ၵူၼ်းဝၢၼ်ႈၼႂ်းၸႄႈဝဵင်းသီႇပေႃႉ ၵဵပ်းလႆႈမၢၵ်ႇသေ ဢဝ်မႃးၶႅၵ်း/ တွႆႇတူၺ်း တီႈၼႂ်းထဵင်ၼႃး တႅၵ်ႇတိူဝ်ႉသႂ်ႇ ၽူႈၸၢႆး 2 ၵေႃႉ လႆႈလူႉတၢႆ ဝႃႈၼႆ။
ဝၼ်းတီႈ 25/3/2021 ယၢမ်းၵၢင်ၶမ်ႈ လုင်းၸၢႆးသႃႇ ဢႃယု မွၵ်ႈ 50 ပီ ၵဵပ်းလႆႈမၢၵ်ႇလုၵ်ႈၼိုင်ႈသေ ဢဝ်မႃးၶႅၵ်း/ တွႆႇတူၺ်း တီႈၼႂ်းထဵင်ၼႃး ဢၼ်မီးႁိမ်း ဝၢၼ်ႈလီႈ ၼႂ်းဢိူင်ႈဝၢၼ်ႈလီႈ ၼႂ်းၵႄႈဝၢၼ်ႈလီႈ – ၼႃးၸၢင်ႉ ဢၼ်မီးတၢင်းၾၢႆႇ ၸၢၼ်း ၸႄႈဝဵင်းသီႇပေႃႉ ။ မၢၵ်ႇ တႅၵ်ႇသႂ်ႇ လုင်းၸၢႆးသႃႇ လူႉတၢႆ ထင်တီႈ။ ၸၢႆးတူး ဢႃယု 18 ပီ လႆႈလူႉတၢႆၸွမ်း ၽွင်းတေႃႉသူင်ႇတႃႇၵႂႃႇယူတ်းယႃတူဝ်တီႈလႃႈသဵဝ်ႈ ။
ၵူၼ်းပိုၼ်ႉတီႈ ၼမ်ႉလၼ်ႈ လၢတ်ႈဝႃႈ – “မၢၵ်ႇၼၼ်ႉ ပဵၼ်မၢၵ်ႇၽႂ်တႄႉ ဢမ်ႇႁူႉ။ ပဵၼ်မၢၵ်ႇမဵဝ်းလႂ် ၵေႃႈ ဢမ်ႇႁူႉ ။ ၽိူဝ်ႇငိၼ်းသဵင်တႅၵ်ႇယဝ်ႉ ၵူၼ်းဝၢၼ်ႈ ဢွၼ်ၵၼ်ၵႂႃႇတူၺ်း တူဝ်လုင်းၸၢႆးသႃႇတႄႉ လႅဝ်ၽႅဝ်ႉမူတ်းၶႃႈဢေႃႈ။ ၸၢႆးတူး ၼၼ်ႉတႄႉ ၸၢၵ်ႇမၢၵ်ႇတူၺ်းၺႃးတီႈပဵမ်ႉ မၢတ်ႇၸဵပ်းႁၢဝ်ႈႁႅင်း။ ၽွင်းတိုၵ်ႉဢဝ်ၵႂႃႇသူင်ႇယူတ်းယႃတူဝ် တီႈ လႃႈသဵဝ်ႈၼၼ်ႉ လႆႈလူႉတၢႆ ၸွမ်းတၢင်းပႅတ်ႈၶႃႈဢေႃႈ”- ဝႃႈၼႆ။
လုင်းၸၢႆးသႃႇၼႆႉ ပဵၼ်ၵူၼ်းဝၢၼ်ႈလီႈ။ ၸၢႆးတူးၼႆႉသမ်ႉ ပဵၼ်ၵူၼ်းဝၢၼ်ႈၵုင်းၼိဝ်ႉ ဢိူင်ႇဝၢၼ်ႈၸိင်း တိုၵ်ႉတႄႇၼႃႈႁိူၼ်း မိူဝ်ႈပီပူၼ်ႉမႃး ၼႆႉၵူၺ်း။
“ၸၢႆးတူး ၼၼ်ႉမၼ်း လုၵ်ႉတၢင်းတူင်ႇလၢဝ်းသေ တေၵႂႃႇဢႅဝ်ႇတၢင်း ဝၢၼ်ႈၼႃးၸၢင်ႉ။ မၼ်း ၸၢႆးသမ်ႉ ၵႂႃႇဝႄႉတူၺ်း လုင်းၸၢႆးသႃႇ တိုၵ်ႉၶႅၵ်းမၢၵ်ႇယူႇႁိမ်းၶၢင်ႈတၢင်းၼၼ်ႉ။ ၽိူဝ်ႇမၢၵ်ႇတႅၵ်ႇၵေႃႈတိူဝ်ႉသႂ်ႇၶဝ်တင်းသွင်ၵေႃႉ”- ၵူၼ်းၼမ်ႉလၼ်ႈ သိုပ်ႇလၢတ်ႈၼႄၼင်ႇၼႆ။
မိူဝ်ႈပူၼ်ႉမႃး ဝၼ်းတီႈ 12/2/2021 ၼၼ်ႉ သိုၵ်းမၢၼ်ႈ တင်း RCSS ပဵၼ်ပၢင်တိုၵ်းၵၼ် ႁၢဝ်ႈႁႅင်း တၢင်းလွႆပၢင်ၶူင်ႉ ပၢင်ၶႃး ႁၢဝ်ႈႁႅင်းသေ သိုၵ်းမၢၼ်ႈ တပ်ႉၶလယ 17 ဢၼ်ပၵ်းဝႆႉတီႈႁိမ်းဝၢၼ်ႈလီႈၼၼ်ႉ ဢဝ်မၢၵ်ႇလူင် ယိုဝ်းၵႂႃႇတၢင်းၼၼ်ႉ ဢမ်ႇယွမ်း 17 လုၵ်ႈ ၼႆယဝ်ႉ။
တပ်ႉသိုၵ်းမၢၼ်ႈၶလယ 17 ၼႆႉ ပၵ်းဝႆႉ တီႈႁိမ်းဝၢၼ်ႈလီႈ ၼႂ်းဢိူင်ႇဝၢၼ်ႈလီႈ ဢွင်ႈတီႈ လႅၼ်လိၼ်မိူင်းတႆး ပွတ်းႁွင်ႇ တင်း ၸၢၼ်း ၸပ်ႈၵၼ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ