ၶွင်ႇသီႇသိုၵ်းမၢၼ်ႈယိုတ်းဢႃႇၼႃႇ ၵုမ်းၵႅဝ်ဝၢၼ်ႈမိူင်းဝႆႉလႄႈ ငဝ်းလၢႆးၵၢၼ်မိူင်း ဢမ်ႇၼိမ်၊ ၵူဝ်ဢမ်ႇလႆႈငိုၼ်းၸဝ်ႈ ၵဝ်ႇၶိုၼ်းၼႆသေ ၵူၼ်းမူႇၸေႊ ႁိမ်ၵႂႃႇၶဝ်ထႅဝ် ထွၼ်ငိုၼ်းၸဝ်ႈၵဝ်ႇၶိုၼ်း ယူႇ ၵူႈဝၼ်းဝၼ်း။

တႄႇဢဝ် မိူဝ်ႈဝၼ်းတီႈ 21/4/2021 ယေးငိုၼ်းၵမ်ႇပေႃးၸ KBZ မၢႆ 1 ဢၼ်ပၵ်း ဝႆႉတီႈပွၵ်ႉၼိူဝ် ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇၼၼ်ႉ ပိုတ်ႇႁဵတ်းၵၢၼ်ၶိုၼ်း၊ တင်ႈတႄႇ ၼၼ်ႉမႃး ၵူၼ်းမိူင်းၼႂ်းပိုၼ်ႉ ႁိမ်ၵၼ်ၵႂႃႇၶဝ်ႈထႅဝ် ထွၼ်ငိုၼ်း ၸဝ်ႈၵဝ်ႇၶိုၼ်း၊ ဢၼ်ၾၢၵ်ႇ ၽင်ဝႆႉ ၼႂ်းယေးငိုၼ်းၼၼ်ႉ။

ၵူၼ်းပိုၼ်ႉတီႈ မူႇၸေႊ ၵေႃႉၼိုင်ႈ လၢတ်ႈဝႃႈ – “ၽႂ်ၵေႃႈ ၵူဝ်ဢမ်ႇလႆႈငိုၼ်းၸဝ်ႈၵဝ်ႇၶိုၼ်း၊ သမ်ႉပေႃးမိူင်းသုၵ်ႉမႃးထႅင်ႈ ၵူဝ်ဢမ်ႇမီးငိုၼ်းၼႂ်းမိုဝ်း ၼၼ်ႉၶႃႈၼႃႇ။ မၢင် ၵေႃႉ ၵႂႃႇပႂ်ႉတီႈၼႃႈပၢၼ်ႇၼၼ်ႉ တင်ႈတႄႇ 5 – 6 မူင်းၵၢင်ၼႂ်။ မိူဝ်ႈၼႆႉ ၾူၼ်သမ်ႉတူၵ်းထႅင်ႈ ဢွၼ်ၵၼ်ယမ်းၾူၼ် ပဵၼ်ဢၼ်ယၢပ်ႇၽိုတ်ႇၵၼ်တႄႉၶႃႈဢေႃႈ”- ဝႃႈၼႆ။

တီႈပၢၼ်ႇယေးငိုၼ်း ၵမ်ႇပေႃးၸ တီႈမူႇၸေႊၼႆႉ ပၼ်ထွၼ်ငိုၼ်း ၼိုင်ႈၵေႃႉလႂ် 5 သႅၼ်ပျႃးတေႃႇဝၼ်းၵူၺ်း။ ယၢမ်း လဵဝ်သမ်ႉ ၼိုင်ႈဝၼ်းလႂ် ႁပ်ႉထွၼ်ပၼ်တႃႇ 200 ၵေႃႉၵူၺ်း။

မိူဝ်ႈတႄႇမၼ်း ဝၼ်းတီႈ 21 ၼၼ်ႉ ၶဝ်ႁပ်ႉၵူၼ်းထွၼ်ငိုၼ်း 500 ၵေႃႉ၊ ထႅင်ႈဝၼ်း ၼိုင်ႈသမ်ႉ ယွမ်းလူင်းမႃးပဵၼ် 400 ၵေႃႉ၊ ယွမ်းထႅင်ႈ 300 ၵေႃႉ ယၢမ်းလဵဝ်ၼႆႉ ပဵၼ် 200 ၵေႃႉ တေႃႇဝၼ်း။ ၼိုင်ႈၵေႃႉသမ်ႉထွၼ်လႆႈ 5 သႅၼ်ပျႃး။ မၢင်ၸိူဝ်း ၸၢင်ႈၵၼ် ၵႂႃႇထွၼ်ပၼ်ငိုၼ်း ၼိုင်ႈၵေႃႉ မိုၼ်ႇႁႃႈ( 15000 ပျႃး) ။