ၽူႈၸၢႆး ၵေႃႉၼိုင်ႈ ဢႃယု 50 ပၢႆ ၺႃးၸုမ်းဢမ်ႇႁူႉၶဝ်ႈယိုဝ်းထိုင်ၼႂ်းႁိူၼ်းယေး ပဵၼ်ၼမ်ႉမိုဝ်းၽႂ် ပႆႇႁူႉ ဝႃႈၼႆ။
ဝၼ်းတီႈ 16/4/2021 ယၢမ်းၵၢင်ၶမ်ႈ မွၵ်ႈ 7:45 မူင်းၼၼ်ႉ လုင်းၸၢႆးလႅင် ဢႃယု 54 ပီ ထုၵ်ႇၵူၼ်းႁၢႆႉၶဝ်ႈယိုဝ်း တၢႆထင် တီႈ ၵိုၵ်းႁိူၼ်းယေးမၼ်းၸၢႆး တီႈဝၢၼ်ႈၵုင်းသႃႇ ဢိူင်ႇၵုင်းသႃႇ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်း ႁွင်ႇ ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵေႃႉၼိုင်ႈ တီႈသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “မီးၵူၼ်းၸၢႆး သွင်ၵေႃႉ ၶဝ်ႈယိုဝ်း လုင်းလႅင် ၼႂ်းႁိူၼ်းယေးမၼ်းၸၢႆး လႆႈတိူဝ်ႉၺႃးမၢၵ်ႇၵွင်ႈ 3 လုၵ်ႈသေ လႆႈလူႉတၢႆထင်တီႈၵိုၵ်းႁိူၼ်း ၊ ၵူၺ်းၵႃႈ ၵူၼ်းမႃးယိုဝ်းၼၼ်ႉ ပဵၼ်ၽႂ် ၸုမ်းလႂ် ဢၼ်ဝႃႈၼၼ်ႉ ပလိၵ်ႈၶဝ် တိုၵ်ႉၵူတ်ႇထတ်းလွင်ႈတၢင်းမၼ်းယူႇ”- ဝႃႈၼႆ။
ဢိင်ၼိူဝ် လွင်ႈၼႆႉ လုင်းၸၢႆးလႅင် ဢၼ်ထုၵ်ႇယိုဝ်းတၢႆၼၼ်ႉ တိူဝ်ႉၺႃးမၢၵ်ႇ တီႈဢႅဝ် လုၵ်ႈၼိုင်ႈ၊ တီႈၶႅၼ်မိုဝ်း လုၵ်ႈ ၼိုင်ႈလႄႈ တီႈဢူၵ်း လုၵ်ႈၼိုင်ႈ ။
ၼႂ်းပီ 2020 တႄႇဢဝ်လုၵ်ႈလိူၼ်ၵျႅၼ်ႊၼိဝ်ႊရီႊမႃး ၵူၼ်းမိူင်းသီႇပေႃႉ ၺႃးယိုဝ်းတၢႆ 5 ၵေႃႉ၊ လုၵ်ႈလိူၼ်ၾႅပ်ႊပိဝ်ႊရီႊ ၺႃးယိုဝ်းတၢႆ 1 ၵေႃႉ၊ လုၵ်ႈလိူၼ်ဢေႊပရိူဝ်ႊ ၺႃးယိုဝ်းတၢႆ 5 ၵေႃႉ၊ ၼႂ်းလုၵ်ႈလိူၼ်ဢေႃႊၵတ်ႊသ်ၼႆႉသမ်ႉ ၺႃးယိုဝ်းတၢႆ ထႅင်ႈ 3 ၵေႃႉၵိုၵ်းၵၼ် ဝႃႈၼႆ။
ၼႂ်းၸႄႈဝဵင်းသီႇပေႃႉၼႆႉ တင်ႈတႄႇ ပီ 2016 မႃး – ၵူၼ်းမိူင်း၊ ၵူၼ်းၵႃႉဝူဝ်း၊ ၵူၼ်းၵဵဝ်ႇၶွင်ႈၶူဝ်းၶွင် ၼွၵ်ႈမၢႆမီႈ ၸိူဝ်းၼႆႉ ၵႆႉၵႆႉၺႃးယိုဝ်းတၢႆ ၊ ၶူပ်ႇပီလႂ် 10 ၵေႃႉပၢႆၵူႈပီ။ မိူဝ်ႈပီ 2018 ၵူၼ်းဝၢၼ်ႈသူၼ်ဢွႆႈ ဢိူင်ႇၼမ်ႉသိမ် ၸႄႈဝဵင်းသီႇပေႃႉ ၺႃး ယိုဝ်းတၢႆ ၵိုၵ်းႁိူၼ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ