Friday, March 29, 2024

ၵူၼ်းၼုမ်ႇ လႄႈ ၵေႃႈလိၵ်ႈလၢႆးတႃႈၶီႈလဵၵ်း တႅမ်ႈလိၵ်ႈတႆးပိုတ်ႇပၢႆႉဝဵင်း

Must read

ၵူၼ်းၼုမ်ႇတႆး TYO လႄႈ ၵေႃႈလိၵ်ႈလၢႆး ဝဵင်းတႃႈၶီႈလဵၵ်း ပူၵ်းပၢႆႉဝဵင်း ဢၼ်တႅမ်ႈပႃးလိၵ်ႈတႆးသေ မွၵ်ႇပၢင်းသင်ၶ ၸဝ်ႈၽႅတ်းၼမ်ႉမၢၵ်ႇႁၼ် ဢဝ်မင်ၵလ ပိုတ်ႇပၢႆႉဝဵင်း ဝဵင်းတႃႈၶီႈလဵၵ်း တၢင်းဢွၵ်ႇၵႂႃႇ ဝဵင်းၵဵင်းတုင်။

Photo by – SHAN/ ပၢႆႉၶဝ်ႈဢွၵ်ႇဝဵင်းတႃႈၶီႈလဵၵ်း

မိူဝ်ႈၼႆႉ ဝၼ်းတီႈ 1/4/2021 ယၢမ်းၵၢင်ၼႂ် 8 မူင်း ယူႇတီႈ ၵေႃလိၵ်ႈလၢႆးလႄႈ ၾိင်ႈငႄႈတႆး တင်း ၸုမ်းၵူၼ်းၼုမ်ႇတႆး TYO တႃႈၶီႈလဵၵ်း ႁူမ်ႈၵၼ် ပိုတ်ႇပၢႆႉ တၢင်းၶဝ်ႈ ဢွၵ်ႇဝဵင်း ၵဵင်းတုင် – တႃႈၶီႈလဵၵ်း၊ ပၢႆႉၼႆႉ ပူၵ်းပၵ်း ႁိမ်းဝၢၼ်ႈပၢင်ႁတ်း၊ ဢၼ်မီးၵႄႈဝၢၼ်ႈပၢင်ႁၢတ်း တင်း မိူင်းၵူဝ်း ၼိူဝ်သဵၼ်ႈတၢင်းလူင် တႃႈၶီႈလဵၵ်း – ၵဵင်းတုင် ။

- Subscription -

ၸၢႆးဝုၼ်းတိပ်ႉ ႁူဝ်ပဝ်ႈ ၸုမ်းၵူၼ်းၼုမ်ႇတႆး TYO ၸႄႈဝဵင်းတႃႈၶီႈလဵၵ်း လၢတ်ႈတီႈ ၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ႁဝ်း ၶႃႈ ၸုမ်းၵူၼ်းၼုမ်ႇ တင်း ၵေႃလိၵ်ႈလၢႆး ပဵၼ်ၵဝ်ႉၵၼ်းသေ ပိုတ်ႇပၢႆႉၶႃႈ။ ပဵၼ်တီႈတၢင်းၶဝ်ႈဢွၵ်ႇဝဵင်း တႃႈၶီႈလဵၵ်း – ၵဵင်း တုင်ၶႃႈ”- ဝႃႈၼႆ။

ထႅင်ႈၾၢႆႇၼိုင်ႈၵေႃႈ တၢင်းၶဝ်ႈဢွၵ်ႇဝဵင်း တႃႈၶီႈလဵၵ်း – မိူင်းသၢတ်ႇ သဵၼ်ႈတၢင်းၼၼ်ႉၵေႃႈ မီးၽႅၼ်ၵၢၼ် တေႁဵတ်း သၢင်ႈၵႂႃႇထႅင်ႈ ဝႃႈၼႆ။

“တၢင်းၶဝ်ႈဢွၵ်ႇဝဵင်းတႃႈၶီႈလဵၵ်း – မိူင်းသၢတ်ႇၵေႃႈ ႁဝ်းၶႃႈ ႁၢင်ႈႁႅၼ်းဝႆႉ တေပူၵ်းထႅင်ႈယူႇၶႃႈ။ ဢၼ်ႁဝ်းၶႃႈ ႁဵတ်းပၢႆႉသေ ပူၵ်းတၢင်းၶဝ်ႈဢွၵ်ႇဝဵင်းၼႆႉ ယူႇတီႈပီႈၼွင်ႉႁဝ်းၶႃႈတႃႈၶီႈလဵၵ်း ႁူမ်ႈၵၼ် ၸွႆႈၵမ်ႉထႅမ် ၵေႃႉဢိတ်း ဢွတ်းသေ ႁဵတ်းဢေႃႈ” – ၸၢႆးဝုၼ်းတိပ်ႉ သိုပ်ႇလၢတ်ႈၼႄၼင်ႇၼႆ။

တီႈပၢႆႉၼၼ်ႉ တႅမ်ႈဝႆႉလိၵ်ႈ 3 ၽႃသႃ လိၵ်ႈတႆး၊ လိၵ်ႈဢင်းၵလဵတ်ႈလႄႈ လိၵ်ႈမၢၼ်ႈ။ လိၵ်ႈတႆးတႄႉ တႅမ်ႈဝႆႉ “ထုင်ႉသၢမ် ၸဵင်ႇၶမ်း ႁူမ်ႈၸူမ်းႁပ်ႉတွၼ်ႈယူႇဢေႃႈ” ယဝ်ႉၵေႃႈ ၶိုင်ႈၵၢင်ပၢႆႉၼၼ်ႉ တႅမ်ႈဝႆႉဝႃႈ “ဝဵင်းတႃႈၶီႈလဵၵ်း”။ လိူဝ်ၼၼ်ႉ လိၵ်ႈ မၢၼ်ႈသမ်ႉ တႅမ်ႈဝႆႉ “တာချီလိတ်မြို့”။ လိၵ်ႈဢင်းၵလဵတ်ႈသမ်ႉ “WELCOME TO ACHILEIK” ၼႆယဝ်ႉ။

ပၢႆႉတၢင်းၶဝ်ႈဢွၵ်ႇဝဵင်း တႃႈၶီႈလဵၵ်း – ၵဵင်းတုင်ၼႆႉ တင်းမူတ်း သဵင်ႈၵႃႈၸႂ်ႉၸၢႆႇ မွၵ်ႈ 180,000 ဝၢတ်ႇငိုၼ်းထႆး (ငိုၼ်းမၢၼ်ႈ ႁိမ်းပၢၵ်ႇသႅၼ်) ၼႆယဝ်ႉ။

ၽွင်းပီ 2016 ၼၼ်ႉ ၵေႃလိၵ်ႈလၢႆးယၢမ်ႈၶိုင်ပူၵ်းပၵ်းတီႈ တၢင်းၽႄႈ ၵဵင်းတုင် ၼၼ်ႉၵမ်းၼိုင်ႈ၊ ၵူၺ်းၵႃႈဢမ်ႇပဵၼ်မႃး သေ ၸင်ႇပူၵ်းပၵ်းၶိုၼ်းတီႈမႂ်ႇထႅင်ႈၵမ်းၼႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း