မိူဝ်ႈၼႆႉ ဝၼ်းထီႉ 17 လိူၼ် May ၶၢဝ်းယၢမ်းၵၢင်ဝၼ်း 11 မူင်း ႁွင်ႈၵၢၼ်ၶၢဝ်ႇသိုၵ်းမၢၼ်ႈ မျႃႉဝတီႇ ပိုၼ်ၽၢဝ်ႇသဵၼ်ႈၸိုဝ်ႈ ၵူၼ်းမိူင်းႁူမ်ႈတုမ် ၸိူဝ်းထုၵ်ႇပိုတ်ႇလိူင်ႈၸွႆးတြႃး လူၺ်ႈမတ်ႉတႃ 505 (က) တင်းမူတ်းမီး 20 ၵေႃႉ ပႃးမေႃယႃလုမ်းလႃး (Nurse) မိူင်းတႆးၵေႃႉၼိုင်ႈ။
ၼႂ်း 20 ၵေႃႉၼၼ်ႉ ပႃးၾၢႆႇပၢႆးပိင်ႇၺႃႇ 10 ၵေႃႉလႄႈ ၾၢႆႇပၢႆးယူႇလီ 10 ၵေႃႉ။ၼႂ်းမိူင်းတႆးပႃးၵေႃႉၼိုင်ႈ ၸိုဝ်ႈႁွင်ႉဝႃႈ တေႃႇဢေးတၢဝ်း (င်) ပဵၼ် Nurse ၼၢင်းမေႃယႃလုမ်းလႃး ( အထက်တန်းသူနာပြု) ႁဵတ်းၵၢၼ်ယူႇတီႈ ႁူင်းယႃၸဝ်ႈၸၢမ်ႇထုၼ်း ဝဵင်းတူၼ်ႈတီး ၼႂ်းၸိုင်ႈပွတ်းၸၢၼ်း။
ၼႂ်းဢၼ်သိုၵ်းမၢၼ်ႈပိုၼ်ၽၢဝ်ႇ 20 ၵေႃႉမိူဝ်ႈၼႆႉ ပဵၼ်မေႃယႃ မေႃလုမ်းလႃးလႄႈ ၶူးမေႃယႃလူင်ၼႂ်း ၸႄႈမိူင်းတႆး၊ ၸႄႈမိူင်းယင်း၊ ၸႄႈမိူင်းၶၢင်၊ တိူင်းၸႄႈၵႅင်း၊ ဢေႊရႃႇဝတီႊ၊ ဝဵင်းလိူဝ်ႇ၊ပႃႇၵိူဝ်၊မၵူၺ်း လႄႈ တိူင်းတၼၢဝ်းသီ ၸိူဝ်းၼႆႉ။
မေႃသွၼ်တီႈၸၼ်ႉၸွမ်ဝဵင်းတူၼ်ႈတီး ဢၼ်ၺႃးပိုၼ်ၽၢဝ်ႇသဵၼ်ႈၸိုဝ်ႈ 505 ဝႆႉၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “သိုၵ်းမၢၼ်ႈၼႆႉၶဝ်ပိုၼ်ၽၢဝ်ႇသဵၼ်ႈၸိုဝ်ႈမေႃယႃ မေႃသွၼ် ၶူးမေႃသွၼ်ၸိူဝ်းၼႆႉဝၼ်း 10 ဝၼ်း20 ။ၶဝ်ထၢင်ႇဝႃႈမေႃသွၼ်တေတူၵ်းၸႂ်ၵူဝ်ႁႄသေ ယွၼ်းၶဝ်ႈႁဵတ်းၵၢၼ်ၶိုၼ်းၼႆၶႃႈယူဝ်ႉ။ ၶႃႈတႄႉၺႃးပိုၼ်ၽၢဝ်ႇၸိုဝ်ႈသေတႃႉ ဢမ်ႇတူၵ်းၸႂ်ၵူဝ်ႁႄသင်။ တူဝ်ၶႃႈတေသိုပ်ႇႁဵတ်း CDM ၼႂ်းၵၢၼ်ၶႃႈၵူၺ်းဢမ်ႇၵႃး ၼႂ်းပွၵ်ႉၼႂ်းယွမ်ႇဢၼ်ၶဝ်ၶၢၼ်းမႃးသင်ႇမႃးတင်းမူတ်းၶႃႈတေသိုပ်ႇႁဵတ်း CDM ၵႂႃႇတိၵ်းတိၵ်း တေႃႇပၢင်တိုၵ်းပေႃးဢွင်ႇ။ ၵူင်းၵၢၼ်မိူင်းဢမ်ႇပၼ်ႇလႆႈလႄႈၶဝ်ၵေႃႈပေႃးတေလူႉပင်းယူႇယဝ်ႉၶႃႈ”- ဝႃႈၼႆ။
မေႃသွၼ်ၸၼ်ႉၸွမ်သိုပ်ႇလၢတ်ႈထႅင်ႈဝႃႈ ႁႂ်ႈပေႃႈမႄႈၵူၼ်းမိူင်းတႆးသိုပ်ႇၸွႆႈထႅမ်ပၼ်ႁႅင်းၶႃႈႁၢပ်ႇၵၢၼ်ၶုၼ်ၸိူဝ်းႁဵတ်း CDM ၵႂႃႇ။ သိုၵ်းမၢၼ်ႈၶႂ်ႈသင်ႇသင်ၵေႃႈယဝ်ႉ ဝႆႉၸႂ်ၵႅၼ်ႇၶႅင်ႇ တိုၼ်းဢမ်ႇလူဝ်ႇႁဵတ်းၸွမ်းဝႃႈၼႆ။
ၸုမ်းၸွႆႈထႅမ်ၵူၼ်းတူၵ်းၶွၵ်ႈၵၢၼ်မိူင်းမိူင်းမၢၼ်ႈ AAPP ပိုၼ်ၽၢဝ်ႇဝႆႉ တေႃႇထိုင်ဝၼ်းထီႉ 16 ၼၼ်ႉ သိုၵ်းမၢၼ်ႈပိုၼ်ၽၢဝ်ႇဢဝ်လိူင်ႈ ၵူၼ်းမိူင်း လူၺ်ႈ 505 ၵ မီး 1679 ၵေႃႉ၊ ဢၼ်ၺႃးတီႉၺွပ်းမီး 5086 ၵေႃႉ လႄႈ သိုၵ်းမၢၼ်ႈဢဝ်တၢႆၽွင်းၵႂႃႇၼႄၵၢင်ၸႂ် မီး 796 ၵေႃႉယဝ်ႉ လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ