ၵူၼ်းဝၢၼ်ႈ ၼႂ်းၸႄႈဝဵင်းသီႇပေႃႉၵေႃႉၼိုင်ႈ ၺႃးၵူၼ်းႁၢႆႉ ဢမ်ႇႁူႉၾၢႆႇ ယိုဝ်းတၢႆၼိူဝ်သဵၼ်ႈတၢင်း၊ တၢင်းၽႄၵႂႃႇ ဝၢၼ်ႈၶၢႆးလူင် ဢၼ်မီးၾၢႆႇၸၢၼ်းဝဵင်းသီႇပေႃႉၼၼ်ႉ ဝႃႈၼႆ။

ဝၼ်းတီႈ 28/4/2021 ယၢမ်းၵၢင်ၼႂ် ထူပ်းႁၼ် တူဝ်တၢႆ ၸၢႆးလႃႉဝိၼ်း ၺႃးယိုဝ်းတၢႆသေ ပွႆႇဝႆႉၶၢင်ႈတၢင်း သဵၼ်ႈတၢင်းၽႄ လုၵ်ႉသီႇပေႃႉၵႂႃႇ တၢင်းဝၼ်ႈၶၢႆးလူင် ဢိူင်ႇၵုၼ်ၶႆႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မၼ်းၸၢႆး တိူဝ်ႉၺႃး မၢၵ်ႇၵွင်ႈၸွမ်းတူဝ် 3 ႁွႆး၊ ပဵၼ်ၽီမိုဝ်း ၵူၼ်းႁၢႆႉမူႇလႂ် ၸုမ်းလႂ် ယိုဝ်းတၢႆယွၼ်ႉသင် ဢမ်ႇႁူႉလွင်ႈတၢင်း။

ၽူႈတူင်ႉၼိုင်ၼႂ်းတူင်ႇဝူင်းၵူၼ်း သီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ လႅပ်ႈတၢႆၽွင်းၶၢဝ်း 7-8 မူင်း ၵၢင်ၶမ်ႈၼႆႉယူဝ်ႉ။ ႁဝ်းႁွတ်ႈၽႅဝ်တီႈ တူဝ်တၢႆၼၼ်ႉ မီးမွၵ်ႈ 10 မူင်း တူဝ်မၼ်းၸၢႆး ပေႃး ၶႅင်မူတ်း ယဝ်ႉ။ ပဵၼ်ၸုမ်းလႂ် ၵေႃႉလႂ် ယိုဝ်းတႄႉ ဢမ်ႇႁူႉ”- ဝႃႈၼႆ။

ၸၢႆးလႃႉဝိၼ်း ၵေႃႉၺႃးယိုဝ်းၼၼ်ႉ တိူဝ်ႉမၢတ်ႇ မၢၵ်ႇၵွင်ႈတီႈၵွၵ်းႁူဝ် လုၵ်ႈၼိုင်ႈ၊ တီႈႁူဝ်မႃႇ ၾၢႆႇသၢႆႉ လုၵ်ႈၼိုင်ႈလႄႈ တီႈၶႃလူင်ၾၢႆႇသၢႆႉလုၵ်ႈၼိုင်ႈ။

ၸၢႆးလႃႉဝိၼ်းၼႆႉ ပဵၼ်ၵူၼ်းဝၢၼ်ႈပွၵ်ႉၸၢင်ႈၶမ်းၸၢၼ်း ။ ယူႇတီႈၸုမ်းၸွႆႈထႅမ် (နယ်စည်းမခြား သီပေါ) ၵႂႃႇတေႃႉဢဝ် ၶၢပ်ႈတူဝ်တၢႆမၼ်းၸၢႆးမႃးဝႆႉတီႈႁူင်းယႃ သီႇပေႃႉသေ မိူဝ်ႈၼႆႉ (29/4/2021) ယၢမ်းဝၢႆးဝၼ်း တေပူၼ်ႉၶၢပ်ႈတူဝ်မၼ်းၸၢႆးၵႂႃႇ ဝႃႈၼႆ။