သိုၵ်းမၢၼ်ႈ ဢၼ်ပၵ်းတပ်ႉဝႆႉ  ၾၢႆႇဢွၵ်ႇဝဵင်းမိူင်းပၼ်ႇ တဵၵ်းၸႂ်ႉ  ၵူၼ်းဝၢၼ်ႈ ထွႆထွၼ်ဢွၵ်ႇပိုၼ်ႉတီႈ ႁႂ်ႈၵႂႃႇယူႇၼႂ်းဝၢၼ်ႈသၢမ်လၵ်း ၶိုၼ်း။

မိူဝ်ႈႁူဝ်လိူၼ်မၢတ်ႉၶျ်ၼႆႉ သိုၵ်းမၢၼ်ႈ ၸၵၶ 17 မိူင်းပၼ်ႇ  တဵၵ်းၸႂ်ႉ  ၵူၼ်းဝၢၼ်ႈသၢမ်လၵ်း   ဢၼ်မီးၾၢႆႇဢွၵ်ႇဝဵင်း မိူင်းပၼ်ႇ ယၢၼ်ၵႆဝဵင်း 3 လၵ်း ၼႂ်းၵႄႈ မိူင်းပၼ်ႇ – တႃႈသၢင်ႈ ၼႂ်းၸႄႈဝဵင်းမိူင်းပၼ်ႇ ၸႄႈတွၼ်ႈ လၢင်းၶိူဝ်း ၸိုင်ႈတႆး ပွတ်းၸၢၼ်း ႁႂ်ႈယၢႆႉၶၢႆႉဢွၵ်ႇ ၼႂ်းၼႃႈလိၼ်တပ်ႉၶဝ် သေၶဝ်ႈယူႇၼႂ်းၼႄႇဝၢၼ်ႈၶဝ်ၶိုၼ်းယဝ်ႉဝႃႈၼႆ။

ၽူႈတူင်ႉၼိုင် ၼႂ်းတူင်ႇဝူင်းတႆး ၵေႃႉၼိုင်ႈ တီႈမိူင်းပၼ်ႇ လၢတ်ႈဝႃႈ – “ ႁိူၼ်းၵူၼ်းဝၢၼ်ႈသၢမ်လၵ်းၼႆႉ ပူၼ်ႉၶဝ်ႈၵႂႃႇယူႇၼႂ်းၼႃႈလိၼ်တပ်ႉၶဝ်ၼႆသေ ၸိူဝ်းပူၼ်ႉပႅၼ်ၶဝ်မႃးၼၼ်ႉႁႂ်ႈထွၼ်ဢွၵ်ႇၶိုၼ်း မူတ်းမူတ်း။ ဢမ်ႇၸႂ်ႈဝႃႈ ႁႂ်ႈၶၢႆႉတၢင်းဝၢၼ်ႈ။ ႁိူၼ်းယေး ဢၼ်ၶဝ်ၸႂ်ႉၶၢႆႉၼၼ်ႉ တင်းမူတ်းတေမီးမွၵ်ႈ 10 လင်ၶႃးႁိူၼ်းပၢႆ”– ဝႃႈၼႆ။

ဝၢၼ်ႈသၢမ်လၵ်းၼႆႉ ၵမ်ႈၼမ် ပဵၼ်ပီႈၼွင်ႉၸၢဝ်းလိသေႃး လုၵ်ႉတၢင်းဝၢၼ်ႈၼွင်တဝ်ႇသေၶၢႆႉမႃးယူႇသဝ်း၊   ပီႈၼွင်ႉၸၢဝ်းမၢၼ်ႈ ၵေႃႈမႃးႁူမ်ႈယူႇသဝ်း  ။ ယူႇၾၢႆႇႁွင်ႇလႄႈ ၾၢႆႇၸၢၼ်းတၢင်းၵႃး မိူင်းပၼ်ႇ-တႃႈသၢင်းဝႆႉ ။ ဢၼ်ၺႃးႁေႃႈလိုပ်ႈၼႆႉ ပဵၼ်ဝၢၼ်ႈဢၼ်မီးၾၢႆႇႁွင်ႇတၢင်းၵႃးသေ ၸိူဝ်းမီးႁိမ်းၸမ်တပ်ႉမၢၼ်ႈၸိူဝ်းၼၼ်ႉ ဝႃႈၼႆ။

“ဝၢၼ်ႈသၢမ်လၵ်းၼႆႉ မီးမႃးၸဵမ်ပၢၼ်လႂ်ပုၼ်ႉၶႃႈယဝ်ႉ။ ၵွၼ်ႇတပ်ႉသိုၵ်းမၢၼ်ႈ ၸၵၶ 17 ပႆႇမႃးပၵ်းပုၼ်ႉၶႃႈၼေႈ။ တပ်ႉသိုၵ်းမၢၼ်ႈၼႆႉ တိုၵ်ႉတႄႇမႃးပၵ်းဝၢႆး တႅပ်း 4 တႅပ်းၼၼ်ႉၵူၺ်း။  ဢၼ်ၶဝ်ဝႃႈ ၵူၼ်းမိူင်း ပူၼ်ႉပႅၼ် ၶဝ်ႈၵႂႃႇ ၼႂ်းၼႃႈလိၼ်တပ်ႉၶဝ်ၼႆၼၼ်ႉ ၶဝ်ဢဝ်ဢီႈသင်တႅၵ်ႈၵေႃႈ ဢမ်ႇႁူႉ  ”- ၵူၼ်းမိူင်း ပိုၼ်ႉတီႈ မိူင်းပၼ်ႇ ၵေႃႉၼိုင်ႈ လၢတ်ႈၼႄၼင်ႇၼႆ။

 ဢၼ်သိုၵ်းမၢၼ်ႈၸႂ်ႉႁိူၼ်းၵူၼ်းဝၢၼ်ႈထွႆထွၼ်ၶၢႆႉ ဢွၵ်ႇၼႆႉ မီးၶၢဝ်ႇ မႃးၸဵမ်မိူဝ်ႈႁူဝ်ပီ 2021 ၼႆႉ။ ၵူၺ်းၵႃႈ ယွၼ်ႉပိူဝ်ႈပဵၼ်လွင်ႈသိုၵ်းယိုတ်းမိူင်း သေလႄႈ  ယင်းပႆႇလႆႈယၢႆႉၶၢႆႉၵၼ်ဝႃႈၼႆ။

“  ပူၼ်ႉမႃးလၢႆပီၼၼ်ႉ တိူင်းသိုၵ်းတၢင်းတူၼ်ႈတီးၼႆႉ မႃးတူၺ်းသေ တႄႇဢဝ် ဝၢၼ်ႈသၢမ်လၵ်း တေႃႇ ထိုင် သပ်ႇဝဵင်းၼႆႉ ၶဝ်ဝႃႈ တေဢဝ်ႁဵတ်းဝဵင်းမႂ်ႇ၊ တေဢဝ်ႁဵတ်း တီႈယူႇ တၼ်းသဝ်းပၼ် ၽူႈႁၢပ်ႇၵၢၼ် သိုၵ်းၶဝ် ၼႆပွၵ်ႈၼိုင်ႈယဝ်ႉ။ ၵူၺ်းၵႃႈၵူၼ်းမိူင်းဢမ်ႇၽွမ်ႉလႄႈ ဢမ်ႇလူင်းလၢႆးမိုဝ်းပၼ်” – ၵူၼ်းပိုၼ်ႉတီႈ မိူင်းပၼ်ႇ ၵေႃႉၼိုင်ႈ လၢတ်ႈၼႄၼင်ႇၼႆ။

ဝၢၼ်ႈသၢမ်လၵ်း ဝူဝ်းလၢႆးၼႆႉ လင်ႁိူၼ်းမီးမွၵ်ႈ 50 လင်။