ၵေႃလိၵ်ႈလၢႆး ၼမ်ႉၶမ်း ၸတ်းႁဵတ်း ပၢင်သွၼ်လိၵ်ႈလၢႆးတႆးလႄႈ ပိုၼ်းႁူႉ တၢင်းႁၼ် ၽွင်းၶၢဝ်းမႆႈ  ၼႂ်းၵႄႈငဝ်းလၢႆးဝၢၼ်ႈမိူင်းသုၵ်ႉယုင်ႈလႄႈ လွင်ႈၶဵင်ႇတႃႉတၢင်းပဵၼ်ၶူဝ်ႊဝိတ်ႉ 19 ။

တႄႇဢဝ် ဝၼ်းတီႈ 13/3/2021 တေႃႇထိုင် ဝၼ်းတီႈ 13/4/2021 တႃႇၶၢဝ်းတၢင်း 1 လိူၼ် ၵေႃလိၵ်ႈလၢႆးလႄႈၾိင်ႈ ငႄႈတႆး ၸႄႈဝဵင်းၼမ်ႉၶမ်း ဢွၼ်ႁူဝ်ၼမ်းၼႃႈသေ  ၸတ်းပၢင်သွၼ်လိၵ်ႈလၢႆးတႆးတင်း ပၢင်ပၼ်ပိုၼ်ႉႁူႉတၢင်းႁၼ် တွၼ်ႈတႃႇၵူၼ်းၼုမ်ႇ တီႈႁူင်းႁေႃ ၵေႃလိၵ်ႈလၢႆး ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ  ။

ၸၢႆးလၢဝ်ၶိူဝ်း ႁူဝ်ပဝ်ႈ ၵေႃလိၵ်ႈလၢႆး ၸႄႈဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ပၢင်သွၼ်လိၵ်ႈတႆးႁဝ်းၶႃႈ ပီၼႆႉ ဢိင်ၼိူဝ် ငဝ်းလၢႆးတၢင်းပဵၼ်ၶူဝ်ႊဝိတ်ႉ 19 လႄႈသင်၊ ဝၢၼ်ႈမိူင်းသုၵ်ႉယုင်ႈလႄႈသင် ၸိူဝ်းၼႆႉ တၢမ်ၼင်ႇႁဵတ်းလႆႈ ၵႅပ်ႈ ၵႅပ်ႈၵေႃႈ ႁဝ်းႁဵတ်းၵႂႃႇ ၸွမ်းၼင်ႇၼႃႈတီႈၽႂ်မၼ်း ပေႃးႁဝ်းၶႃႈ ဢမ်ႇႁဵတ်းၼႆ မၼ်းၵေႃႈ တေလုတ်ႈတိုဝ်ႉတၢင်းတႃႇလုၵ်ႈ ဢွၼ်ႇၶဝ်လႆႈလဵပ်ႈႁဵၼ်း ပၢႆးပၺ်ႇၺႃႇ ၵႂႃႇၼႆလႄႈ ၸင်ႇၶတ်းၸႂ်ႁဵတ်းမႃးၶႃႈ”- ဝႃႈၼႆ။

ပၢင်သွၼ်လိၵ်ႈလၢႆးတႆး တီႈၸႄႈဝဵင်းၼမ်ႉၶမ်း ဢၼ်ယူႇတီႈၵေႃလိၵ်ႈလၢႆးသေ ဢွၼ်ႁူဝ်ၼမ်းၼႃႈၸတ်းႁဵတ်းမႃး ၶွပ်ႈ ၶူပ်ႇပီလႂ်ၼိုင်ႈပွၵ်ႈ ၸတ်းႁဵတ်းမႃးၵူႈပီ ။ ၵူၺ်းၵႃႈ ပီပူၼ်ႉမႃးတႄႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈႁၢဝ်ႈ ႁႅင်းသေ ဢမ်ႇလႆႈၸတ်းပၢင်သွၼ်မႃး။

ပီၼႆႉ  တီႈပၢင်သွၼ်လိၵ်ႈလၢႆးတႆးၼမ်ႉၶမ်းမီးလုၵ်ႈႁဵၼ်း မွၵ်ႈ 80 ၵေႃႉ၊ မေႃသွၼ်သမ်ႉ  မီးမွၵ်ႈ 13 ၵေႃႉ။  ၸတ်းႁွင်ႈသွၼ်ဝႆႉ 3 ႁွင်ႈ။ ၼိုင်ႈႁွင်ႈသွၼ် 25 ၵေႃႉ။   

ၶၢဝ်းယၢမ်း ပူင်သွၼ်တႄႉ ၼိုင်ႈဝၼ်းလႂ် တေပူင်သွၼ်ပၼ် 2 ၶၢဝ်း။ ၶၢဝ်းၼိုင်း ပူင်သွၼ်ပၼ် လိၵ်ႈလၢႆးတႆး။ ထႅင်ႈၶၢဝ်း ၼိုင်ႈသမ်ႉ  ပူင်သွၼ်ပၼ်ပိုၼ်ႉႁူႉတၢင်းႁၼ် တၢင်းၼွၵ်ႈ ၸဵမ်ၸိူဝ်းၼႆႉ။