မၢၵ်ႇတႅၵ်ႇတီႈဝဵင်းလႃႈသဵဝ်ႈ ဝၼ်းလဵဝ် တႅၵ်ႇသွင်ၵမ်း တိူဝ်ႉၵူၼ်းမိူင်း မၢတ်ႇၸဵပ်း 2 ၵေႃႉ ဝႃႈၼႆ။
ဝၼ်းတီႈ 23/3/2021 ယၢမ်းဝၢႆးဝၼ်း မၢၵ်ႇတႅၵ်ႇတီႈႁိူၼ်းဢူးတၢၼ်းတိၼ်ႇ (တပ်အငြိမ်းစား) ပွၵ်ႉ 1 ၼႃးမၢၵ်ႇၶေႃ ၸႄႈ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တႅၵ်ႇတိူဝ်ႉသႂ်ႇ ၵူၼ်းမိူင်းမၢတ်ႇၸဵပ်းၸွမ်း 2 ၵေႃႉ ။
ၵူၼ်းလႃႈသဵဝ်ႈ ဢွၼ်ၵၼ်တၢင်ႇတီႈ သူဝ်ႊသျႄႊမီႊတီႊယႃႊ ဝႃႈ– “မၢၵ်ႇတႅၵ်ႇၼၼ်ႉ သဵင်လင် ႁႅင်း တႄႉတႄႉ။ မိူဝ်ႈယၢမ်းဝၢႆးဝၼ်း 3 မူင်း ၵမ်းၼိုင်ႈ၊ ယဝ်ႉၵေႃႈ 4 မူင်းၵမ်းၼိုင်ႈ။ ၵူၼ်းၼႂ်းပွၵ်ႉပေႃး တူၵ်းၸႂ်ယုင်ႈယၢင်ႈၵၼ် မူတ်းၶႃႈယဝ်ႉ။ မီးၵူၼ်းလႆႈမၢတ်ႇၸဵပ်းၸွမ်း 2 ၵေႃႉ”- ဝႃႈၼႆ။
မိူဝ်ႈဝၼ်းတီႈ 22/3/2021 ၼၼ်ႉၵေႃႈ တီႈပွၵ်ႉ 4 ၸႄႈဝဵင်းလႃႈသဵဝ်ႈၵူၺ်းၼင်ႇၵဝ်ႇ မၢၵ်ႇတႅၵ်ႇလုၵ်ႈ/ ႁူၺ်ႇၼိုင်ႈ ၼႆယဝ်ႉ။
ယၢမ်းလဵဝ် ၸွမ်းၼႂ်းၵိဝ်ႇ ၼႂ်းသွႆး ဢွင်ႈတီႈၵူၼ်းၼမ် ၸိူဝ်းၼႆႉ ပလိၵ်ႈသိုၵ်းမၢၼ်ႈ ဢဝ်ဢဵၼ်ႁႅင်းပလိၵ်ႈသိုၵ်းမၢၼ်ႈ ၸွမ်း ႁႄႉႁၢမ်ႈပႂ်ႉ ဢမ်ႇႁႂ်ႈၵူၼ်းၼုမ်ႇၶွၼ်ႈတုမ်ၵၼ် ဢွၵ်ႇၼႄၵၢင်ၸႂ် ၼႆယဝ်ႉ။
