မၢၵ်ႇတႅၵ်ႇ တီႈႁိမ်းယေးငိုၼ်းဢိၼ်းဝ (ဢိၼ်းဝပၢၼ်ႇ) ဝဵင်းမူႇၸေႊ လုၵ်ႈၼိုင်ႈ လွင်ႈၵူၼ်းမၢတ်ႇၸဵပ်းလူႉတၢႆ ဢမ်ႇမီး ဝႃႈၼႆ။
မိူဝ်ႈဝႃး ဝၼ်းတီႈ 16/5/2021 ယၢမ်းၵၢင်ၶမ်ႈ မွၵ်ႈ 7 မူင်းပၢႆ မၢၵ်ႇတႅၵ်ႇတီႈႁိမ်းယေးငိုၼ်းဢိၼ်းဝ ဢၼ်မီးဝႆႉတီႈပွၵ်ႉၵၢတ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၼၼ်ႉ လုၵ်ႈၼိုင်ႈ ပဵၼ်ၽႂ် ၸုမ်းလႂ် မႃးႁၢင်ႈၵၢင်ပွႆႇသႂ်ႇဢၼ်ဝႃႈၼၼ်ႉ ဢမ်ႇလႆႈႁူႉ လွင်ႈတုမ်ႉတိူဝ်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး ၼႆယဝ်ႉ။
ၵူၼ်းမိူင်းပိုၼ်ႉတီႈ မူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈဝႃး ယၢမ်းၵၢင်ၶမ်ႈ မွၵ်ႈ 7:15 ၼႆႉ သဵင်ႁႅင်းၼႃႇၶႃႈ မီးၵူၼ်းမႃးပွႆႇသႂ်ႇၶႃႈဢေႃႈ။ ၵူၺ်းၵႃႈ လွင်ႈႁူဝ်ယွႆႈမၼ်းတႄႉ ၶႃႈၵေႃႈ ဢမ်ႇပေႃးႁူႉလီ ႁဵတ်းႁိုဝ်လႄႈ မႃး ပွႆႇသႂ်ႇ ဢၼ်ဝႃႈၼၼ်ႉ တႅၵ်ႇတႄႉ တႅၵ်ႇလုၵ်ႈၼိုင်ႈၶႃႈဢေႃႈ”- ဝႃႈၼႆ။
ဝၢႆးသေ မၢၵ်ႇတႅၵ်ႇယဝ်ႉၼၼ်ႉ ယူႇတီႈၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ဢၼ်ဢဝ်ႁူမ်ႇလူမ်ႈတီႈယေးငိုၼ်းၼၼ်ႉ ယိုဝ်းၵွင်ႈ ၶိုၼ်ႈၾႃႉ ပဵၼ်လၢႆၵမ်း ၼႆယဝ်ႉ။
“တီႈယေးငိုၼ်းၼၼ်ႉ ပဵၼ်ၵႃႈသိုၵ်းမၢၼ်ႈ ဢဝ်လူမ်ႇႁူမ်ႈပေႃးၼမ်ထၢၼ်ႇၼၼ်ႉ ႁဵတ်းႁိုဝ်လႄႈမီး ၵူၼ်းမႃးပွႆႇမၢၵ်ႇတႅၵ်ႇ သႂ်ႇဢမ်ႇႁူႉ။ ယဝ်ႉၵေႃႈ ဝၢႆးသေ မၢၵ်ႇတႅၵ်ႇယဝ်ႉ သိုၵ်းမၢၼ်ႈဢၼ်ပႂ်ႉတီႈယေးငိုၼ်းၼၼ်ႉ ဢဝ်ၵွင်ႈယိုဝ်း ၶိုၼ်ႈၾႃႉ ပဵၼ်လၢႆၵမ်းၶႃႈဢေႃႈ။ တီႈႁိမ်းၼၼ်ႉသမ်ႉ မီးဝႆႉ ႁူင်းႁဵၼ်းၸၼ်ႉသုင် မၢႆ 3 ဝႆႉ သိုၵ်းမၢၼ်ႈဢဝ်ႁူမ်ႇလူမ်ႈပေႃးတဵမ်လူင်ဝႆႉ ၶႃႈဢေႃႈ ၵူၺ်းၵႃႈ ဢမ်ႇပွင်ႇၸႂ်ဝႃႈ ႁဵတ်းႁိုဝ်လႄႈမၢၵ်ႇတႅၵ်ႇ ဢၼ်ၼႆႉၵေႃႈ ပဵၼ်ဢၼ်လီထၢင်ႇထိူမ်လွင်ႈၼိုင်ႈယူႇ”- ၵူၼ်း မိူင်းပိုၼ်ႉတီႈမူႇၸေႊ သိုပ်ႇလၢတ်ႈၼႄၼင်ႇၼႆ။
ၼႂ်းလိူၼ်မေႊၼႆႉၵူၺ်း ၼႂ်းဝဵင်းမူႇၸေႊၼႆႉ မီးလွင်ႈမၢၵ်ႇတႅၵ်ႇ သွင်ပွၵ်ႈယဝ်ႉ။ မိူဝ်ႈဝၼ်းတီႈ 5/5/2021 ၼၼ်ႉၵေႃႈ မၢၵ်ႇ တႅၵ်ႇတီႈႁေႃၼႃႇလီႇ ၵၢင်ဝဵင်း လုၵ်ႈၼိုင်ႈ၊ တီႈႁိမ်းယေး ငိုၼ်းၵမ်ႇပေႃးၸ မၢႆ 1 ပွၵ်ႉၼိူဝ် လုၵ်ႈၼိုင်ႈလႄႈ တီႈႁိမ်းယေး ငိုၼ်းၵပႃႉယႅတ်ႇတၼႃႇ ပွၵ်ႉၼိူဝ် လုၵ်ႈၼိုင်ႈ ၼႂ်းၸႄႈဝဵင်းမူႇၸေႊ။
ယဝ်ႉၵေႃႈ မိူဝ်ႈဝၼ်းတီႈ 22/4/2021 ၼၼ်ႉၵေႃႈ တီႈႁေႃၼႃႇလီႇ ၵၢင်ဝဵင်းမူႇၸေႊၼၼ်ႉ မီးၵူၼ်းၶီႇရူတ်ႉၶိူင်ႈသွၼ်ႉ ၵၼ် မႃး 2 ၵေႃႉသေ မႃးပွႆႇမၢၵ်ႇသႂ်ႇ တႅၵ်ႇ 3 လုၵ်ႈမိူၼ်ၵၼ်။
ဝၢႆးၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းဢႃႇၼႃႇၸိုင်ႈမိူင်းမႃး မိူဝ်ႈဝၼ်းတီႈ 1/2/2021 ၼၼ်ႉသမ်ႉ ဝၢၼ်ႈမိူင်း ဢမ်ႇၼိမ် သဝ်း ၵႆႉမီးလွင်ႈမၢၵ်ႇတႅၵ်ႇ၊ ၾႆးမႆႈၵၢတ်ႇ၊ ၵူၼ်းမိူင်းထုၵ်ႇယိုဝ်းတၢႆ ထုၵ်ႇတီႉၺွပ်း ၸိူဝ်းၼႆႉ မႃးတင်းၼမ် ၼႆယဝ်ႉ။
