ဝၼ်းတီႈ 4/4/2021 ယၢမ်းၵၢင်ၶမ်ႈ မွၵ်ႈ 8 မူင်းပၢႆ သိုၵ်းမၢၼ်ႈယိုဝ်း ၵူၼ်းမိူင်း ၵျွၵ်ႉမႄး သွင်ၵေႃႉ တီႈၵၢင်ဝဵင်း ၼႂ်းၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ မၢတ်ႇၸဵပ်း တင်းသွင်ၵေႃႉ ၼႆယဝ်ႉ။
ၽူႈတူင်ႉၼိုင် တူင်ႇဝူင်းၵူၼ်း ၵျွၵ်ႉမႄး ၵေႃႉၼိုင်ႈ လၢတ်ႈဝႃႈ – “ၸႂ်ႈၶႃႈဢေႃႈ ၵူၼ်း ၵျွၵ်ႉမႄး 2 ၵေႃႉ ထုၵ်ႇသိုၵ်းမၢၼ်ႈ ယိုဝ်းသႂ်ႇ လႆႈမၢတ်ႇၸဵပ်းတင်း 2 ၵေႃႉ။ ၵေႃႉၼိုင်ႈ တိူဝ်ႉတီႈၶႃလူင်၊ ထႅင်ႈၵေႃႉၼိုင်ႈသမ်ႉ တိူဝ်ႉတီႈၵုမ်ႇၵူၼ်ႈ၊ ၵေႃႉတိူဝ်ႉ ၺႃးတီႈ ၶႃလူင်ၼၼ်ႉတႄႉ တေလႆႈၽႃႇတတ်းဢဝ်မၢၵ်ႇၵွင်ႈဢွၵ်ႇ”- ဝႃႈၼႆ။
ၵူၼ်းမိူင်း ၵျွၵ်ႉမႄး သွင်ၵေႃႉ ဢၼ်ထုၵ်ႇၶွင်ႇသီႇသိုၵ်းမၢၼ်ႈ ယိုဝ်းသႂ်ႇၼၼ်ႉ ပဵၼ်ၽူႈၸၢႆး ၵေႃႉၼိုင်ႈ ၼၢင်းယိင်း ၵေႃႉ ၼိုင်ႈ ပဵၼ်ၵူၼ်းပွၵ်ႉ 1 ဝဵင်းၵျွၵ်ႉမႄး ။
ဝၢႆးသေ သိုၵ်းမၢၼ်ႈ ယိုတ်းမိူင်းမႃး တႄႇဢဝ် ႁူဝ်လိူၼ်ၾႅပ်ႊၿိဝ်ႊ ရီႊမႃး တေႃႇထိုင်ယၢမ်းလဵဝ် ၶွင်ႇသီႇ သိုၵ်းမၢၼ်ႈ ပိုၼ်ၽၢဝ်ႇ ဢွၵ်ႇဝႆႉမၢႆမီႈသိုၵ်း ႁၢမ်ႈၵူၼ်းမိူင်း ဢွၵ်ႇၼွၵ်ႈႁိူၼ်းယေး ၶၢဝ်းယၢမ်း 8 မူင်းၵၢင်ၶမ်ႈ တေႃႇထိုင် 4 မူင်းၵၢင်ၼႂ် ။