ပလိၵ်ႈ/ ယေး တင်း သိုၵ်းမၢၼ်ႈ ပွႆႇပၢင်တေႃႇလွင်း ၸွမ်းၼႂ်းဢိူင်ႇဝၢၼ်ႈၼွၵ်ႈၼႃးပၢင်ႇ ၼႂ်းၸႄႈဝဵင်းၵဵင်းတုင် တင်းၼမ် ႁဵတ်းႁႂ်ႈၵူၼ်းၼုမ်ႇ ၵူၼ်းမိူင်း ဢၵျၢင်ႉတင်းယၢမ်ႈလူႉ ၊ ပေႃႈမႄႈၵူၼ်းၼုမ်ႇပွင်ႉၶၢင်း။

ဝၢႆးသေ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းဢႃႇၼႃႇၸိုင်ႈမိူင်းမႃး ၶၢဝ်းတၢင်း 100 ဝၼ်းၼႆႉ  တင်ႈၸႂ်ပၼ်ဢၼုယၢတ်ႈၸတ်းပၢင်တေႃႇလွင်းၼႂ်းဢိူင်ႇၵၢတ်ႇၾႃႉ၊ ဢိူင်ႇယၢင်းၵဵင်၊ ဢိူင်ႇမိူင်းလင်း၊ ဢိူင်ႇ ၵၢတ်ႇတဝ်ႇ၊ ဢိူင်ႇဝတ်ႉသၢဝ်း၊ ဢိူင်ႇၵၢတ်ႇထၢႆႈလႄႈ ဢိူင်ႇလွႆလူင် ၸိူဝ်းၼႆႉ  ၵူၼ်းမိူင်း/ၵူၼ်းၼုမ်ႇ ၵႂႃႇတေႃႇလဵၼ်ႈၵိုၼ်းၶွၼ်ႈၵူႈဝၼ်း ဝႃႈၼႆ။

ၵူၼ်း  ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယေးတင်း သိုၵ်းမၢၼ်ႈ ႁူမ်ႈၵၼ်တင်းၽူႈၵွၼ်းဢိူင်ႇ သေ ပိုတ်ႇပၢင်တေႃႇလွင်း ၸွမ်းပၢင်ပွႆး မိူၼ်ၼင်ႇ ပွႆးၶိုၼ်ႈထၢတ်ႈ၊ ပွႆးလဵင်ႉလူင် တီႈၼိုင်ႈယဝ်ႉ တီႈၼိုင်ႈ ဢိူင်ႇၼိုင်ႈယဝ်ႉ ဢိူင်ႇ ၼိုင်ႈ ပၼ်ႇပုတ်ႈၵၼ် ၵႂႃႇၸိူင်ႉၼၼ်ၶႃႈဢေႃႈ။ ယၢမ်းလဵဝ် ပၢင်တေႃႇလွင်းၼႆႉ ၼမ်ၼႃႇၶႃႈယဝ်ႉ ၼႂ်းၸႄႈဝဵင်းၵဵင်းတုင် ႁဝ်းၶႃႈၼႆႉ”- ဝႃႈၼႆ။

လွင်ႈၼႆႉ ႁဵတ်းႁႂ်ႈဢၵျၢင်ႉတၢင်းယၢမ်ႈ ၵူၼ်းမိူင်း ၵူၼ်းၼုမ်ႇလူႉသေ ဢမ်ႇၵႃး  ႁဵတ်းႁႂ်ႈၼႃႈ ႁေႃတေႃႁိူၼ်းတႅၵ်ႇယၢႆႈ  ၊ ပေႃးပၢင်လွင်းလိူင်ႇ ယႃႈမဝ်းၵမ်ၵေႃႈ တေၼမ် ၊ ၵူၼ်းမိူၵ်ႈၵူၼ်းလိူင်းၵေႃႈ တေၼမ်မႃးလိူဝ်ႁႅင်း ၵူၼ်းမိူင်းၵဵင်းတုင်ၶၢင်းပွင်ႉၼင်ႇၼႆ။

“ပၢင်တေႃႇလွင်းၼႆႉ ၵိုၼ်းဝႃႈၵိုၼ်းၶႃႈယဝ်ႉ။  ပူၼ်ႉမႃးလၢႆဝၼ်းၼႆႉၵူၺ်း ၵူၼ်းၼုမ်ႇ ၼႂ်းဢိူင်ႇၵၢတ်ႇတဝ်ႇ ၵႂႃႇတေႃႇသုမ်း ဢမ်ႇယွမ်း 400 သႅၼ်ပျႃး။ ၼႆႉပဵၼ်ဢၼ်ႁဝ်းႁူႉၸွမ်းၵူၺ်းၼႃ။ ဢၼ်ႁဝ်းဢမ်ႇႁူႉၸွမ်း တေမီးထႅင်ႈတင်းၼမ် ၊ ယႃႈ မဝ်းၵမ်ၵေႃႈ ၼမ်ပေႇၸႂ်ယဝ်ႉၶႃႈ” – ၵူၼ်း ၵဵင်းတုင် သိုပ်ႇလၢတ်ႈၼႄၼင်ႇၼႆ။

ထႅင်ႈၾၢႆႇၼိုင်ႈၵေႃႈ ၼင်ႇႁိုဝ် ၵူၼ်းမိူင်း/ ၵူၼ်းၼုမ်ႇ ပေႃးတေဢမ်ႇသူၼ်ၸႂ် ၵၢၼ်မိူင်း တႃႇတေသၢၼ်ၶတ်းတေႃႇ ၶွင်ႇသီႇ သိုၵ်းမၢၼ်ႈၶိုၼ်းၵေႃႈ ပိူင်ၼိုင်ႈၼႆသေ ၸင်ႇပွႆႇပၢင်တေႃႇလွင်း ပၼ်ၵူၼ်းမိူင်းၵေႃႈပိူင်ၼိုင်ႈ ၼႆယဝ်ႉ။

ၵူၼ်းၼုမ်ႇ ၵဵင်းတုင် ဢၼ်တူင်ႉၼိုင်ယူႇၼႂ်းတူင်ႇဝူင်းၵူၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉသိုၵ်းမၢၼ်ႈၶဝ် ႁူႉဝႃႈတႆးၼႆႉ ပေႃးဢဝ်ပၢင်တေႃႇလွင်း ပွႆႇပၼ်ၶဝ်ၵေႃႈ ၶဝ်တေဢမ်ႇသူၼ်ၸႂ်ၵၢၼ်ဝၢၼ်ႈ ၵၢၼ်မိူင်းသေ တေဢမ်ႇ လုၵ်ႉ မႃးသၢၼ်ၶတ်းၶဵင်ႇတႃႉ၊  ၵွပ်ႈၼႆလႄႈ ၶဝ်ဢဝ်ပၢင်တေႃႇပၢင်လွင်း ပွႆႇပၼ်ၵူၼ်းမိူင်းလဵၼ်ႈၶႃႈယဝ်ႉ”- ဝႃႈၼႆ။

ၼႂ်းပၢင်တေႃႇလွင်းၼၼ်ႉ တေမီး မိူၼ်ၼင်ႇ ၽၢႆႉၵိဝ်း/ ၽၢႆႉမႆႉ၊ ၽၢႆႉၸေႈ၊ မၢၵ်ႇၵိင်ႈ လွႆ၊ 36 မိူင်းလူင်၊ လေးၵွင်ႇၵိၼ်ႇလႄႈ တၢင်းလဵၼ်ႈတေႃႇလွင်းလၢႆလၢႆဢၼ် ၊  ပၢင်တေႃႇ ၵႆႇၵေႃႈဢမ်ႇၵိုတ်း ယင်းပၼ်တင်ႈ ဝႃႈၼႆ။