိူဝ်ႈ 12/2/2021 – ၸိူဝ်းၶဝ် ထုၵ်ႇဢဝ်လိူင်ႈလူၺ်ႈမၢႆမီႈ ၽေးသၽႃႇဝ ( ဘေး/စီမံဖြင့် အမှု ဖွင့်ထား) ဝႆႉ။
လိူဝ်ၼၼ်ႉ မွင်ႇၵျူးလီႇ ၺႃးတီႉမိူဝ်ႈ 15/2/2021 ၊ ၼၢင်းၶမ်းၽူးမဵတ်ႈ ၺႃးတီႉမိူဝ်ႈ 15/2/2021 မယုၼ်းလေႉၼၼ်ႇတႃႇ ၺႃးတီႉမိူဝ်ႈ 15/2/2021 ၊ဢူးဢေးၵူဝ်ႇ ၺႃးတီႉမိူဝ်ႈ 11/3/2021 ၊ၵူဝ်ႇတွႆႇတႃႇၵျၢႆႇ/ ကိုတွယ်တာကြိုင် ၺႃးတီႉမိူဝ်ႈ 11/2/2021 ၸၢႆးငႄႇ ၺႃးတီႉမိူဝ်ႈ 23/4/2021 ဢွင်ႇၼၢႆႇမိၼ်ႉလေး ၺႃးတီႉမိူဝ်ႈ 23/4/2021၊ သေႇယလိၼ်း ၺႃးတီႉမိူဝ်ႈ 13/5/2021၊ ၶျၢၼ်းမေႇ ၺႃးတီႉမိူဝ်ႈ 13/5/2021၊ ထိၼ်ႇၵျေႃႇလိၼ်း ၺႃးတီႉမိူဝ်ႈ 13/5/2021 ၊ ဢႃးၵႃႇႁဵင်း ၺႃးတီႉမိူဝ်ႈ 13/5/2021၊ ဝုၼ်ႇၼႃႉဢွင်ႇ ၺႃးတီႉမိူဝ်ႈ 14/5/2021လႄႈ သေႃးၵျႅၵ်ႉသၼ်ႇပႃႇဝႃႇ ၺႃးတီႉမိူဝ်ႈ 14/5/2021 သေ ၸိူဝ်းၶဝ်ၼႆႉသမ်ႉၺႃးဢဝ်လိူင်ႈလူၺ်ႈ 505 (က)ဝႆႉ။
ႁႂ်ႈသိုၵ်းမၢၼ်ႈပွႆႇပၼ်ၶိုၼ်းၵူၼ်းၼုမ်ႇၸိူဝ်းၼႆႉဝႆးဝႆးၼႆသေ ၵူၼ်းၼုမ်ႇၵဵင်းတုင် တႅမ်ႈလိၵ်ႈတုၵ်းယွၼ်းသိုၵ်းမၢၼ်ႈလႆၢလႆၢၵမ်းယဝ်သေတႃႉ ဢမ်ႇမီးလွင်ႈပွႆႇပၼ်ၶိုၼ်း။
