ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ၼႂ်းဝဵင်းမူႇၸေႊ မီးၵူၼ်းလၵ်ႉ/ ၸူၼ် လိူင်ႇၼမ်မႃး ႁၢဝ်ႈႁႅင်း ဝႃႈၼႆ။
မိူဝ်ႈဝႃး ဝၼ်းတီႈ 22/3/2021 ယၢမ်းၵၢင်ႁူဝ်ၶမ်ႈ 6 မူင်းၶိုင်ႈပၢႆ ၼၢင်းယိင်းၵေႃႉၼိုင်ႈ ထုၵ်ႇၵူၼ်းႁၢႆႉ 2 ၵေႃႉ ၸၼ်ႁုၵ်ႉ/ လၢၵ်ႈထူင်ငိုၼ်း တီႈပွၵ်ႉၵွင်းမူးတူင်ႈ ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ ၼႆယဝ်ႉ။
ၵူၼ်းၼုမ်ႇ မူႇၸေႊ ၵေႃႉၼိုင်ႈ လၢတ်ႈဝႃႈ – “ၼၢင်းယိင်းၵေႃႉၼိုင်ႈ ထုၵ်ႇၵူၼ်းႁၢႆႉ ၽူႈၸၢႆး 2 ၵေႃႉ ၶီႇရူတ်ႉၶိူင်ႈ သွၼ်ႉ ၵၼ်မႃး လၢၵ်ႈႁုၵ်ႉၸၼ်ဢဝ် ထူင်ငိုၼ်းမၼ်းၵႂႃႇၶႃႈဢေႃႈ။ ၵူၺ်းၵႃႈ ငိုၼ်းၼၼ်ႉ ပႃးၵႂႃႇၵႃႈႁိုဝ်တႄႉ ဢမ်ႇႁူႉ ၶႃႈ”- ဝႃႈၼႆ။
ၼၢင်းယိင်း ဢၼ်ထုၵ်ႇၸၼ်ႁုၵ်ႉထူင်ငိုၼ်းၵႂႃႇၼၼ်ႉ မၼ်းၼၢင်းၶီႈရူတ်ႉထိပ်ႇသေ လုၵ်ႉၵွင်းမူးတူင်ႈလူင်းမႃး။ ၵူၼ်းႁၢႆႉ သွင်ၵေႃႉၼၼ်ႉ ၸွမ်းလင်မႃးသေ ၸၼ်ႁုၵ်ႉ ဢဝ် ထူင်မၼ်းၼၢင်းၵႂႃႇ- ဝႃႈၼႆ။
ၵူၼ်းမိူင်းမူႇၸေႊၵေႃႉၼိုင်ႈလၢတ်ႈဝႃႈ – ဝၢႆးသေ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ၼႂ်းၸႄႈဝဵင်းမူႇၸေႊ မီး ၵူၼ်းၸူၼ် ၸူၼ်လိူင်ႇၼမ်မႃးႁၢဝ်ႈ ႁႅင်း။ ၵႃးၵူၼ်းမိူင်း၊ ရူတ်ႉၶိူင်ႈၵူၼ်းမိူင်း ၸိူဝ်းၼႆႉ ထုၵ်ႇလၵ်ႉၵႂႃႇ ပဵၼ်လၢႆလမ်း ယဝ်ႉဝႃႈၼႆ။
“ပူၼ်ႉမႃး 3-4 ဝၼ်းၼႆႉ တီႈပွၵ်ႉၼိူဝ် ၵႃးၵူၼ်းမိူင်းၵိုတ်းဝႆႉၼႃႈႁိူၼ်း ႁၢႆလမ်းၼိုင်ႈ၊ ယဝ်ႉၵေႃႈ ပွၵ်ႉႁူဝ်ၼႃး တီႈၼႂ်းသူၼ် ၼၼ်ႉ ရူတ်ႉၶိူင်ႈၵူၼ်းမိူင်း ႁၢႆထႅင်ႈလမ်းၼိုင်ႈ၊ ယၢမ်းလဵဝ် ၼႂ်းမူႇၸေႊႁဝ်းၶႃႈၼႆႉ မၼ်းဢမ်ႇမီးလွင်ႈ ႁူမ်ႇလူမ်ႈသင်ယဝ်ႉ ၶႃႈ။ ၵူၼ်းလၵ်ႉ/ ၵူၼ်းၸူၼ်ၸိူဝ်းၼႆႉ လိူင်ႇၼမ်မႃးတႄႉတႄႉ”- ၵူၼ်းမိူင်းပိုၼ်ႉတီႈမူႇၸေႊ လၢတ်ႈၼႄၼင်ႇၼႆ။
ၼွၵ်ႈလိူဝ်ၼၼ်ႉ ၼႂ်းႁူဝ်လိူၼ်မၢတ်ႊၶျ်ၼႆႉမႃး ၼႂ်းၸႄႈဝဵင်းမူႇၸေႊ မီးၵၢၼ်ပိုတ်ႇႁၢၼ်ႉလဵၼ်ႈ ၵဵမ်းပႃ၊ ယဝ်ႉၵေႃႈ ႁၢၼ်ႉ ပွင်ႇၶူဝ်းၶွင် ၸိူဝ်းၼႆႉမႃး။ ဢၼ်တေပိုတ်ႇထႅင်ႈၵေႃႈမီးထႅင်ႈတင်းၼမ်။ ၸဝ်ႈၶွင် ပဵၼ်ၸၢဝ်းၶႄႇ ၼႆယဝ်ႉ။
