ဢွၼ်ႇၸၢႆး လုၵ်ႈႁဵၼ်း ၸၼ်ႉ 10 ၵေႃႉၼိုင်ႈ ၵႂႃႇၼႄၵၢင်ၸႂ်ၵၢင်ဝဵင်းတူၼ်ႈတီး ၺႃးတီႉ

1539

ပၢင်လုၵ်ႉႁိုၼ်ႇၼႄၵၢင်ၸႂ်ၽွင်းသၢႆဝၼ်းၶိုၼ်ႈ “အရုဏ်ဉီးသပိတ်” ဝဵင်းတူၼ်ႈတီး ဝၼ်းမိူဝ်ႈၼႆႉ ဢွၼ်ႇၸၢႆး လုၵ်ႈႁဵၼ်းၸၼ်ႉသိပ်း ၵေႃႉၼိုင်ႈ ၺႃးသိုၵ်းမၢၼ်ႈ ဢဝ်လၢႆးႁုၵ်းႁၢႆႉသေ တီႉၺွပ်းၵႂႃႇ။

မိူဝ်ႈၼႆႉ ဝၼ်းတီႈ 19/3/2021 ယၢမ်းၵၢင်ၼႂ် ပၢင်ၼႄၵၢင်ၸႂ် သၢၼ်ၶတ်း ၸုမ်းသိုၵ်းယိုတ်းဢႃႇၼႃႇ တီႈဝဵင်းတူၼ်ႈတီး ပလိၵ်ႈမၢၼ်ႈ သိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ လမ်းတီႉၵူၼ်းၼႄၵၢင်ၸႂ်။ တီႉဢဝ် ဢွၼ်ႇၸၢႆး ဢႃယု ပႆႇတဵမ် 18 ပီ ၵေႃႉၼိုင်ႈ ၵႂႃႇ တေႃႇထိုင်ၶမ်ႈၼႆႉ ပႆႇပွႆႇတူဝ်ၶိုၼ်း။

ၸုမ်းလုၵ်ႈႁဵၼ်းၽွမ်ႉႁူမ်ႈ ဝဵင်းတူၼ်ႈတီး တင်း ၸုမ်းလုၵ်ႈႁဵၼ်းၽွမ်ႉႁူမ်ႈ မိူင်းမၢၼ်ႈ ႁူမ်ႈၵၼ် ဢွၵ်ႇလိၵ်ႈပိုၼ်ၽၢဝ်ႇတုၵ်းယွၼ်း ႁႂ်ႈၸုမ်းသိုၵ်းမၢၼ်ႈ ပွႆႇပၼ်တူဝ် ဢွၼ်ႇၸၢႆးၼၼ်ႉၶိုၼ်းၽႂ်းၽႂ်း ဝႃႈၼႆ။

လုၵ်ႈႁဵၼ်း ဢွၼ်ႇၸၢႆး ဢၼ်ထုၵ်ႇတီႉၺွပ်းၵႂႃႇၼၼ်ႉ ၸိုဝ်ႈႁွင်ႉ ၸၢႆးဢွင်ႇတၢၼ်ႉထုတ်ႉ ဢႃယု ပႆႇတဵမ် 18 ပီ တိုၵ်ႉၶိုၼ်ႈ ႁဵၼ်းဝႆႉ ၸၼ်ႉသိပ်း တီႈႁူင်းႁဵၼ်း ၸၼ်ႉသုင်မၢႆ 4  ဝဵင်းတူၼ်ႈတီး။

ၼႂ်းမိူင်းတႆး ပတ်းပိုၼ်ႉ ၵူၼ်းၼႄၵၢင်ၸႂ် ၺႃးၸုမ်းသိုၵ်းမၢၼ်ႈ ပလိၵ်ႈမၢၼ်ႈ တီႉၺွပ်းၵႂႃႇ ၼပ်ႉႁူဝ်ပၢၵ်ႇ။ ဢၼ်ႁၢဝ်ႈႁႅၼ်းလိူဝ်ပိူၼ်ႈတႄႉ ပၢင်ၼႄၵၢင်ၸႂ် တီႈဝဵင်းဢုမ်ႇပဝ်း(ဢွင်ႇပၢၼ်း) ဝၼ်းမိူဝ်ႈၼႆႉ သိုၵ်းမၢၼ်ႈ ပလိၵ်ႈမၢၼ်ႈ ၸႂ်ႉလၢႆးႁုၵ်းႁၢႆႉ ယိုဝ်းၵူၼ်းမိူင်း တၢႆ ဢမ်ႇယွမ်း 9 ၵေႃႉ။ မၢတ်ႇၸဵပ်း 20 ၵေႃႉပၢႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ