မိူဝ်ႈၼႆႉ ဝၼ်းတီႈ 31/3/2021 ယၢမ်းဝၢႆးဝၼ်း 1 မူင်းပၢႆ မၢၵ်ႇတႅၵ်ႇတီႈႁိမ်းလုမ်း ၽွင်းငမ်းပွၵ်ႉ 5 ၵၢင်ဝဵင်း လႃႈသဵဝ်ႈ ႁဵတ်းႁႂ်ႈၵူၼ်းမိူင်းလႄႈ ၵူၼ်းယူႇႁိမ်းၵိၼ်ၸမ်တူၵ်းၸႂ်။
တီႈမၢၵ်ႇတႅၵ်ႇၼၼ်ႉ ပဵၼ်တီႈ ႁိမ်းပွၵ်ႉႁႃႈ တၢင်း ပွၵ်ႉ 4 ၶႅၼ်ၵၼ်၊ ပဵၼ်တီႈ ႁိမ်း သုမ်ႉပလိၵ်ႈ (ယႄးၵိၼ်း) ပွၵ်ႉ 5 ၊ လုမ်းၾၢႆႇၽွင်းငမ်းပွၵ်ႉႁႃႈ၊ ၵူၼ်းမၢတ်ႇၸဵပ်းလူတၢႆ ဢမ်ႇဢမ်ႇမီး ၵူၼ်းလႃႈသဵဝ်ႈ လၢတ်ႈၼႄၼင်ႇၼႆ။
ၵူၼ်းပိုၼ်ႉတီႈ လႃႈသဵဝ်ႈ ၵေႃႉၼိုင်ႈ လၢတ်ႈဝႃႈ – “ၸႂ်ႈၶႃႈဢေႃႈ မၢၵ်ႇတႅၵ်ႇတီႈႁိမ်း ၶၢင်ႈလုမ်းပွၵ်ႉ 5 လုၵ်ႈၼိုင်ႈ။ တီႈႁိမ်းၼၼ်ႉ ဢၼ်တိတ်းၵၼ်တင်းလုမ်းသမ်ႉ မီးႁူင်းပလိၵ်ႈၾၢႆႇႁူမ်ႇလူမ်ႈပွၵ်ႉဝႆႉ။ လွင်ႈတုမ်ႉတိူဝ်ႉၵူၼ်းမၢတ်ႇၸဵပ်း လူႉတၢႆတႄႉ ဢမ်ႇမီး။ ပဵၼ်မၢၵ်ႇၽႂ် ၸုမ်းလႂ် မႃးႁၢင်ႈၵၢင်ဝႆႉတႄႉ ဢမ်ႇႁူႉၶႃႈ”- ဝႃႈၼႆ။
ဢွင်ႈတီႈမၢၵ်ႇတႅၵ်ႇၼၼ်ႉ ပလိၵ်ႈမၢၼ်ႈ မႃးၵူတ်ႇထတ်း ပိူင်ပဵၼ် ငဝ်းလၢႆးမၼ်းဝႆႉယူႇ ၊ ၵမ်ႈၼမ်တႄႉ ဢွၼ်ၵၼ်ထတ်းသၢင်ဝႃႈ ၾၢႆႇပလိၵ်ႈမၢၼ်ႈ တပ်ႉမၢၼ်ႈ ၶိုင်ႁႂ်ႈဝဵင်းသုၵ်ႉၵူၺ်းၼႆ ၵူၼ်းလႃႈသဵဝ်ႈ ၶဝ် ထတ်းသၢင်ၼင်ႇၼႆ။
ၼႂ်းဝဵင်းလႃႈသဵဝ်ႈၼႆႉ ၵူၼ်းမိူင်းလုၵ်ႉႁိုၼ်ႇၼႄၵၢင်ၸႂ်ၵူႈဝၼ်း၊ မိူဝ်ႈဝၼ်းတီႈ 27/3/2021 ၼၼ်ႉ ၵူၼ်းမိူင်း ၸိူဝ်းၼႄ ၵၢင်ၸႂ် ၺႃးသိုၵ်းမၢၼ်ႈယိုဝ်းတၢႆ 5 ၵေႃႉ မၢတ်ႇၸဵပ်းၼပ်ႉသိပ်း။ ဢၼ်ၺႃးတီႉၵႂႃႇၵေႃႈမီးၼမ်။
မိူဝ်ႈဝၼ်းတီႈ 23/3/2021 ပူၼ်ႉမႃး တီႈပွၵ်ႉ 1 ၼႃးမၢၵ်ႇၶေႃ ၼႂ်းၸႄႈဝဵင်းလႃႈသဵဝ်ႈၼၼ်ႉ ၵေႃႈ မၢၵ်ႇတႅၵ်ႇတီႈႁိူၼ်းသိုၵ်းမၢၼ်ႈထၢၵ်ႈ (အငြိမ်းစား) လုၵ်ႈၼိုင်ႈ မီးၵူၼ်းတိူဝ်ႉမၢတ်ႇ 2 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ