ၵူၼ်းႁဵတ်းၵၢၼ်ၶၢဝ်ႇ တီႈၸုမ်းၶၢဝ်ႇမိတ်ႉၸီႉမ ႁႃးသိုၵ်းမၢၼ်ႈ တီႉၺွပ်း ၼႂ်းႁိူၼ်းယေး ၵႂႃႇသွင်ၵေႃႉ။

မိူဝ်ႈဝႃး ဝၼ်းတီႈ 8/4/2021 ၶွင်ႇသီႇသိုၵ်းမၢၼ်ႈ ၸႂ်ႉလၢႆးႁုၵ်းႁၢႆႉသေ ၶဝ်ႈတီႉၺွပ်း ၼႂ်းႁိူၼ်းယေး ၽူႈသိုဝ်ႇၶၢဝ်ႇ ၵူၼ်းၵဝ်ႇ ၶွင်ၸုမ်းမိၵ်ႉၸီႉမ 2 ၵေႃႉ ၊ မတိၼ်းတိၼ်းဢွင်ႇ လႄႈ ၵူဝ်ႇၸဵင်းပုထူင် ၼႆယဝ်ႉ။

မတိၼ်းတိၼ်းဢွင်ႇတင်း ၵူဝ်ႇၸဵင်းပုထူင် ပဵၼ်ၵူၼ်းႁဵတ်းၵၢၼ်ၵဝ်ႇ ၸုမ်းၶၢဝ်ႇမိၵ်ႉၸီႉမ ယဝ်ႉၵေႃႈ ပဵၼ်ၵူၼ်းႁူမ်ႈ ၵေႃႇသၢင်ႈၸုမ်းၶၢဝ်ႇၶိုၼ်ႈမႃး။ ဝၼ်းဢၼ် သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းသေ ပိၵ်ႉၶျွင်ႉၶၢဝ်ႇထီႊဝီႊၼၼ်ႉ ၶႃသွင်ၵေႃႉ လႆႈထွၼ်တူဝ် ဢွၵ်ႇ ၸုမ်းၶၢဝ်ႇပဵၼ် တၢင်းၵၢၼ်ဝႆႉယဝ်ႉ ဝႃႈၼႆ။

မတိၼ်းတိၼ်းဢွင်ႇၼႆႉ ယွၼ်ႉပၢႆးယူႇလီဢမ်ႇၶႅမ်ႉလႄႈ လႆႈထွၼ်တူဝ်ဢွၵ်ႇၵၢၼ်ဝႆႉၸဵမ်ပိုင်း။ မၼ်းၼၢင်းၵေႃႈ ပဵၼ်ၵူၼ်း ႁူမ်ႈၵေႃႇတင်ႈၸုမ်းၶၢဝ်ႇမိၵ်ႉၸီႉမ ၵေႃႉၼိုင်ႈ မိူဝ်ႈပီ 1998 ၼၼ်ႉ။

ဢိင်ၼိူဝ် လွင်ႈၼႆႉ ယူႇတီႈၸုမ်းၶၢဝ်ႇမိၵ်ႉၸီႉမ တုၵ်းယွၼ်းထိုင် ႁႂ်ႈၶွင်ႇသီႇသိုၵ်းမၢၼ်ႈ ပွႆႇပၼ်ၶိုၼ်းၽူႈသိုဝ်ႇၶၢဝ်ႇ 2 ၵေႃႉ ၼၼ်ႉ ၽႂ်းၽႂ်း ၼႆယူႇ။

မိူဝ်ႈႁူဝ်လိူၼ်မၢတ်ႉၶျ် သိုၵ်းမၢၼ်ႈပိုၼ်ၽၢဝ်ႇယႃႉ ႁွင်ႈၵၢၼ်ၶၢဝ်ႇ ယႂ်ႇလူင် 5 ဢၼ်၊ ဢၼ်ပိုၼ်ၽၢဝ်ႇၶၢဝ်ႇငၢဝ်း ဢမ်ႇၸႂ်ႈပေႃႇလသီႇသိုၵ်း ။ မိူၼ်ၼင်ႇ ႁွင်ႈၵၢၼ်သိုဝ်ႇၶၢဝ်ႇ DVB, Myanmar Now, Mizzima, 7 Days လႄႈ Khit Thit Media ၸိူဝ်းၼႆႉ။

ၼႂ်းၶၢဝ်းတၢင်း 2 လိူၼ်မႃးၼႆႉ ၽူႈသိုဝ်ႇၶၢဝ်ႇ ထုၵ်ႇသိုၵ်းမၢၼ်ႈတီႉၺွပ်း မီး 50 ပၢႆ ၼႂ်းၼၼ်ႉတႃႇ 15 ၵေႃႉ ထုၵ်ႇဢဝ်လိူင်ႈၸွႆးတြႃးဝႆႉ။