ၶွင်ႇသီႇသိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ တီႉၺွပ်းပေႃႉထုပ်ႉ ၽူႈသိုဝ်ႇၶၢဝ်ႇ ၼႂ်းၸႄႈဝဵင်းမျိတ်ႉၵျီးၼႃး ၸႄႈမိူင်းၶၢင် သွင် ၵေႃႉ ဝႃႈၼႆ။
မိူဝ်ႈၼႆႉ ဝၼ်းတီႈ 29/3/2021 ၽူႈသိုဝ်ႇၶၢဝ်ႇၼၢင်းယိင်း ၵေႃႉၼိုင်ႈ တီႈႁွင်ႈၵၢၼ် The 74 Media လႄႈ ၽူႈသိုဝ်ႇၶၢဝ်ႇ ၽူႈၸၢႆးၵေႃႉၼိုင်ႈ ႁွင်ႈၵၢၼ်ၶၢဝ်ႇ Kachin Wave ဢၼ်ႁွင်ႈၵၢၼ်ၶၢဝ်ႇပၵ်းဝႆႉတီႈ ၸႄႈဝဵင်းမျိတ်ႉၵျီးၼႃးၼၼ်ႉ သိုၵ်းမၢၼ်ႈ ၶဝ်ႈတီႉၺွပ်းပေႃႉထုပ်ႉဢဝ် ၶဝ်ၵႂႃႇတီႈပွၵ်ႉဢေးၸေႇတီႇ ၸႄႈဝဵင်းမျိတ်ႉၵျီးၼႃး ။
ၵူၼ်းပိုၼ်ႉတီႈ ဢၼ်ႁၼ်တႂ်ႈၼႃႈတႂ်ႈတႃ ၵေႃႉၼိုင်ႈ လၢတ်ႈဝႃႈ – “ ၶွင်ႇသီႇသိုၵ်းမၢၼ်ႈ တီႉဢဝ်ၵႂႃႇ ၽူႈသိုဝ်ႇၶၢဝ်ႇ သွင်ၵေႃႉ ၶဝ်ႁူႉဝႃႈ ပဵၼ်သိုဝ်ႇၶၢဝ်ႇၼႆသေ ပိတ်ႉထုပ်ႉပေႃႉသႂ်ႇႁၢဝ်ႈႁႅင်းသေ တီႉၺွပ်းလၢၵ်ႈၸၼ်ဢဝ်ၵႂႃႇ”- ဝႃႈၼႆ။
မိူဝ်ႈဝၼ်းတီႈ 24/3/2021 ယၢမ်းၵၢင်ၶိုၼ်းၼၼ်ႉၵေႃႈ ၶွင်ႇသီႇသိုၵ်းမၢၼ်ႈ ၶဝ်ႈတီႉၺွပ်း ၼၢင်းၼၢင်းတိုဝ်း ၽူႈထတ်းလိၵ်ႈ၊ ၼၢင်း ဝိၼ်းလီႇ ၽူႈသိုဝ်ႉၶၢဝ်ႇ လႄႈ ဢူးတိၼ်ႇဢွင်ႇၵျေႃႇတင်း ၸၢႆးၸီႇတူႇ ၽူႈပိုၼ်ၽႄႈ ၸုမ်း ၶၢဝ်ႇၵမ်ႇပေႃးၸတၢႆး တီႈလုမ်းဢၼ်ပၵ်းဝႆႉ တီႈဝဵင်း ႁူဝ်ပူင်း ၸႄႈတွၼ်ႈတူၼ်ႈတီး ၸိုင်ႈတႆး ပွတ်းၸၢၼ်း ။
ဝၢႆးသေ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး မိူဝ်ႈဝၼ်းတီႈ 1/2/2021 ၼႆႉ ၽူႈသိုဝ်ႇၶၢဝ်ႇ ထုၵ်ႇသိုၵ်းမၢၼ်ႈ တီႉ ၺွပ်းၵႂႃႇယဝ်ႉ ႁိမ်းၸမ် 50 ၵေႃႉ။ လိူဝ်ၼၼ်ႉ ပိၵ်ႉဢိုတ်းႁၢမ်ႈပိုၼ်ၽႄႈၶၢဝ်ႇငၢဝ်း၊ လွၵ်ႇငိုတ်ႈ ၽူႈသိုဝ်ႇၶၢဝ်ႇ ဢမ်ႇႁႂ်ႈမီး လွင်ႈလွတ်ႈလႅဝ်း ထၢင်ႇႁၢင်ႈ ၊ ဢၼ် ၸွႆးတြႃး ႁွင်ႈၵၢၼ်ၶၢဝ်ႇၵေႃႈမီးတင်းၼမ်။