ဝၼ်းတီႈ 18 /4/2021 သိုၵ်းမၢၼ်ႈယိုတ်းမိူင်း ဢဝ်ၸိုဝ်ႈႁွင်ႈၵၢၼ် ၽွင်းလူင်ၾၢႆႇတေႃႉသူင်ႇၵႃႉၶၢႆသေဢွၵ်ႇၶေႃႈပိုၼ်ၽၢဝ်ႇ ၽိုၼ်ၼိုင်ႈ ဝႃႈ ႁၢမ်ႈဢဝ်ၶူဝ်းၵုၼ်ႇထႆး 5 ဢၼ်ၶၢမ်ႈလႅၼ်လိၼ်ၶဝ်ႈၶၢႆမိူင်းမၢၼ်ႈ၊ ပေႃးၶႂ်ႈဢဝ်ၶဝ်ႈမိူင်း တၵ်းလႆႈတၢင်ႇႁိူဝ်း မႃးတၢင်းၼမ်ႉပၢင်ႇလၢႆႇသေ ဢဝ်ၶဝ်ႈၵႃႉၶၢႆပဵၼ်တၢင်းၵၢၼ်ဝႃႈၼႆ။
ၶူဝ်းၵုၼ်ႇဢၼ်သိုၵ်းမၢၼ်ႈ ႁၢမ်ႈ 5 ဢၼ်ၼၼ်ႉပဵၼ် 1- ၼမ်ႉသူမ်ႈ ၼမ်ႉဝၢၼ်တင်းမူတ်း၊2-ၽွင်ၶွပ်ႊၾီႊလႄႈ ၼမ်ႉၼဵင်ႈ ၵူႈၸိူဝ်းၸိူဝ်း၊ 3- Instant Coffee ၶွပ်ႊၾီႊဢၼ် ၵိၼ်လႆႈၵမ်းလဵဝ် ၊ 4- ၼမ်ႉၼူမ်းဢူၼ်လႄႈ ၼမ်ႉၼူမ်းလႅဝ်ႈ ၶိူင်ႈၽေႃႇၶွပ်ႊၾီႊလႄႈၼမ်ႉၼဵင်ႈ ၼမ်ႉဝၢၼ် တင်းမူတ်း -ဝႃႈၼႆ။
ၵဵဝ်ႇၵပ်းလွင်ႈၼႆႉ ၵူၼ်းၵႃႉၸိုင်ႈတႆးပွတ်းၸၢၼ်းလႄႈလႅၼ်လိၼ်ထႆး ၵေႃႉၼိုင်ႈလၢတ်ႈဝႃႈ- “ငဝ်းလၢႆးမၼ်းမိူၼ်ၶိုၼ်းမိူဝ်ႈႁဝ်းၶႃႈ ယၢမ်ႈၵႃႉၶၢႆ ပူၼ်ႉမႃး10 ပီပၢႆ။ ၶူဝ်းၵုၼ်ႇဢမ်ႇၸၢင်ႈဢဝ်ၵႂႃႇၵႃႉၶၢႆလႆႈလွတ်ႈလႅဝ်း။ ႁၢမ်ႈၶူဝ်းၵုၼ်ႇ ဢၼ်ၼိုင်ႈယဝ်ႉဢၼ်ၼိုင်ႈ။ ပႂ်ႉၵူတ်ႇထတ်းၸွမ်းၵဵတ်ႉ ၸွမ်းလၢၼ်ႇသေ ထႆၵိၼ်ငိုၼ်းၵူၼ်းၵႃႉၵူၼ်းၵႂႃႇတၢင်း။ ပေႃးဢမ်ႇသၢင်ႇ ထုၵ်ႇသမ်ႉ ၶဝ်တီႉဢဝ်ၵိၼ်ဢဝ်ၸႂ်ႉပႅတ်ႈမူတ်း။ ၵူၼ်းၵႃႉၶၢႆတေတုၵ်ႉၶ ၵူၼ်းသိုဝ်ႉၵိၼ်ၵေႃႈတေယၢပ်ႇၽိုတ်ႇထႅင်ႈယဝ်ႉၶႃႈ ”- ဝႃႈၼႆ။
ၶူဝ်းၵုၼ်ႇၸိူဝ်းၼႆႉ တင်ႈဢဝ်ဝၼ်းတီႈ 1/5/2021 တေဢမ်ႇပၼ်ၶၢမ်ႈ လႅၼ်လိၼ်တီႈမျႃႉဝတီႇ မိူင်းထႆးလႄႈမိူင်းယၢင်းၸၢပ်ႈၵၼ်ယဝ်ႉလႄႈ သင်ဝႃႈ ၶႂ်ႈတေႃႉသူင်ႇၵႃႉၶၢႆၸိုင် တၵ်းလႆႈသူင်ႇတၢင်းၼမ်ႉပၢင်ႇလၢႆႇ လူၺ်ႈလၢႆးပဵၼ်တၢင်းၵၢၼ် ဝႃႈၼႆဝႆႉ။
