ၵူၼ်းမိူင်းၵျွၵ်ႉမႄး မႆႈၸႂ် ဢမ်ႇမီးလွင်ႈႁူမ်ႇလူမ်ႈ ယွၼ်ႉမီးၵူၼ်းဢမ်ႇႁူႉၾၢႆႇ ယိုဝ်းၵွင်ႈၼႂ်းဝၢၼ်ႈၵူႈၶမ်ႈၶိုၼ်း၊ သႂ်ႇၶူဝ်း သိုၵ်းမၢၼ်ႈသေယိုဝ်းၵေႃႈမီး သႂ်ႇၶူဝ်းၵူၼ်းႁိူၼ်းသေယိုဝ်းၵေႃႈမီး။
မိူဝ်ႈဝႃး ဝၼ်းတီႈ 8/4/2021 ယၢမ်းၵၢင်ၶိုၼ်း မွၵ်ႈ 11 မူင်းပၢႆ မီးၽူႈၸၢႆးသွင်ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ်သေ လၢၵ်ႈ ၵွင်ႈယိုဝ်းလွၵ်ႇငိုတ်ႈၼႂ်းမူႇဝၢၼ်ႈၵွင်းမူးၶမ်းလၵ်းလၢမ်ႇ ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ဢမ်ႇယွမ်း 5 ၵမ်း ၼႆ ယဝ်ႉ။
ၵူၼ်းဝၢၼ်ႈၵွင်းမူးၶမ်း လၵ်းလၢမ်ႇ ၵေႃႉၼိုင်ႈ လၢတ်ႈဝႃႈ – “ၸႂ်ႈၶႃႈဢေႃႈ မိူဝ်ႈဝႃး ၵၢင်ၶိုၼ်းၼၼ်ႉ ပဵၼ်ၵူၼ်းၸၢႆး 2 ၵေႃႉ သွၼ်ႉရူတ်ႉၶိူင်ႈၵၼ်မႃး ယိုဝ်းၵွင်ႈလွၵ်ႇငိုတ်ႈ ၼႂ်းဝၢၼ်ႈႁဝ်း ဢၼ်ၶႃႈလႆႈငိၼ်းၼႆႉ ဢမ်ႇယွမ်း 3 ၵမ်းၼႆႉၶႃႈဢေႃႈ။ ၶႃႈ ဢွၵ်ႇၵႂႃႇတူၺ်း လႆႈႁၼ်ၶွၵ်ႇမၢၵ်ႇၵွင်ႈတူၵ်းဝႆႉ 4 ႁူၺ်ႇ၊ မၢၵ်ႇၵွင်ႈ ဢၼ်ပႆႇတႅၵ်ႇ 2 လုၵ်ႈၼႆႉၶႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ လွင်ႈတုမ်ႉတိူဝ်ႉ ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး ဝႃႈၼႆ။
ယူႇတီႈ ၵူၼ်းမိူင်း ၵျွၵ်ႉမႄးတႄႉ ဢွၼ်ၵၼ်မႆႈၸႂ် လွင်ႈႁူမ်ႇလူမ်ႈ၊ ယွၼ်ႉဝႃႈ ယၢမ်းလဵဝ်ၼႆႉ ၵူၼ်းမိူင်း ဢမ်ႇ မီးလွင်ႈႁူမ်ႇ လူမ်ႈသင် လိူဝ်သေဝႃႈဢဝ် တူဝ်ၽႂ်မၼ်းလွတ်ႈၵူၺ်း ၵူၼ်းမိူင်းပိုၼ်ႉတီႈ ၵျွၵ်ႉမႄးလၢတ်ႈ။
“လွင်ႈႁူမ်ႇလူမ်ႈတႃႇႁဝ်းၶႃႈ ၵူၼ်းမိူင်းတႄႉ ဢမ်ႇမီးသင်ၶႃႈ ဢဝ်တူဝ်ၽႂ် တူဝ်မၼ်းလွတ်ႈၵူၺ်းၶႃႈဢေႃႈ တီႈမိူင်းႁဝ်းၼႆႉ ၸုမ်းယိပ်းၵွင်ႈၵၢင်ႇၵေႃႈၼမ်၊ သိုၵ်းမၢၼ်ႈသမ်ႉ မႃးယိုတ်းဢႃႇၼႃႇထႅင်ႈ ၸိူင်ႉၼႆသေ လွင်ႈႁူမ်ႇလူမ်ႈဢၼ်ဝႃႈၼၼ်ႉ ယႃႇ ထၢမ်ၶႃႈ ဝႃႈမီးၸုမ်းလႂ် တေမႃးဢဝ်ႁူမ်ႇလူမ်ႈပၼ်ႁဝ်းဢၼ်ဝႃႈၼၼ်ႉ”- ဝႃႈၼႆ။
မိူဝ်ႈဝၼ်းတီႈ 7/4/2021 ယၢမ်းၵၢင်ၶမ်ႈမွၵ်ႈ 8 မူင်း သိုၵ်းမၢၼ်ႈ ပၼ်ႇၼႂ်းဝဵင်းၵျွၵ်ႉမႄးသေ ယိုဝ်းၵွင်ႈလွၵ်ႇငိုတ်ႈၵူၼ်းမိူင်း ယဝ်ႉ ၶဝ်ႈသွၵ်ႈတဝ်ႁိူၼ်း၊ တီႉၺွပ်းၵူၼ်းၸၢႆးၼုမ်ႇ 2 ၵေႃႉ တီႈပွၵ်ႉ 1 ဢူၵ်ႉၵျိၼ်း။ ဝၢႆးၼၼ်ႉ ၶိုၼ်းၵႂႃႇတီႉၺွပ်းပႃးၸဝ်ႈ ၶွင် ႁၢၼ်ႉၶၢႆၼမ်ႉၼဵင်ႈဝၢၼ် တေႃႇဝိၼ်ႇတူႇ ၵႂႃႇပႃးထႅင်ႈၵေႃႉၼိုင်ႈ။
မိူဝ်ႈဝၼ်းတီႈ 4 လိူၼ်ထူၼ်ႈ 4 ၶၢဝ်းယၢမ်းၵၢင်ၶမ်ႈ 8 မူင်းၼၼ်ႉၵေႃႈ သိုၵ်းမၢၼ်ႈပလိၵ်ႈမၢၼ်ႈ ပၼ်ႇလဵပ်ႈဝဵင်းသေ ယိုဝ်း ၵွင်ႈလွၵ်ႇၵူၼ်းမိူင်းလႄႈ မၢၵ်ႇၵွင်ႈတိူဝ်ႉ ၵူၼ်းမိူင်း 2 ၵေႃႉမၢတ်ႇၸဵပ်း။
ၸွမ်းၼင်ႇ ၸုမ်းၸွႆႈထႅမ်ၵူၼ်းတူၵ်းၶွၵ်ႈၵၢၼ်မိူင်း မိူင်းမၢၼ်ႈ AAPP -Burma ၵဵပ်းသဵၼ်ႈမၢႆသေ ပိုၼ်ၽၢဝ်ႇဝႆႉတႄႉ တင်ႈ ဢဝ်ဝၼ်းတီႈ 1 လိူၼ်February ဝၼ်းသိုၵ်းယိုတ်းမိူင်း မႃးတေႃႇထိုင်ဝၼ်းထီႉ 7လိူၼ် April ၼႆႉ ၵူၼ်းမိူင်းၸိူဝ်းထုၵ်ႇ ပလိၵ်ႈမၢၼ်ႈလႄႈ သိုၵ်းမၢၼ်ႈယိုဝ်းတၢႆမီး 598 ၵေႃႉ ၊ ဢၼ်ၺႃးတီႉၺွပ်း မီး 3,577 ၵေႃႉယဝ်ႉ ဝႃႈၼႆ။
