ၼႂ်းဝၼ်းတီႈ 6/10/2025 ဝၼ်းၸၼ် ထူပ်းႁၼ်ၶၢပ်ႈတူဝ်ၼၢင်းယိင်းၵေႃႉၼိုင်ႈ တီႈႁူင်းႁႅမ်း Beauty Land Hotel ၸႄႈဝဵင်း ပပႄးတၢၼ်း တိူင်းယၢၼ်ႇၵုင်ႇ။
ၼၢင်းယိင်းၵေႃႉၼၼ်ႉ ၺႃးႁႅမ်တၢႆယဝ်ႉ ထုၵ်ႇတႅပ်းတူဝ်ၶိင်းဝႆႉပဵၼ်ပိတ်းပဵၼ်ပွတ်းသေ သႂ်ႇၼႂ်းထူင် ထိုမ်ႈဝႆႉၼိူဝ်တူၵ်ႈၸၢၵ်ဢႄႊယႃႊၵွၼ်ႊႁွႆႈၽႃ ဢၼ်မီးယူႇတၢင်း ၼွၵ်ႈႁွင်ႈ မၢႆ 502 ႁူင်းႁႅမ်း Beauty Land ႁိမ်းၽြႃးလူင် သူးလေႇ ၵၢင်ဝဵင်းတႃႈၵုင်ႈ။
ၼၢင်းယိင်းၵေႃႉၼၼ်ႉ ပဵၼ်ၽႂ် ယူႇတီႈလႂ် လႄႈ ၵေႃႉပူၼ်ႉပႅၼ်ၶႃႈႁႅမ်တၢႆမၼ်းၼၢင်း ပဵၼ်ၽႂ်ဢၼ်ဝႃႈၼၼ်ႉ ပလိၵ်ႈ သိုၵ်းမၢၼ်ႈ လႄႈ ၽူႈမီးပုၼ်ႈၽွၼ်းၶဝ် တိုၵ်ႉၵူတ်ႇထတ်းဝႆႉယူႇ။ ယၢမ်းလဵဝ် ႁူင်းႁႅမ်းၵမ်ႈၼမ် တီႈဝဵင်းတႃႈၵုင်ႈ ပေႃးတေၶဝ်ႈလိုဝ်ႈၸူဝ်ႈၶၢဝ်း (ဢမ်ႇၶၢမ်ႈၶိုၼ်း)ၼႆ ဢမ်ႇတၢပ်ႈပၼ် မၢႆၾၢင်ၵေႃႈလႆႈၼႆလႄႈ – တႃႇတေလမ်းတူၺ်းဝႃႈ မၼ်းၼၢင်းပဵၼ်ၽႂ် ၽႂ်သမ်ႉၶႃႈႁႅမ်မၼ်းၼၢင်း ယွၼ်ႉသင်ၼႆတေယၢပ်ႇယူႇ- ဝႃႈၼႆ။
ဝၢႆးလင်သိုၵ်းမၢၼ်ႈယိုတ်းမိူင်း တီႈဝဵင်းတႃႈၵုင်ႈၼႆႉ ၵႆႉပဵၼ်လိူင်ႈ ႁိမ်ၸူၼ် ၶႃႈႁႅမ်ၵၼ်တၢႆ။ ၵူၼ်းၼွၵ်ႈမိူင်း ၸိူဝ်းမႃးဢႅဝ်ႇလႄႇ လိုဝ်ႈသဝ်းၼႂ်းဝဵင်းၵေႃႈ ၺႃးၸူၼ်ႁဵတ်းႁၢႆႉ ထိုင်တီႈမၢတ်ႇၸဵပ်း၊ ႁဵတ်းႁႂ်ႈၵူၼ်းမိူင်း ဢိၵ်ႇပႃး ၵူၼ်းၼွၵ်ႈမိူင်း ဢမ်ႇမီးလွင်ႈႁူမ်ႇလူမ်ႈ၊ ပလိၵ်ႈသိုၵ်းမၢၼ်ႈၵေႃႈ ဢမ်ႇဢဝ်ပုၼ်ႈၽွၼ်ႈပၼ်လႆႈ ႁႂ်ႈထိုင်တီႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ