ၼႂ်းၶၢဝ်းတၢင်း 2-3 ဝၼ်းမႃးၼႆႉ သိုၵ်းမၢၼ်ႈ ပႂ်ႉၵူတ်ႇထတ်း ၵူၼ်းမိူင်း ၵဵင်းတုင် ၶဝ်ႈဢွၵ်ႇဝဵင်း ႁၢဝ်ႈႁႅင်း ဝႃႈၼႆ။
ဝၼ်းတီႈ 27/3/2021 ၼႆႉပဵၼ်ဝၼ်းတပ်ႉ သိုၵ်းမၢၼ်ႈ၊ သိုၵ်းမၢၼ်ႈပႂ်ႉတီႈၵဵတ်ႉ/လၢၼ်ႇတၢင်းၶဝ်ႈဢွၵ်ႇဝဵင်းၵဵင်းတုင်ပႂ်ႉ ၵူတ်ႇထတ်းၸႅတ်ႈထၢမ် ၵူၼ်းၶဝ်ႈဢွၵ်ႇဝဵင်း ႁၢဝ်ႈႁႅင်း ။ မိူၼ်ၼင်ႇ သဵၼ်ႈတၢင်း ၵဵင်းတုင် – မိူင်းၶၢၵ်ႇ၊ ၵဵင်းတုင် – တူၼ်ႈတီး၊ ၵဵင်းတုင် – မိူင်းလႃးလႄႈ ၵဵင်းတုင် – တႃႈၶီႈလဵၵ်း ၸိူဝ်းၼႆႉ။
ၵူၼ်းမိူင်းပိုၼ်ႉတီႈ ၵဵင်းတုင် ၵေႃႉၼိုင်ႈ လၢတ်ႈဝႃႈ – “ၼႂ်းသွင်သၢမ်ဝၼ်းမႃးၼႆႉ သိုၵ်းမၢၼ်ႈ ပႂ်ႉၵူတ်ႉထတ်း တီႈၶူဝ်ၼမ်ႉ ၶိုၼ် သဵၼ်ႈတၢင်း ဢၼ်ဢွၵ်ႇၵႂႃႇၸူးတၢင်းမိူင်းၶၢၵ်ႇၼႆႉ ႁူဝ်ၵူၼ်း မီးသဝ်းသၢမ်သိပ်းၼႆႉ ၶဝ်ၵူတ်ႇထတ်း ၸွမ်းရူတ်ႉၶိူင်ႈ /ၵႃး ပိုတ်ႇတူၺ်းတႂ်ႈတီႈၼင်ႈရူတ်ႉၶိူင်ႈ/ ၵႃး ထႅင်ႈလူးၵွၼ်ႇ ယဝ်ႉၵေႃႈ ၸႅတ်ႈထၢမ် တေၵႂႃႇလႂ်ၸိူဝ်းၼႆႉ။ ၵူၺ်းၵႃႈ ၵမ်ႈၼမ် ၶဝ် တေထၢမ် ၸိူဝ်းၵူၼ်းလုၵ်ႉဝၢၼ်ႈၼွၵ်ႈၼႃႈပၢင်ႇ တေၶဝ်ႈဝဵင်းၶႃႈ”- ဝႃႈၼႆ။
လိူဝ်ၼၼ်ႉ မိူၼ်ၼင်ႇ သဵၼ်ႈတၢင်း ၵဵင်းတုင် – တႃႈၶီႈလဵၵ်း၊ ၵဵင်းတုင် – တူၼ်ႈတီး လႄႈ ၵဵင်းတုင် – မိူင်းလႃး ၸိူဝ်းၼႆႉၵေႃႈ ပလိၵ်ႈသိုၵ်းမၢၼ်ႈ ပႂ်ႉၵူတ်ႇထတ်း ႁၢဝ်ႈႁႅင်း မိူၼ်ၵၼ်။
“လွင်ႈပလိၵ်ႈသိုၵ်းမၢၼ်ႈ မႃးပႂ်ႉၵူတ်ႇထတ်းၼၼ်ႉ တႄႇဢဝ် မိူဝ်ႈဝၼ်းၶဝ်ယိုတ်း ဢႃႇၼႃႇၼၼ်ႉမႃးယဝ်ႉ ၵူၺ်းၵႃႈ ႁႅင်း ၵူၼ်းၶဝ် ဢမ်ႇမႃးပႂ်ႉၼမ် ပဵၼ်ထၢၼ်ႇၼႆႉ။ ယဝ်ႉၵေႃႈ ဢမ်ႇၵူတ်ႇထတ်းၸႅတ်ႈထၢမ် ႁၢဝ်ႈႁႅင်း ၵႃႈႁိုဝ်။ ဢၼ်ၶဝ် ၵူတ်ႇ ထတ်းၸႅတ်ႈထၢမ် ႁၢဝ်ႈႁႅင်းၼႆႉ မီးမႃးၼႂ်းၶၢဝ်းတၢင်း 2-3 ဝၼ်းမႃးၼႆႉၵူၺ်း”- ၵူၼ်းမိူင်း ပိုၼ်ႉတီႈ ၵဵင်းတုင် သိုပ်ႇလၢတ်ႈ ၼႄၼင်ႇၼႆ။
ဝၢႆးသေ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉသေ ၵူၼ်းမိူင်းလႄႈသင် ၵူၼ်းၵႃႉၶၢႆလႄႈသင် ဢၼ်ၵႃႉၶၢႆတေႃႇၸူး တၢင်းမိူင်းၶၢၵ်ႇ – မိူင်းယၢင်း ၸိူဝ်းၼႆႉ ႁူပ်ႉလွင်ႈယၢပ်ႇၽိုတ်ႇ ၵိၼ်းၸႂ်ၵၼ်လိူဝ်ႁႅင်း ။
“မိူဝ်ႈလဵဝ်ၼႆႉ သဵၼ်ႈတၢင်း ၵဵင်းတုင် – မိူင်းၶၢၵ်ႇ – မိူင်းယၢင်းသၢႆၼႆႉ ဢမ်ႇမီး ၵူၼ်းမိူင်း၊ ဢမ်ႇမီး ၵူၼ်းၵႃႉ ႁတ်းၵႂႃႇမႃးၵၼ် ။ ဝၢႆးသိုၵ်းမၢၼ်ႈ ယိုတ်းဢႃႇၼႃႇမႃးၼႆႉ ၶဝ်ဢဝ်ႁႅင်းသိုၵ်း ပႂ်ႉၵူႈတီႈသေ ၵူတ်ႇထတ်း ၸွမ်းသဵၼ်ႈတၢင်းႁၢဝ်ႈႁႅင်း။ ၵႃႈၵႃးၵေႃႈၶိုၼ်ႈထႅင်ႈ။ မိူဝ်ႈၵူႈပွၵ်ႈ လုၵ်ႉၵဵင်းတုင်ၵႂႃႉမိူင်းၶၢၵ်ႇ ၼိုင်ႈၵေႃႉ 5,000 ပျႃး။ ယၢမ်းလဵဝ် ၼိုင်ႈၵေႃႉ 4-5 မိုၼ်ႇၶႃႈ ဢေႃႈ၊ ဢမ်ႇမီးၵူၼ်းႁတ်းၵႂႃႇမႃးၶႃႈ”- ၵူၼ်းမိူင်းပိုၼ်ႉတီႈ ၵဵင်းတုင် သိုပ်ႇလၢတ်ႈၼႄၼင်ႇၼႆ။
ၽၵ်းတူတၢင်းၶဝ်ႈဢွၵ်ႇဝဵင်း တီႈၵဵင်းတုင် သီႇၾၢႆႇၼႆႉ ဝၢႆးသေ သိုၵ်းမၢၼ်ႈယိုတ်းဢႃႇၼႃႇ ၸိုင်ႈမိူင်းမႃး တႄႇပိၵ်ႉ ဢိုတ်းၽၵ်းတူ ႁၢမ်ႈၵူၼ်းၶဝ်ႈဢွၵ်ႇၵႂႃႇမႃး တႄႇဢဝ် ယၢမ်းၵၢင်ၶမ်ႈ 8 မူင်း တေႃႇထိုင် 4 မူင်း ၵၢင်ၼႂ် ၼႆယဝ်ႉ။
လိူဝ်ၼၼ်ႉ ၼႂ်းမိူင်းတႆး လၢႆၸႄႈဝဵင်းၵေႃႈ သိုၵ်းမၢၼ်ႈ ဢဝ်ႁႅင်းသိုၵ်း ၶဵင်ႈၶႅင်ၸွမ်းသၢပ်ႇဝဵင်းသေ ၵူတ်ႇထတ်း ၵူၼ်းၵႂႃႇမႃး ႁၢဝ်ႈႁႅင်း ၼႂ်းၶၢဝ်းတၢင်း 2-3 ဝၼ်းၼႆႉ ဝႃႈၼႆ။
