ၽွင်း ၵူၼ်းမိူင်း/ ၵူၼ်းၼုမ်ႇ ၼမ်ႉၶမ်း ဢွၵ်ႇၼႄၵၢင်ၸႂ် သၢၼ်ၶတ်းတေႃႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း ၼႂ်းဝဵင်းမီးမၢၵ်ႇတႅၵ်ႇ 2 ႁူၺ်ႇ/ လုၵ်ႈ ။
ဝၼ်းတီႈ 27/3/2021 ပူၼ်ႉမႃး ယၢမ်းၵၢင်ဝၼ်း 12 မူင်းၶိုင်ႈ ၵူၼ်းၼုမ်ႇ ၶွၼ်ႈတုမ်ၵၼ် တီႈပၢင်ႇလွႆလႅင်သေ ပႆတၢင်းလူင်း မႃး ထိုင်တီႈႁိမ်းၵျွင်းၸၢၼ်း ပွၵ်ႉၼွင်ၸၢင်ႉ ၸႄႈဝဵင်ၼမ်ႉၶမ်း ၸိုင်ႈတႆး ပွတ်းႁွင်ႇၼၼ်ႉ ထုၵ်ႇပလိၵ်ႈသိုၵ်းမၢၼ်ႈ ဢဝ် ဢဵၼ်ႁႅင်း မႃးပိၵ်ႉဢိုတ်းသဵၼ်ႈတၢင်း ၵူၼ်းၼုမ်ႇ။ ၵူၼ်းၼုမ်ႇ ထႅင်ႈလၢႆၸုမ်း ဢၼ်မီးဝႆႉၼႂ်းဝဵင်းသမ်ႉ ၶွၼ်ႈတုမ်ၵၼ် သေ မႃးပိၵ်ႉဢိုတ်းတၢင်းလင် ပလိၵ်ႈသိုၵ်းမၢၼ်ႈ ၶၢဝ်းတၢင်း ႁိုင်ၵႂႃႇ 2 ၸူဝ်ႈမူင်းပၢႆ ။
ၵူၼ်းၼုမ်ႇ ၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းၼုမ်ႇႁဝ်းၶႃႈ ထုၵ်ႇသိုၵ်းမၢၼ်ႈ ပိၵ်ႉဢိုတ်း တၢင်း တီႈပွၵ်ႉၼွင်ၸၢင်ႉ။ ၵူၼ်းၼုမ်ႇ ဢၼ်မီးတီႈၼႂ်းဝဵင်းၼၼ်ႉသမ်ႉ ၶွၼ်ႈႁႅင်းၵၼ်သေ မႃးပိၵ်ႉဢိုတ်း လင်ပလိၵ်ႈသိုၵ်းမၢၼ်ႈ လႄႈဢဝ်ၶဝ် ၶမ်ဝႆႉၼႂ်းၵႄႈ ၵူၼ်းၼုမ်ႇၶႃႈဢေႃႈ။ ႁိုင်မွၵ်ႈ 2 ၸူဝ်ႈမူင်းပၢႆ ၊ ၵူၼ်းၼုမ်ႇ ၸင်ႇယႅၵ်ႈပၼ်တၢင်းသေ မႃးႁူမ်ႈ ၵၼ် ပဵၼ်ၸုမ်းလဵဝ်သေ သိုပ်ႇၼႄၵၢင်ၸႂ်ၵႂႃႇ တေႃႇပေႃးယဝ်ႉ”- ဝႃႈၼႆ။
မိူဝ်ႈၽွင်း ပလိၵ်ႈသိုၵ်းမၢၼ်ႈ ပိၵ်ႉဢိုတ်းၵူၼ်းၼုမ်ႇၼၼ်ႉ ၼႂ်းၸႄႈဝဵင်းၼမ်ႉၶမ်း မၢၵ်ႇတႅၵ်ႈ 2 တီႈ ။
“ မၢၵ်ႇတႅၵ်ႇသွင်တီႈၶႃႈ မိူဝ်ႈၽွင်း ပလိၵ်ႈသိုၵ်းမၢၼ်ႈ တင်း ၵူၼ်းၼုမ်ႇ ဝႅတ်ႉၵၼ်ဝႆႉၼၼ်ႉ။ လႆႈငိၼ်းသဵင် မၢၵ်ႇတႅၵ်ႇ တီႈႁူင်းပလိၵ်ႈသယၽ ဢၼ်ယူႇတီႈပွၵ်ႉၵွင်းၼွင်မူဝ် တီႈၼိုင်ႈလႄႈ တီႈႁိမ်းဝၢၼ်ႈငွၼ်ဢိၼ်ႇ ဢၼ်မီးတပ်ႉ မၢၼ်ႈဝႆႉၼၼ်ႉတီႈၼိုင်ႈ”- ၵူၼ်းၼုမ်ႇ ၼမ်ႉၶမ်းသိုပ်ႇလၢတ်ႈၼႄၼင်ႇၼႆ။
ဢိင်ၼိူဝ် လွင်ႈသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းႁူမ်ႈတုမ်မႃး မိူဝ်ႈဝၼ်းတီႈ 1/2/2021 ၼၼ်ႉသေ ၵူၼ်းမိူင်း/ ၵူၼ်း ၼုမ်ႇ ၼမ်ႉၶမ်း ႁူမ်ႈၵၼ် ဢွၵ်ႇၼႄၵၢင်ၸႂ် သၢၼ်ၶတ်းတေႃႇသိုၵ်းမၢၼ်ႈ မႃးႁၢဝ်ႈႁႅင်း တေႃႇထိုင်ယၢမ်းလဵဝ် ၵူၼ်းမိူင်း ၵူၼ်းမိူင်း/ ၵူၼ်းၼုမ်ႇ ဢၼ်ထုၵ်ႇပလိၵ်ႈသိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ တီႉၺွပ်း ယိုဝ်းတၢႆ မၢတ်ႇၸဵပ်း ၸိူဝ်းၼႆႉတႄႉ ပႆႇမီး ၼႆယဝ်ႉ။
