မၢၵ်ႇတႅၵ်ႇၵၢင်ဝဵင်းမူႇၸေႊ 3 လုၵ်ႈ – ၵူၼ်းဝၢၼ်ႈၵူၼ်းမိူင်းတူၵ်းၸႂ်

0
359

မိူဝ်ႈၼႆႉ ဝၼ်းတီႈ 22/4/2021 ယၢမ်းၵၢင်ဝၼ်း မွၵ်ႈ 11:10 မူင်း မီးၵူၼ်းၶီႇရူတ်ႉၶိူင်ႈလမ်းၼိုင်ႈ သွၼ်ႉၵၼ်မႃး သွင်ၵေႃႉ သေ မႃးဝိုတ်းပွႆႇမၢၵ်ႇသႂ်ႇ တီႈႁိမ်းႁေႃသဝ် (ယၢမ်းမူင်း) ၵၢင်ဝဵင်းမူႇၸေႊ ၸိုင်ႈတႆးပွတ်းႁွင်ႇ 3 လုၵ်ႈ၊ ႁဵတ်းႁႂ်ႈၵူၼ်းမိူင်းတူၵ်းၸႂ်။

Image: CJ/ ႁေႃၼႃႇလီႇ ၵၢင်ဝဵင်းမူႇၸေႊ

ၵူၼ်းပိုၼ်ႉတီႈ မူႇၸေႊ ဢၼ်ယူႇတီႈႁိမ်းႁွမ်းၼၼ်ႉ ၵေႃႉၼိုင်ႈ လၢတ်ႈတီႈၽူႈတွႆႇ ႁွၵ်ႈဝႃႈ – “ၸႂ်ႈၶႃႈဢေႃႈ မၢၵ်ႇတႅၵ်ႇ 3 လုၵ်ႈ ထပ်းၵၼ်ၵႂႃႇၵမ်းလဵဝ် ၶႃႈဢေႃႈ။ မီးၵူၼ်းၶီႇရူတ်ႉၶိူင်ႈသွၼ်ႉၵၼ်မႃး သွင်ၵေႃႉသေ မႃးပွႆႇသႂ်ႇၶႃႈ။ မၢၵ်ႇၼၼ်ႉ ၶဝ် ႁေႃႇၸေႈၶၢဝ်သေ မႃးဝိုတ်ႉသႂ်ႇ ၶႃႈဢေႃႈ”- ဝႃႈၼႆ။

ဢိင်ၼိူဝ် လွင်ႈၼႆႉသေ ပဵၼ်ၼမ်ႉမိုဝ်းၽႂ်/ ၸုမ်းလႂ် ႁဵတ်းတႄႉ ပႆႇႁူႉ။ လွင်ႈတုမ်ႉတိူဝ်ႈ ၵူၼ်းမၢတ်ႇၸဵပ်းလူႉတၢႆၵေႃႈ ဢမ်ႇ မီး ဝႃႈၼႆ။

သဵင်ႁႅင်းၼႃႇၶႃႈဢေႃႈ မိူဝ်ႈၵႆႈၼႆႉ။ လွင်ႈတုမ်ႉတိူဝ်ႉ ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး။ ႁဝ်းၶႃႈ ၸိူဝ်းယူႇႁိမ်းႁွမ်းၼႆႉ ၸဵမ်ၵူၼ်းလႅၵ်ႈငိုၼ်း ၵူၼ်းၶၢႆၶူဝ်းၼႂ်းၵၢတ်ႇ ၼႂ်းႁၢၼ်ႉၸိူဝ်းၼႆႉ တူၵ်းၸႂ် တိုၼ်ႇသၼ်ၵၼ်ဢေႃႈ”- ၵူၼ်း လႅၵ်ႈငိုၼ်း တီႈႁိမ်းၵၢတ်ႇ ၵေႃႉၼိုင်ႈ လၢတ်ႈၼႄၼင်ႇၼႆ။

ထႅင်ႈၾၢႆႇၼိုင်ႈၵေႃႈ ယၢမ်းလဵဝ် ၵူၼ်းမိူင်း/ ၵူၼ်းၼုမ်ႇ ၼႂ်းဝဵင်းမူႇၸေႊ ဢွၼ်ၵၼ် ၼႄၵၢင်ၸႂ် သၢၼ်ၶတ်းတေႃႇ သိုၵ်း မၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး ဢမ်ႇၵိုတ်းဢမ်ႇလိုဝ်ႈ တေႃႇထိုင် ယၢမ်းလဵဝ် တိုၵ်ႉသိုပ်ႇၼႄယူႇၶိူဝ်းယၢႆး။ မိူဝ်ႈၼႆႉ ၸတ်းႁဵတ်း ပဵၼ် 4-5 ၸုမ်းသေ ဢွၵ်ႇၼႄတိူဝ်းလိူဝ်မႃးထႅင်ႈ တင်းၼမ် ၼႆယဝ်ႉ။

တႄႇဢဝ် ဝၼ်းတီႈ 1/2/2021 ၼၼ်ႉမႃးသေ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းဢႃႇၼႃႇ ၸိုင်ႈမိူင်းမႃး ဝၢႆးၼၼ်ႉ ၵူၼ်းမိူင်း ၼႂ်းမိူင်းႁူမ်ႈတုမ် ဢွၼ်ၵၼ် ဢွၵ်ႇၼႄၵၢင်ၸႂ်သၢၼ်ၶတ်းတေႃႇသိုၵ်းမၢၼ်ႈလူၺ်ႈလၢႆးၵတ်းယဵၼ်။ ၼႂ်းၸႄႈဝဵင်းမူႇၸေႊ ၵေႃႈမိူၼ်ၵၼ် ၵူၼ်းမိူင်း/ ၵူၼ်းၼုမ်ႇ ဢွၵ်ၼႄၵၢင်ၸႂ် ၵၼ်မႃးႁၢဝ်ႈႁႅင်းသေ ထုၵ်ႇၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ၸႂ်ႉလၢႆးႁုၵ်ႉႁၢႆႉ ယိုဝ်းၵူၼ်း ၼုမ်ႇ လူႉတၢႆ 2 ၵေႃႉ။ တီႉၺွပ်းယဵပ်ႈၶွၵ်ႈ ဝႆႉ 27 ၵေႃႉ၊ ပိုၼ်ႇၽၢဝ်ႇလမ်းတီႉ ၵူၼ်းၼုမ်ႇတႆး ဝႆႉထႅင်ႈလၢလၢႆၵေႃႉလူးၵွၼ်ႇ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ