ပၢင်ၼႄၵၢင်ၸႂ် သၢၼ်ၶတ်းတေႃႇ သိုၵ်းမၢၼ်ႈ တီႈဝဵင်းလႃႈသဵဝ်ႈ ၵူၼ်းၼုမ်ႇ ထုၵ်ႇပလိၵ်ႈ/သိုၵ်းမၢၼ်ႈ ဢဝ်ၵႃး လမ်းၽႃႇ တမ် တင်းလင် ဝႃႈၼႆ။
မိူဝ်ႈဝႃး ဝၼ်းတီႈ 23/3/2021 ယၢမ်းၵၢင်ၼႂ် ၵူၼ်းၼုမ်ႇ ဢွၼ်ၵၼ်ၶီႇရူတ်ႉၶိူင်ႈသေ ဢွၵ်ႇၼႄၵၢင်ၸႂ် ၼႂ်းဝဵင်းလႃႈသဵဝ်ႈ သၢၼ်ၶတ်း သိုၵ်းမၢၼ်ႈ ယိုတ်းမိူင်း ။ ပလိၵ်ႈသိုၵ်းမၢၼ်ႈ ၼုင်ႈၶူဝ်း ၵူၼ်းႁိူၼ်းသေ ႁေႃႈၵႃးၸွမ်းလင်ၾုင်ၵူၼ်းၼႄၵၢင်ၸႂ်၊ တင်ႈၸႂ်တမ်ၽႃႇၾုင်ၵူၼ်း၊ ၵူၺ်းၵႃႈၵူၼ်းၼုမ်ႇတၼ်းပၢႆႈလွတ်ႈ။
ၵူၼ်းၼုမ်ႇ ၽူႈဢွၵ်ႇၼႄၵၢင်ၸႂ် ၵေႃႉၼိုင်ႈ လၢတ်ႈဝႃႈ – “ယေး/ သိုၵ်းၼႆႉ ၼုင်ႈၶူဝ်းၵူၼ်းႁိူၼ်းသေ ဢဝ်ၵႃးၸွမ်းတၢင်းလင် ၵူၼ်းၼႄၵၢင်ၸႂ် ။ သိုၵ်းထႅင်ႈၸုမ်းၼိုင်ႈသမ်ႉ ဢဝ်ၵႃးႁႄႉဢိုတ်းတၢင်း တၢင်းၼႃႈ။ ၵူၼ်းၼုမ်ႇႁူႉသေ တၼ်းလႅၼ်ႈပၢႆႈ။ မီးရူတ်ႉၶိူင်ႈ လမ်းၼိုင်ႈ ဢမ်ႇတၼ်းပၢႆႈပူၼ်ႉ ၺႃးယေးဢဝ်ၵႃးတမ်ၽႃႇသေလူမ်ႉၵႂႃႇ။ ၽိူဝ်ႇယေးတိုၵ်ႉလူင်းၵႃးမႃး တေဢၢင်ႈမႃးၺွပ်းၼၼ်ႉ ၵူၼ်းၼုမ်ႇၼၼ်ႉ တၼ်းပၢႆႈလွတ်ႈ”- ဝႃႈၼႆ။
ယၢမ်းႁူဝ်ၶမ်ႈ ပလိၵ်ႈသိုၵ်းမၢၼ်ႈ ဢဝ်ႁႅင်းၵူၼ်းႁႅင်းရူတ်ႉသေ ပၼ်ႇလဵပ်ႈၸွမ်းၵိဝ်ႇ ၸွမ်းတၢင်း ၼႂ်းပွၵ်ႉယွမ်ႇ၊ တီႉလႆႈၵူၼ်းၼုမ်ႇၵႂႃႇ 2 ၵေႃႉ ၸၢႆးၵေႃႉၼိုင်ႈလႄႈ ယိင်းၵေႃႉၼိုင်ႈ ဝႃႈၼႆ။
ပၢင်ၼႄၵၢင်ၸႂ် တီႈဝဵင်းလႃႈသဵဝ်ႈၼႆႉ လႆႈၵိုတ်းယင်ႉမႃး မီးၶၢဝ်းတၢင်း 3-4 ဝၼ်းယဝ်ႉ ယွၼ်ႉပလိၵ်ႈသိုၵ်းမၢၼ်ႈ ၸွမ်း ယႃႉၾုင်ၵူၼ်းၶွၼ်ႈၵၼ်တႃႇၼႄၵၢင်ၸႂ်။
“ၼႂ်း 3-4 ဝၼ်းမႃးၼႆႉ ၵူၼ်းၼုမ်ႇႁဝ်းၶႃႈဢမ်ႇၸၢင်ႈဢွၵ်ႇၼႄၵၢင်ၸႂ်ၶႃႈ ယွၼ်ႉမၼ်းဢမ်ႇမီးတီႈၶွၼ်ႈတုမ်ၵၼ်ၶႃႈဢေႃႈ။ ယေးသိုၵ်းမၢၼ်ႈၶဝ်ၸိူဝ်းၼႆႉ ၸွမ်းၵႂႃႇယႃႉ တိၵ်းတိၵ်းၶႃႈ။ ယဝ်ႉၵေႃႈ ဢွင်ႈတီႈၵူၼ်းၼုမ်ႇ ၵႆႉၶွၼ်ႈတုမ်ၵၼ်ၼၼ်ႉ ၶဝ် ဢဝ်ၵွင်ႈ CCTV တိတ်းဝႆႉ သင်ဝႃႈ ၵူၼ်းၼုမ်ႇ တေႁႃၶွၼ်ႈၵၼ်ၵေႃႈ ၶဝ်မႃးၸွမ်းယႃႉၵမ်းလဵဝ်ၶႃႈ”- ၵူၼ်းၼုမ်ႇ လႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
ၼႂ်းႁၢင်လိူၼ်မၢတ်ႉၶျ်ၼႆႉမႃး မၢၵ်ႇတႅၵ်ႇတီႈဝဵင်းလႃႈသဵဝ်ႈလၢႆတီႈလၢႆ။ ၵမ်း မိူဝ်ႈဝၼ်းတီႈ 22 ၼၼ်ႉမၢၵ်ႇတႅၵ်ႇ တီႈပွၵ်ႉ 4 လုၵ်ႈ႞၊ မိူဝ်ႈဝႃး ဝၼ်းတီႈ 23 ၼႆႉၵေႃႈ တီႈပွၵ်ႉ 1 ၼၼ်ႉလုၵ်ႈ႞ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ