ပလိၵ်ႈ/ သိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ ပွႆႇမၢၵ်ႇၵႅတ်ႉသ်ၼမ်ႉတႃ ယဝ်ႉၵေႃႈ ယိုဝ်းၵွင်ႈသႂ်ႇ ၼႂ်းၾုင်ၼႄၵၢင်ၸႂ် တီႈဝဵင်းဢွင်ႇ ပၢၼ်း ၵူၼ်းမိူင်း/ ၵူၼ်းၼုမ်ႇ လႆႈလူႉတၢႆ ၼႂ်းဝၼ်းလဵဝ် 8 ၵေႃႉ ဝႃႈၼႆ။

မိူဝ်ႈၼႆႉ ဝၼ်းတီႈ 19/3/2021 တႄႇဢဝ်ယၢမ်းၵၢင်ၼႂ် တေႃႇထိုင် ဝၢႆးဝၼ်း 1 မူင်းၼႆႉ ၵူၼ်းၼႄၵၢင်ၸႂ် ထုၵ်ႇပလိၵ်ႈ/ သိုၵ်းမၢၼ်ႈ ၸႂ်ႉလၢႆးႁုၵ်ႉႁၢႆႉ ယိုဝ်းၵွင်ႇသႂ်ႇ ၼႂ်းၾုင်ၵူၼ်းမိူင်းၼႄၵၢင်ၸႂ် တီႈဝဵင်းဢွင်ႇပၢၼ်း ၸိုင်ႈတႆး ပွတ်းၸၢၼ်း ၵူၼ်းမိူင်းလႆႈလူႉတၢႆ တင်းမူတ်း  8 ၵေႃႉ။ မၢတ်ႇၸဵပ်းလိူဝ်ႁႅင်း 2 ၵေႃႉ  ။

ၵူၼ်းၼုမ်ႇ ဢွင်ႇပၢၼ်း ဢၼ်ဢွၵ်ႇၼႄၵၢင်ၸႂ် ၵေႃႉၼိုင်ႈ လၢတ်ႈဝႃႈ – “တေႃႇထိုင် ယၢမ်းဝၢႆးဝၼ်း 1 မူင်းၼႆႉ ၵူၼ်းၼုမ်ႇ  ထုၵ်ႇသိုၵ်းမၢၼ်ႈ ယိုဝ်းတၢႆ တင်းမူတ်းမီးၵႂႃႇ 8 ၵေႃႉယဝ်ႉ။ ယၢမ်းလဵဝ် မီးဝႆႉတီႈႁူင်းယႃ။ ထႅင်ႈ 2 ၵေႃႉၼၼ်ႉ မၢတ်ႇ ၸဵပ်းႁၢဝ်ႈႁႅင်းဝႆႉ” –  ဝႃႈၼႆ။

ယၢမ်းလဵဝ် သဵၼ်ႈတၢင်းၶဝ်ႈဝဵင်း/ဢွၵ်ႇဝဵင်း တီႈဝဵင်းဢွင်ႇပၢၼ်းၼႆႉ ထုၵ်ႇပိၵ်ႉဢိုတ်းဝႆႉ။ ဢမ်ႇပၼ် ၵူၼ်းၶဝ်ႈဢွၵ်ႇၵႂႃႇမႃး ။ ၵူၼ်းမိူင်း ဢမ်ႇႁတ်းဢွၵ်ႇႁိူၼ်းယေးၵၼ် ဝႃႈၼႆ။

“ယၢမ်းလဵဝ်ၼႆႉ ၽႂ်ၵေႃႈ ဢမ်ႇႁတ်းဢွၵ်ႇႁိူၼ်းယေးၵၼ်ၶႃႈ ။ သင်ဢွၵ်ႇၵေႃႈ သိုၵ်းမၢၼ်ႈ ယိုဝ်းၶႃႈဢေႃႈ။ ယဝ်ႉၵေႃႈ ၶဝ်ၸႂ်ႉ ပႃးၵွင်ႈသၼၢႆႊပႃႊယိုဝ်းၸွမ်းၶႃႈ” – ၵူၼ်းၼုမ်ႇ ဢွၵ်ႇၼႄၵၢင်ၸႂ် တီႈဢွင်ႇပၢၼ်း သိုပ်ႇလၢတ်ႈၼႄၼင်ႇၼႆ။

ပၢင်ၼႄၵၢင်ၸႂ် တီႈဝဵင်းဢွင်ႇပၢၼ်းၼႆႉ ၶွင်ႇသီႇသိုၵ်းမၢၼ်ႈ ၸႂ်ႉႁႅင်းၵူၼ်း ႁိမ်းၸမ် 200 ၵေႃႉ၊ ၸႂ်ႉလၢႆးႁုၵ်ႉႁၢႆႉ ပွႆႇမၢၵ်ႇ ၵႅတ်ႉသ်ၼမ်ႉတႃ ယိုဝ်းၵွင်ႈသႂ်ႇ ၸွမ်းယႃႉၾုင်ၵူၼ်းၼႄၵၢင်ၸႂ် ။ ပၢင်ၼႄၵၢင်ၸႂ်တီႈဢွင်ႇပၢၼ်းမိူဝ်ႈၼႆႉ လႆႈဝႃႈ ၼႂ်းမိူင်းတႆး မီးၵူၼ်းၼႄၵၢင်ၸႂ်လူႉတၢႆၼမ်သုတ်း ၼႂ်းၶၢဝ်းတၢင်းပၢင်ၼႄၵၢင်ၸႂ်သိုၵ်းယိုတ်းဢႃႇၼႃႇမႃး 45 ဝၼ်း ။

ဝဵင်းဢွင်ႇပၢၼ်းၼႆႉ ပဵၼ်ဝဵင်းတီႈဢၼ် သိုၵ်းမၢၼ်ႈဝႆႉၶူဝ်းၵိၼ်ၶွင်ယဵမ်ႉတႃႇတပ်ႉသိုၵ်းၼႂ်းမိူင်းတႆး။ ၵူၼ်းမိူင်းဢွင်ႇပၢၼ်းလၢတ်ႈဝႃႈ ပဵၼ်ၽွင်းရူတ်ႉၵႃးသိုၵ်းမၢၼ်ႈ မႃးတေႃႉၶူဝ်းၶွင်ၵိၼ်ယမ်ႉၵႂႃႇသူင်ႇတပ်ႉသိုၵ်းၶဝ်လႄႈ ၶဝ်တင်ႈၸႂ် ၸႂ်ႉလၢႆးႁၢႆႉတေႃႇၵူၼ်းမိူင်းၼႄၵၢင်ၸႂ်၊ ႁႂ်ႈၵူၼ်းမိူင်းယႃႇၵႂႃႇၶႂၢင်တၢင်းရူတ်ႉၵႃးတေႃႉၶူဝ်းၶဝ် – ဝႃႈၼႆ။

တီႈဝဵင်းဢွင်ႇပၢၼ်းၼႆႉတင်ႈဢဝ်ဝၼ်းတီႈ 12/3/2021 ၼႆႉမႃး သိုၵ်းမၢၼ်ႈဢဝ်ဢဵၼ်ႁႅင်း ပိုတ်းယိုဝ်းယႃႉၾုင်ၵူၼ်းၼႄၵၢင်ၸႂ် မႃးႁၢဝ်ႈႁႅင်း။ မိူဝ်ႈဝၼ်းထီႉ 14/3/2021 ၵေႃႈ ဢဝ်မၢၵ်ႇၵွင်ႈတႄႉ ပိုတ်းယိုဝ်းၵူၼ်းၼႄၵၢင်ၸႂ်မၢတ်ႇၸဵပ်းႁၢဝ်ႈႁႅင်း 3 ၵေႃႉ၊လူႉတၢႆ 1 ၵေႃႉ ။