သွင်ၽူဝ်မေး ၵူၼ်းပွၵ်ႉႁူဝ်မူၼ်ႇ ၸႄႈဝဵင်းမူႇၸေႊ ၽိတ်းမေႃးၵၼ် ၵေႃႉပဵၼ်ၽူဝ် ပၢတ်ႇၶေႃးၶႃႈႁႅမ် မေးၼၢင်း တၢႆၵိုၵ်းႁိူၼ်းယေးယဝ်ႉသေပၢႆႈ ဝႃႈၼႆ။
မိူဝ်ႈဝႃး ဝၼ်းတီႈ 13/5/2021 ယၢမ်းၵၢင်ၶမ်ႈ မွၵ်ႈ 7 မူင်း ၵေႃႉပဵၼ်ၽူဝ် မဝ်းယႃႈသေ ၽိတ်းပေႃႉမေးၼၢင်း ပၢတ်ႇၶေႃးၶႃႈႁႅမ်ၵၼ်။
ၵူၼ်းပွၵ်ႉႁူဝ်မူၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၽူဝ်မၼ်း ယွင်ႇယႃႈၶႃႈဢေႃႈ၊ ပၢတ်ႇၶေႃးမေးမၼ်းသေ ဢဝ်ၵွၵ်းႁူဝ်မၼ်းၵႂႃႇပႅတ်ႈတီႈလႂ်ယဝ်ႉဢမ်ႇႁူႉ ။ တီႈႁိူၼ်းၶႃၼၼ်ႉတႄႉ ၵိုၼ်းၶၢပ်ႈတူဝ်မေးမၼ်းၵူၺ်းယဝ်ႉ။ ပဵၼ်လိူတ်ႈပဵၼ်ယၢင်ပေႃးတဵမ်ၵႂႃႇမူတ်း။ ၽူဝ်မၼ်းၵေႃႈ ပၢႆႈၵႂႃႇတၢင်းလႂ်ယဝ်ႉၵေႃႈဢမ်ႇႁူႉ။”- ဝႃႈၼႆ။
ၶၢပ်ႈတူဝ်ၼၢင်းယိင်းၼၼ်ႉတႄႉ ၸုမ်းၸွႆႈထႅမ် (နှလုံးလှ ပရဟိတ) မူႇၸေႊ လႆႈမႃးတေႃႉဢဝ်ၵႂႃႇ ႁူင်းယႃ ။ ၵူၺ်း ၵႃႈ ဢမ်ႇလႆႈၵွၵ်းႁူဝ်မၼ်း ၵႂႃႇၸွမ်း ယွၼ်ႉႁႃဢမ်ႇႁၼ် ဝႃႈၼႆ။ ၶႃသွင်ၵေႃႉၽူဝ်မေးၼႆႉ မီးဝႆႉလုၵ်ႈဢွၼ်ႇ 2 ၵေႃႉ။ ဢႃယုၶႃတင်းသွင်မီးမွၵ်ႈ 30 ပၢႆ။
ဝဵင်းမူႇၸေႊၼႆႉ ပဵၼ်ဝဵင်းဢၼ်တိတ်းၸပ်းၵၼ်တင်းလႅၼ်လိၼ်မိူင်းၶႄႇ။ ပဵၼ်တီႈၵႃႉငၢႆႈၶၢႆလီ ဝဵင်းၵူၼ်းၵိုၼ်းငိုၼ်းၶွၼ်ႈလႄႈ တၢင်းၵိၼ်ၵေႃႈမီးၸေး။ ယႃႈမႃႉယႃႈမဝ်းၵမ်လိူင်ႇၼမ်သိုဝ်ႉငၢႆႈလႄႈၵူၼ်းတိတ်းယႃႈၵေႃႈလိူင်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ